ލުބުނާނަށް ހަމަލާ ދިނުން މެދުކަނޑާލުމާ އެކު އީރާނުން ހުޅުވާލި ހޯރްމޫޒް ކަނޑުއޮޅި އަލުން ބަންދުކޮށްފައިވާ ކަމަށާއި 24 ގަޑިއިރު ނުވަނީސް ކަނޑުއޮޅި އަލުން ބަންދުކުރީ އީރާންގެ ބަނދަރުތަކަށް ވަދެނުކުތުމަށް އެމެރިކާއިން އަޅާފައިވާ ފިޔަވަޅުތައް އުވާނުލާތީ ކަމަށް އީރާންގެ އަސްކަރިއްޔާއިން މިއަދު ބުނެފި އެވެ.
ކަނޑުއޮޅިއާ ހުޅުވާލުމާ އެކު އައި ބަދަލުތަކުގެ ސަބަބުން، އީރާނާ ދެކޮޅު ހަނގުރާމަ ނިންމުމަށް ސުލްހައިގެ އެއްބަސްވުމަކާ "ވަރަށް ގާތްވެފައިވާ" ކަމަށް އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ވަނީ ވިދާޅުވެފަ އެވެ. ނަމަވެސް އީރާނުން ކަނޑުއޮޅި އަލުން ބަންދުކުރުމުން މިހާރު ވަނީ އަނެއްކާވެސް އުވާލު އުފެދިފަ އެވެ.
ދުނިޔޭގެ ތެލާއި ލިކުއިފައިޑް ނެޗުރަލް ގޭހުގެ ފަސްބައިކުޅަ އެއްބަސް އުފުލާ މި ކަނޑުއޮޅި، ލުބުނާނުގައި ހަނގުރާމަ މެދުކަނޑާލުމުގެ އެއްބަސްވުމަކަށް އައުމާ އެކު ހުޅުވާލިކަން އީރާނުން އިއުލާނުކުރި އިއްޔެ އެވެ.
އެ އިއުލާނާ އެކު ދުނިޔޭގެ ބާޒާރުތަކަށް ހަމަޖެހުން ލިބި ތެލުގެ އަގު ވަރަށް ބޮޑަށް ދަށަށް ދިޔަ އެވެ. ނަމަވެސް، އެއްބަސްވުމަކާ ހަމައަށް ނުދެވެނީސް އެމެރިކާގެ ނޭވަލް ބްލޮކޭޑް ދަމަހައްޓާނެ ކަމަށް ޓްރަމްޕް ވިދާޅުވުމުން، ކަނޑުއޮޅި އަލުން ބަންދުކުރާނެ ކަމުގެ އިންޒާރު އީރާނުން ދިނެވެ.
އެކަމަކު އީރާނުގެ އަސްކަރީ ސެންޓްރަލް ކޮމާންޑާ ހަވާލާދީ ދައުލަތުގެ ޓީވީން މިއަދު ބުނީ، "ހޯރްމޫޒް ކަނޑުއޮޅީގެ ކޮންޓްރޯލް އަލުން ކުރީގެ ހާލަތަށް ބަދަލުވެއްޖެ" ކަމަށާއި، އެމެރިކާގެ ބްލޮކޭޑް ކުރިއަށްދާތީ ކަނޑުއޮޅި މިހާރު އޮތީ "އަސްކަރިއްޔާގެ ފުރިހަމަ ބެލުމުގެ ދަށުގައި" ކަމަށެވެ.
މި އިއުލާނު ކުރިއިރު، މެރިޓައިމް ޓްރެކިން ސައިޓުތަކުން ދައްކާ ގޮތުގައި، ބައެއް އުޅަނދުތައް އީރާނުގެ ސަރަހައްދީ ރޮނގާ ކައިރިން ދަތުރުކުރަމުން ދިޔަ އެވެ. އީރާނުން އެންގި ގޮތަށް އަމަލުކުރަމުން ދިޔަ މި އުޅަނދުތަކުގެ ތެރެއިން ބައެއް އުޅަނދުތަކުން، އެއީ އިންޑިއާ ނުވަތަ ޗައިނާގެ އުޅަނދުތަކެއްކަން ކަމަށް އަންގަމުން ދަތުރުކުރި އެވެ. އެއީ ވަކި ފަރާތަކަށް ނުޖެހޭ ގައުމުތަކެއްގެ އުޅަނދުތައް ކަމަށް ދައްކައިދިނުމަށެވެ.
ހަމަ އެ ސައިޓުތަކުން ފެންނަ ގޮތުގައި، ހުކުރު ދުވަހުގެ ރޭގަނޑުގެ ވަގުތެއްގައި ގިނަ އުޅަނދުތަކެއް ކަނޑުއޮޅިއާ ދިމާލަށް ދަތުރުފެށި ނަމަވެސް، މަސްރަހު އޮތްގޮތުން ކުއްލިއަކަށް އެ އުޅަނދުތައް ވަނީ އަނބުރާ ގޮސްފަ އެވެ.
ހޮނިހިރު ދުވަހުގެ 09:00 (ޖީއެމްޓީ) ވީއިރު، ބައެއް އުޅަނދުތައް ވަނީ ކަނޑުއޮޅި ހުރަސްކޮށްފަ އެވެ. ނަމަވެސް، ޔޫއޭއީގެ ބަނދަރުތަކުން ތެޔޮ ބަރުކޮށްގެން އިންޑިއާއަށް ދަތުރުކުރަމުން ދިޔަ މަދުވެގެން ދެ ޓޭންކަރެއް ވަނީ ދަތުރު ހުއްޓާލައި އަނބުރާ ގޮސްފަ އެވެ.
އަހަރެމެން އެ ހޯދާނަން
ފެބްރުއަރީ 28 ގައި އެމެރިކާ އާއި އިޒްރޭލުން އީރާނާ ދެކޮޅަށް ފެށި ހަނގުރާމައިގައި، ދެ ހަފުތާގެ މުއްދަތަށް ހަމަލާބަދަލުކުރުން ހުއްޓާލުމަށް ކަނޑައެޅި މުއްދަތު ހަމަވާން އޮތީ އެންމެ ހަތަރު ދުވަހެވެ.
ނަމަވެސް، ސުލްހައިގެ އެއްބަސްވުމެއް ވަރަށް އަވަހަށް ގާއިމުކުރެވޭނެ ކަމާ މެދު ރައީސް ޓްރަމްޕް ހުންނެވީ ޔަގީންކަމާއެކުގަ އެވެ. އަދި މަޝްވަރާތަކުގައި މެދުވެރިއެއްގެ ދައުރު އަދާކުރާ ޕާކިސްތާނަށް ތައުރީފުކުރައްވައި ސޯޝަލް މީޑިއާގައި ގިނަ ޕޯސްޓުތަކެއް ކުރެއްވި އެވެ.
ސުލްހައިގެ އެއްބަސްވުމަކަށް އައުމުގެ މަގުސަދުގައި ޕާކިސްތާނުގެ އަސްކަރީ ވެރިޔާ ފީލްޑް މާޝަލް އާސިމް މުނީރު އީރާނަށް ކުރެއްވި ތިން ދުވަހުގެ ދަތުރު ހޮނިހިރު ދުވަހު ވަނީ ނިންމަވާލައްވައިފަ އެވެ. މި ދަތުރުގައި އޭނާ ވަނީ އީރާނުގެ އިސް ލީޑަރުންނާ ބައްދަލުކުރައްވައިފަ އެވެ.
މުނީރު އީރާނުގައި ހުންނެވި ވަގުތު، ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވަނީ ސުލްހައިގެ މަސައްކަތްތައް ކުރިއަށް ގެންދިއުމަށް ސައުދީ އަރަބިއްޔާ، ގަތަރު އަދި ތުރުކީއަށް ދަތުރެއް ކުރައްވައިފަ އެވެ.
އެމެރިކާ އާއި އިޒްރޭލުން ފެށި ހަނގުރާމަ ނިންމާލުމަށް އުންމީދުކޮށްގެން، މަޝްވަރާތަކުގެ ދެވަނަ ބުރު އަންނަ ހަފުތާގައި ޕާކިސްތާނުގެ ވެރިރަށް އިސްލާމްއާބާދުގައި ބާއްވާނެ ކަމަށް ބެލެވެ އެވެ.