ގަތަރުގެ ބޮޑުވަޒީރު ޝައިހް މުހައްމަދު ބިން އަބްދުއްރަހްމާން އީރާންގެ ފޮރިން މިނިސްޓަރު އައްބާސް އަރަޣްޗީއަށް ފޯނުން ގުޅުއްވައި، އީރާނުން އަވަށްޓެރި ގައުމުތަކަށް އަމާޒުކުރާ ރައްދު ހަމަލާތައް ކުށްވެރިކުރައްވައިފި އެވެ.
މިއީ މިދިޔަ ހޮނިހިރު ދުވަހު އެމެރިކާ އާއި އިޒްރޭލުން އީރާނަށް ހަަމަލާދޭން ފެށި ފަހުން އީރާނާ އެކު ގަލްފުގެ ގައުމުތަކުން މިހާތަނަށް އެންމެ މަތީ ފެންވަރުގައި ދެއްކި ވާހަކަތަކެވެ.
ގަތަރުގެ ފޮރިން މިނިސްޓްރީން ނެރުނު ބަޔާނެއްގައި ބުނީ އީރާނުން އަވަށްޓެރިންނަށް ގެއްލުން ދެމުންދާ ކަމަށް ބޮޑުވަޒީރު ތުހުމަތުކުރައްވައި އެކަން ވަރަށް ބޮޑަށް ކުށްވެރިކުރެއްވި އެވެ. އަދި އަވަށްޓެރި ގައުމުތައް އެ މީހުންނާ ގުޅުމެއް ނެތް ހަނގުރާމައެއްގެ ތެރެއަށް ވަންނަން އީރާނުން މަޖުބޫރުކުރުވަމުން ގެންދަވާ ކަމަށް ވިދާޅުވި ކަމުގައި ވެސް ބަޔާނުގައިވެ އެވެ.
ގަލްފުގެ ގައުމުތަކަށް އީރާންގެ ގިނަ ރައްދުތަކެއް އަމާޒުވެފައި ވާއިރު އީރާންގެ މިސައިލެއް އިންޓަސެޕްޓްކުރުމުން ވެއްޓުނު ބައިތަކުން ޖެހި ކުވައިތުން ވަނީ 11 އަހަރުގެ އަންހެން ކުއްޖަކު ވެސް މަރުވެފަ އެވެ.
ހަނގުރާމަ ފެށުނު ފަހުން ގަލްފުގެ ގައުމުތަކުން 13 މީހަކު މަރުވެފައި ވާއިރު އޭގެ ތެރެއިން 11 މީހުންނަކީ އާންމުންނެވެ.
އެމެރިކާގެ ޕެންޓަގަން އިން ވަނީ އެ ގައުމުގެ ސިފައިންގެ ތެރެއިން ހަ މީހަކު މަރުވެފައި ވާއިރު އޭގެ ތެރެއިން ހަތަރު މީހަކު މަރުވީ ކުވައިތުގައި ކަމަށް ބުނެފަ އެވެ.
ގަތަރުގެ ބޮޑުވަޒީރު ވަނީ އީރާނުން އަވަށްޓެރިންނަށް ދޭ ހަމަލާތައް "ވަގުތުން ހުއްޓާލަން" ގޮވާލައްވައިފަ އެވެ. އަދި އީރާނުން ގައުމުތަކުގެ އާންމުންގެ ސަރަހައްދުތަކަށް ވެސް ހަމަލާދެމުންދާ ކަމަށް ވިދާޅުވި އެވެ. އެކަމަކު އަރަޣްޗީ ވިދާޅުވަމުން ގެންދަވަނީ އީރާނުން ހަމަލާދެނީ އެމެރިކާގެ މަސްލަހަތު ހިމެނޭ އަމާޒުތަކަށް ކަމަށެވެ. ނަމަވެސް ގަތަރުން މި ވާހަކަ ގަބޫލެއް ނުކުރެ އެވެ.
"މި ހަމަލާތަކަށް ރައްދެއް ނުދީ ނުނިމޭނެ،" ޝައިޚް މުހައްމަދު ވިދާޅުވި އެވެ.
ޔުނައިޓެޑް އަރަބި އެމިރޭޓްސް އާއި ގަތަރުން ބުނެފައިވާ ގޮތުގައި އެ ގައުމުތަކުން ވަނީ އޮއްސަމުންދާ ޑްރޯނާއި މިސައިލްގެ އެތައް ހަމަލާއެއް އިންޓަސެޕްޓުކޮށްފަ އެވެ. ޔޫއޭއީން ބުނި ގޮތުގައި މިހާތަނަށް ތިން ބެލަސްޓިކް މިސައިލެއް އިންޓަސެޕްޓުކޮށްފައި ވާއިރު 129 ޑްރޯންގެ ތެރެއިން 121 ޑްރޯން އިންޓަސެޕްޓުކުރެވިފައިވެ އެވެ. ގަތަރުން ބުނި ގޮތުގައި 10 ޑްރޯން އިންޓަސެޕްޓުކޮށް ދެ ކްރޫޒް މިސައިލް ވެސް އިންޓަސެޕްޓްކޮށްފައިވެ އެވެ.
ސައުދީ އަރަބިއްޔާގެ ޑިފެންސް މިނިސްޓްރީން ބުނީ ވެރިރަށް ރިޔާޟްގެ ދެކުނުގައި އޮންނަ ސަރަހައްދަކަށް ދެ ކްރޫޒް މިސައިލް ހަމަލާ ދީފައިވާ ކަމަށެވެ. އެއީ ޕްރިންސް ސުލްތާން އެއާ ބޭސް ހުންނަ ހިސާބެވެ. މީގެ އިތުރުން ގަލްފުގެ އައްސޭރިފަށުގައި ހުންނަ ރަސް ތަނޫރާ ރިފައިނަރީއަށް އަމާޒުކޮށް ފޮނުވި ޑްރޯނެއް ހުއްޓުވާފައިވާ ކަމަށް ވެސް ބުންޏެވެ.
އީރާނުން އަވަށްޓެރި ގައުމުތަކަށް ހަމަލާދެމުން ދާއިރު އެމެރިކާ އާއި އިޒްރޭލުން އީރާނަށް ދޭ ހަމަލާތައް ވެސް ހުއްޓުމެއް ނެތި ދަނީ ކުރިއަށެވެ. ހަމަލާތަކުގައި އެ ގައުމުން މަރުވި މީހުންގެ އަދަދު ވަނީ ހާހަކަށް ވުރެ މައްޗަށް ގޮސްފަ އެވެ.