އިޒްރޭލާއި އެމެރިކާއިން އީރާނަށް ދެމުން ގެންދާ ހަމަލާތަކުގެ ރައްދުގައި އީރާނުން ސަރަހައްދުގެ ގައުމުތަކުގައިވާ އެމެރިކާގެ ތަންތަނަށާއި އުޅަނދުތަކަށް ހަމަލާދެމުން ދާއިރު މިއަދު އޮމާންގެ މަސްކަޓް ބޭރުން ތެޔޮ ޓޭންކަރަކަށް ދިން ހަމަލާއެއް މީހަކު މަރުވެއްޖެ އެވެ.
އެކަމަކު މިއީ އީރާނުން ދިން ހަމަލާއެއް ކަމެއް އަދި ނޭނގެ އެވެ.
"މާޝަލް އައިލެންޑްސްގެ ދިދާގައި ދަތުރުކުރި ތެޔޮ ޓޭންކަރު އެމްކޭޑީ ވައިއޯމްއަށް ހަމަލާ ދީފައި ވަނީ މަސްކަޓް ގަވަރުނަރޭޓްގެ އައްސޭރިފަށުން 52 ނޯޓިކަލް މޭލު ބޭރުން، ގޮތް ނޭނގޭ އުޅަނދަކުން. އެ ޓޭންކަރުގައި 59،463 މެޓްރިކް ޓަނުގެ ކާގޯ ހުރި،" އޮމާންގެ މެރިޓައިމް ސެކިއުރިޓީ ސެންޓަރުން ނެރުނު ބަޔާނެއްގައި ބުނެފައިވެ އެވެ.
"މި ހަމަލާގެ ސަބަބުން މައި އިންޖީން ރޫމުގައި އަލިފާން ރޯވެ ގޮވާފައިވޭ. މި ހާދިސާގައި ފަޅުވެރިޔަކު ވަނީ މަރުވެފައި. އެއީ އިންޑިއާ މީހެއް،" އެ ބަޔާނުގައި ބުނެފައިވެ އެވެ.
ގަތަރުން މިއަދު ބުނި ގޮތުގައި އީރާންގެ ދެ ޑްރޯނަކުން ވަނީ ގަތަރުގެ އިންޖީނުގެއަކާއި އެނާޖީ ފެސިލިޓީއަކަށް ހަމަލާދޭން މަސައްކަތްކޮށްފަ އެވެ.
އޭގެ ތެރެއިން އެއް ޑްރޯން އަމާޒުކުރީ ދޯހާގެ ދެކުނުގައި އޮންނަ މަސާއީދުގައި ހުންނަ ޕަވާ ޕްލާންޓެއްގެ ފެން ޓޭންކަކަށް ކަމަށާއި އަނެއް ޑްރޯން އަމާޒު ކުރީ ގަތަރުގެ އުތުރުގެ އައްސޭރިފަށުގައި އޮންނަ ރާސް ލަފާންގައި ހުންނަ ލިކުއިފައިޑް ނެޗުރަލް ގޭސް އުފައްދާ ފެސިލިޓީއަކަށް ކަމަށް ގަތަރުގެ ޑިފެންސް މިނިސްޓްރީން ބުންޏެވެ.
މި ހަމަލާތަކުގައި މީހަކަށް އަނިޔާއެއް ނުވާ ކަމަށް ގަތަރުން ބުންޏެވެ.
އީރާނުން ރައްދު ދެމުން ދާއިރު އެ ގައުމުގެ މެދުތެރޭގެ ސަރަހައްދުތަކަށް އިޒްރޭލުން މިއަދު ވެސް ދަނީ ވަރުގަދައަށް ހަމަލާ ދެމުންނެވެ. ހަމަލާތަކުގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އިސް އެތައް ބަޔަކު އަވަހާރަކޮށްލާފައި ވާއިރު އަދިވެސް އިތުރު ލީޑަރުންނަށް ހަމަލާތައް އަމާޒުކުރާނެ ކަމަށް އިޒްރޭލުން ބުންޏެވެ.