އީރާނަށް އިޒްރޭލާއި އެމެރިކާއިން ދެމުން ގެންދާ ހަމަލާތަކުގައި، މިހާރު ޑިޕްލޮމެޓިކް އަރާރުމެއްގެ ތެރޭގައި އޮތް ޗާގޯސްގެ ޑިއެގޯ ގާސިއާ (ފޯޅަވަހި) ގެ އަސްކަރީ މަރުކަޒު ބޭނުންކުރުމުގެ ހުއްދަ އެމެރިކާއަށް ދިނުން އިނގިރޭސި ވިލާތުގެ ބޮޑުވަޒީރު ކިއާ ސްޓާމާ ދެއްވީ މާ ލަހުން ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕު ނުރުހުން ފާޅުކުރައްވައިފި އެވެ.
އިނގިރޭސި ވިލާތުގެ ޓެލެގްރާފަށް ދެއްވި އިންޓަވިއުއެއްގައި ޓްރަމްޕު ވިދާޅުވީ އިނގިރޭސި ވިލާތުން އެމެރިކާއަށް ކުއްޔަށް ދީފައި އޮންނަ، ދެ ގައުމު ގުޅިގެން ހިންގާ އަސްކަރީ މަރުކަޒު އީރާނާ ދެކޮޅަށް ބޭނުންކުރުމުގައި ސްޓާމާ ފުރަތަމަ އިންކާރުކުރެއްވި ކަމަށެވެ.
ޓްރަމްޕު ވިދާޅުވީ ސްޓާމާގެ "ވިސްނުން ބަދަލުވާން މާ ގިނައިރު ހޭދަވި" ކަމަށެވެ.
އީރާނަށް ދެމުން ގެންދާ ހަމަލާތަކުގައި އިނގިރޭސި ވިލާތުގެ އަސްކަރީ މަރުކަޒުތައް ބޭނުންކުރުމުގެ ހުއްދަ އެމެރިކާ ސިފައިންނަށް ދެއްވިކަން ސްޓާމާ އިއުލާނުކުރެއްވީ އިއްޔެ އެވެ. އެކަމަކު އެ ހުއްދަ ދީފައިވަނީ ހަމައެކަނި ދިފާއީ ހަމަލާތަކަށް ކަމަށާއި އެއީ އީރާނުގެ މިސައިލް ސައިޓްތަކަށް ހަމަލާ ދިނުމަށް ކަމަށް ސްޓާމާ ވިދާޅުވި އެވެ.
ޓްރަމްޕު ވަނީ އީރާންގެ ވެރިންނާއި އަސްކަރީ ތަންތަނަށް އެންމެ ފުރަތަމަ ދިން ހަމަލާގައި ފޯޅަވަހި ބޭނުންކުރުމުގެ ހުއްދަ ލިބިފައި ނުވާތީ އެކަމާ ނުރުހުން ފާޅުކުރައްވައިފަ އެވެ.
"ފަހަރެއްގައި މިއީ މި ދެ ގައުމުގެ ދެމެދުގައި މީގެ ކުރިން ދުވަހަކު ވެސް ވީ ކަމެއް ނޫން،" ޓްރަމްޕު ވިދާޅުވެފައިވެ އެވެ. "ފަހަރެއްގައި މި ހަމަލާތަކުގެ ގާނޫނީ ސައްހަކަމާ މެދު ސްޓާމާގެ ކަންބޮޑުވުމެއް އޮތީ ކަމަށް ވެދާނެ."
ސްޓާމާ ފަހުން ވިސްނުން ބަދަލުކުރައްވާފައި ވާތީ އެކަމަށް އިޝާރާތްކުރައްވަމުން ޓްރަމްޕު ވިދާޅުވީ އެއީ "ލިބުނު ބޮޑު އެހީއެއް" ކަމަށެވެ. އެކަމަކު ހުއްދަ ދިނުމަށް އެކަށީގެންވާ ވަރަށް ވުރެ ގިނަ ވަގުތު ހޭދަވެގެން ހިނގައްޖެ ކަމަށް ވިދާޅުވި އެވެ.
އިނގިރޭސި ވިލާތުގެ އަސްކަރީ މަރުކަޒުތައް ބޭނުންކުރުމުގެ ހުއްދަ ސްޓާމާ ދެއްވައި އެކަން އިއުލާނުކުރެއްވީ އީރާނުގެ ރައްދު ހަމަލާތައް ފުޅާކުރަމުން ގޮސް ސައިޕްރަސްގައި ހުންނަ އިނގިރޭސި ވިލާތުގެ އަސްކަރީ މަރުކަޒަކަށް ވެސް ހަމަލާ ދިނުމުންނެވެ.
ސައިޕްރަސް އިން މިއަދު ވެސް ވަނީ އިނގިރޭސި ވިލާތުގެ އަކްރޮޓިރީ ރޮޔަސް އެއާފޯސްގެ މަރުކަޒާ ދިމާލަށް އީރާންގެ ޑްރޯންތަކެއް ދިޔަ ކަމަށާއި އެކަމަކު އިންޓަސެޕްޓުކޮށް ވައްޓާލާފައިވާ ކަމަށް ބުނެފަ އެވެ. އީރާންގެ ހަމަލާއަށް ފަހު ވެސް އެ މަރުކަޒު އަންނަނީ އޮޕަރޭޓްކުރަމުންނެވެ.
ބީބީސީން މިއަދު ބުނި ގޮތުގައި އީރާނުގެ މިސައިލް ސައިޓްތަކަށް ހަމަލާ ދިނުމަށް އެމެރިކާ އިން ބޭނުންކުރާނީ އިނގިރޭސި ވިލާތުގެ އަސްކަރީ މަރުކަޒުތަކުގެ ތެރެއިން ގްލޫސެސްޓާޝަޔާގައި ހުންނަ އާރްއޭއެފް ފެއާފޯޑް އަދި އިންޑިއާ ކަނޑުގެ ޑިއޭގޯ ގާސިއާ އެވެ.
ޗާގޯސްގެ ސިޔާދަތީ ބާރު އިނގިރޭސި ވިލާތުން މޮރިޝަސް އަށް ދޭން ނިންމައި ހަދާފައިވާ އެއްބަސްވުމުގެ ސަބަބުން ފޯޅަވަހީގެ އަސްކަރީ މަރުކަޒު ގެއްލިދާނެ ކަމުގެ ކަންބޮޑުވުން ޓްރަމްޕު ކުރިން ވަނީ ފާޅުކުރައްވައިފަ އެވެ.
މޮރިޝަސް އަށް ޗާގޯސް ދޭން މިދިޔަ އަހަރު މެއި މަހު ސޮއިކުރި އެއްބަސްވުން ތަންފީޒުކުރުމާ ބެހޭ ގޮތުން ކުރަންޖެހޭ ކަންކަން އަދި ފުރިހަމައެއް ނުވެ އެވެ. ޗާގޯސް އަކީ މޮރިޝަސްގެ ތަނެއްގެ ގޮތުގައި އިނގިރޭސި ވިލާތުން ގަބޫލުކޮށް ދޫކޮށްލި ނަމަވެސް އެއްބަސްވެފައިވަނީ ޑިއެގޯ ގާސިއާ 99 އަހަރަށް އިނގިރޭސި ވިލާތަށް ކުއްޔަށް ދޭށެވެ.