އީރާނަށް އެމެރިކާ އާއި އިޒްރޭލުން ދެމުން ގެންދާ ހަމަލާތަކާ ގުޅޭ ގޮތުން އީރާނުން މަޝްވަރާއަށް އެދެމުންދާ ކަމަށް ބުނާ ވާހަކަ އަކީ ދޮގެއް ކަމަށާއި އެމެރިކާއާ އެކު މަޝްވަރާ ނުކުރާނެ ކަމަށް އީރާންގެ ބާރުގަދަ ގައުމީ ސަލާމަތާ ބެހޭ ކައުންސިލްގެ ވެރިޔާ އަލީ ލަރިޖާނީ މިއަދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި އޭނާ މިހެން ވިދާޅުވީ އީރާނުން މަޝްވަރާ ބޭނުންވާ ކަމަށާއި އެކަމަށް އީރާނުން އިސްވެ އެދުމުން އެމެރިކާއިން ވެސް މަޝްވަރާއަށް އެއްބަސްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕު ވިދާޅުވެފައި ވަނިކޮށެވެ.
ވޯލް ސްޓްރީޓް ޖާނަލް އިން ރިޕޯޓްކޮށްފައިވާ ގޮތުގައި އެމެރިކާ އާއި އިޒްރޭލުގެ ހަމަލާތަކުގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން ލަރިޖާނީ ވަނީ އެންމެ ފަހުން މަޝްވަރާތަކުގެ މެދުވެރިއަކަށްވި އޮމާން މެދުވެރިކޮށް އަލުން މަޝްވަރާތައް ފެށުމަށް މަސައްކަތް ކުރައްވައިފަ އެވެ.
ނަމަވެސް މި ވާހަކަ ދޮގުކުރައްވަމުން ލަރިޖާނީ ވިދާޅުވީ މުޅި ސަރަހައްދު ހައިޖާނެއްގެ ތެރެއަށް ވެއްޓިފައިވަނީ ޓްރަމްޕުގެ މޮޔަ، ހިޔާލީ ވިސްނުމުގެ ސަބަބުން ކަމަށެވެ.
"ހައިޖާނެއްގެ ތެރެއަށް މުޅި ސަރަހައްދު ވައްޓާލީ ޓްރަމްޕު އޭނާގެ މޮޔަ ހިޔާލީ ހުވަފެންތަކުން. އަދި އެމެރިކާ ސިފައިން އަދިވެސް އިތުރަށް މަރުވުމުގެ ބިރު އޮންނާނެ،" ލަރިޖާނީ ވިދާޅުވި އެވެ.
އޭނާ ވިދާޅުވީ "އެމެރިކާ ފަސްޓް" ކަމަށް ޓްރަމްޕު ވިދާޅުވި ނަމަވެސް ޓްރަމްޕުގެ ސިޔާސަތަކީ "އިޒްރޭލު ފަސްޓް" ކަމަށް ހަދާފައިވާ ކަމަށެވެ. އީރާނުން ދިފާއު ކުރިއަށް ގެންދާނެ ކަމަށާއި ޓްރަމްޕުގެ ސިޔާސަތުގެ އަގު އަދާކުރަން ޖެހޭނީ އެމެރިކާ ސިފައިންނާއި އެ މީހުންގެ އާއިލާތަކުން ކަމަށް ވެސް ވިދާޅުވި އެވެ.
އީރާނަށް ދެމުން ގެންދާ ހަމަލާތަކުގެ ރައްދުގައި އެ ގައުމުން ދަނީ އިޒްރޭލާއި އެމެރިކާގެ މަސްލަހަތު ހިމެނޭ ތަންތަނަށް ހަމަލާ ދެމުންނެވެ. ގަލްފުގެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް އެތައް ހަމަލާއެއް ދީފައި ވާއިރު އަދިވެސް ގެންދަނީ ހަމަލާ ދެމުންނެވެ.
އީރާނަށް ދިން ހަމަލާތަކުގައި 200 އަށް ވުރެ ގިނަ މީހުން މަރުވެފައި ވާއިރު އިޒްރޭލަށް އީރާނުން ދިން ހަމަލާތަކުގައި ވެސް ނުވަ ވަރަކަށް މީހުން މަރުވެފައިވާ ކަމަށް ރިޕޯޓްކޮށްފައިވެ އެވެ. އަދި މި ހަމަލާތަކާ ގުޅިގެން ވައިގެ ދަތުރުތަކާއި ކަނޑު ދަތުރުތަކަށް ވެސް ބުރޫ އަރައި އަދި ހުއްޓުމަކަށް އައިސް މުޅި ދުނިޔެއަށް ވަނީ ހާސްކަން ކުރިމަތިވެފަ އެވެ.