އެމެރިކާ އާއި އިޒްރޭލުން ހޮނިހިރު ދުވަހުން ފެށިގެން އީރާނަށް ދެމުން ގެންދާ ހަމަލާތަކުގައި މިހާތަނަށް މަރުވި މީހުންގެ އަދަދު 555 އަށް އަރާފައިވާ ކަމަށް އެ ގައުމުގެ ރެޑް ކްރެސެންޓުން މިއަދު ބުނެފި އެވެ.
"ޒަޔަނިސްޓުންނާއި އެމެރިކާއިން ގައުމުގެ އެކި ހިސާބުތަކަށް ދެމުން ގެންދާ ޓެރަރިސްޓް ހަމަލާތަކުގައި 131 ސިޓީއަކަށް ވަނީ ގެއްލުންވެފައި. މި ހަމަލާތަކުގައި އަހަރެމެންގެ 555 ބަތަލުން ވަނީ މަރުވެފައި،" ރެޑް ކްރެސެންޓުން ޓެލެގްރާމްގައި ކުރި ޕޯސްޓެއްގައި ބުންޏެވެ.
އެ ޖަމާއަތުން ބުނި ގޮތުގައި ހަމަލާތަކުގެ ސަބަބުން ހާލުގައި ޖެހިފައިވާ މީހުންނަށް އެހީވުމަށް ގައުމުގެ އެކި ހިސާބުތަކުގައި އެ ޓީމުގެ 100،000 އަށް ވުރެ ގިނަ މީހުން ގެންދަނީ ހުއްޓުމެއް ނެތި މަސައްކަތްކުރަމުންނެވެ.
މީގެ އިތުރުން ހަތަރު މިލިއަނެއްހާ ވޮލަންޓިއަރުން ތައްޔާރީ ހާލަތުގައި އެބަތިބި ކަމަށާއި އިންސާނީ އެހީ އާއި ނަފްސާނީ އެހީތެރިކަން ވެސް ފޯރުކޮށްދޭނެ ކަމަށް ބުންޏެވެ.
އީރާނަށް ހަމަލާ ދިނުމުން އެ ގައުމުން ގެންދަނީ ބަދަލު ހިފުމުގެ ގޮތުން، ސަރަހައްދުގެ ގައުމުތަކުގައި ހުރި އެމެރިކާގެ މަސްލަހަތު ހިމެނޭ ތަންތަނަަށް ހަމަލާ ދެމުންނެވެ. މިއަދު ވަނީ ކުވައިތުގައި ހުންނަ އެމެރިކާ އެމްބަސީ އާއި ބަހްރެއިންގައި ހުންނަ އެމެރިކާގެ އަސްކަރީ މަރުކަޒަކަށް ވެސް ހަމަލާ ދީފަ އެވެ. މީގެ އިތުރުން ސައޫދީގެ ތެޔޮ ކާރުހާނާއަކަށް އީރާނުން ދޭން އުޅުނު ޑްރޯން ހަމަލާއެއް ނާކާމިޔާބުކޮށްލާފައިވާ ކަމަށް ސައޫދީން ބުންޏެވެ. އެކަމަކު ޑްރޯން އިންޓަސެޕްޓުކުރުމުން ގޮވައި އޭގެ ބައިތަކުގެ ސަބަބުން އަލިފާނުގެ ހާދިސާއެއް ހިނގި ކަމަށް ބުންޏެވެ.
މީގެ އިތުރުން ބަހްރެއިން އާއި ޔޫއޭއީގައި ހުންނަ އެމެޒަންގެ ޑޭޓާ ސެންޓަރުތަކަސް ހަމަލާ ދިނުން އެ ގައުމުތަކުން ވަނީ ކްލައުޑް ސާވިސްއަށް ބުރޫއަރައިފަ އެވެ.