އެމެރިކާ އާއި އިޒްރޭލުން އީރާނަށް ދެމުން ގެންދާ ހަމަލާތައް އިއްޔެ އާއި ރޭ ވެސް ވަރުގަދަކޮށްފައި ވާއިރު ގަލްފުގައިވާ އެމެރިކާގެ އަމާޒުތަކަށް އީރާނުން ދޭ ރައްދު ހަމަލާތަކުގައި، ދުބާއީގައި ހުންނަ އެމެރިކާ ކޮންސިއުލޭޓަށާއި އަލް އުދައިދު އަސްކަރީ މަރުކަޒަށް ހަމަލާ ދީފި އެވެ.
ހަމަލާތަކަށް ހުއްޓުމެއް ނައިސް ދުނިޔެގޭ ބާޒާރުގައި ހަކަތައިގެ އަގުތައް އުފުލެމުން ދާއިރު އެމެރިކާގެ ރައީސް ޑޮނަލްޑް ޓްރަމްޕު ވަނީ ހޮރްމޫޒް ކަނޑުއޮޅިން ޓޭންކަރުތަކަށް އީރާން ސިފައިންގެ ނުރައްކަލެއް ނެތި ދަތުރުކުރެވޭ ގޮތަށް އެސްކޯޓްކޮށްދޭން އެމެރިކާ ތައްޔާރަށް އޮތް ކަމަށް ވެސް ވިދާޅުވެފަ އެވެ.
ނުރައްކާ ބޮޑުވަމުން ދާއިރު ރޭ ދުބާއީގެ އެމެރިކާ ކޮންސިއުލޭޓަށް އީރާނުން ދިން ޑްރޯން ހަމަލާ އާއި މެދުއިރުމަތީގައި ހުންނަ އެމެރިކާގެ އެންމެ ބޮޑު އަސްކަރީ މަރުކަޒު ކަމަށްވާ އަލް އުދައިދު އަސްކަރީ ބޭހަށް ދިން ހަމަލާއިން ވަނީ ނުތަނަވަސްކަން އިތުރުވެފަ އެވެ. ގަތަރުން ބުނީ ކޮންސިއުލޭޓަށް ދިން ހަމަލާ އަމާޒުވީ އެތަނުގެ ޕާކިން ޒޯނަކަށް ކަމަށާއި މީހަކަށް އަނިޔާއެއް ނުވާ ކަމަށެވެ.
މި ހަމަލާތައް ދިނީ ސައޫދީގެ ވެރިރަށް ރިޔާޟްގައި ހުންނަ އެމެރިކާ އެމްބަސީ އާއި ކުވައިތުގއި ހުންނަ އެމެރިކާ އެމްބަސީ އަދި ބަހްރެއިންގައި ހުންނަ އެމެރިކާގެ އަސްކަރި މަރުކަޒަށް އީރާނުން ހަމަލާ ދިންތާ އެއް ދުވަސް ފަހުންނެވެ. މި ހަމަލާތަކަށް ފަހު އެމެރިކާއިން ވަނީ ޑިޕްލޮމެޓުން އެ ތަންތަނުން ގެންގޮސްފަ އެވެ.
"އަހަރެމެން ދުޝްމަނުންނަށް ބުނަމުން ދިޔައިން އަހަރެމެންގެ މައި މަރުކަޒުތަކަށް ހަމަލާ ދީފި ނަމަ ސަރަހައްދުގެ އިގްތިސާދީ މަރުކަޒުތަކަށް ހަމަލާ ދޭނެ ކަމަށް،" އީރާންގެ އިންގިލާބީ ލަޝްކަރުގެ ޖެނެރަލް އެބްރާހިމް ޖައްބާރީ ވިދާޅުވި އެވެ.
އީރާނުން ރޭ ވެސް ވަނީ އިޒްރޭލަށް ވެސް އެތައް މިސައިލަކާއި ޑްރޯނެއް ފޮނުވާލައިފަ އެވެ. އެކަމަކު ލިބުނު ގެއްލުންތަކުގެ ތަފްސީލެއް، އިޒްރޭލުން ގެންގުޅޭ މައުލޫމާތު ސިއްރުކުރުމުގެ ހަރުކަށި ސިޔާސަތުތަކާ ހެދި އަދި ކަށަވަރެއް ނުވެ އެވެ.
ސައޫދީ ޑިފެންސް މިނިސްޓްރީން ބުނި ގޮތުގައި މިއަދު ވަނީ އީރާންގެ ދެ ކްރޫޒް މިސައިލެއް ވެސް ސައޫދީގެ ދެކުނު ސަރަހައްދަކުން އިންޓަސެޕްޓްކޮށް ވައްޓާލައިފަ އެވެ. އޭގެ އިތުރުން ސައޫދީގެ ވައިގެ ސަރަހައްދަށް ވަނުމާ އެކު ނުވަ ޑްރޯން ވެސް ވައްޓާލާފައި ވާނެ ކަމަށް ބުންޏެވެ.
އީރާނަށް އެމެރިކާ އާއި އިޒްރޭލުން ހޮނިހިރު ދުވަހު ފުރަތަމަ ދިން ހަމަލާތަކުގައި ރޫހީ ލީޑަރު އާޔަތުﷲ އަލީ ޚާމަނާއީ އާއި އިސް އެތައް ބަޔަކު ވަނީ އަވަހާރަކޮށްލައިފަ އެވެ.
އޭގެ ފަހުން ޓްރަމްޕު ވިދާޅުވަމުން ގެންދަވަނީ އީރާނުން މިހާރު ވާހަކަ ދައްކަން ބޭނުންވާ ކަމަށާއި އެކަމަކު މިހާރު މާބޮޑަށް ލަސްވެއްޖެ ކަމަށެވެ. ނަމަވެސް އީރާނުން ވަނީ އެ ގައުމުން ވާހަކަ ދައްކަން ހުށަހަޅާފައި ނުވާނެ ކަމަށާއި ވާހަކަ ނުވެސް ދައްކާނެ ކަމަށް ބުނެފަ އެވެ.
އީރާނަށް ހަމަލާ ދެމުން ދާއިރު އިޒްރޭލުން ވަނީ ލުބްނާނަށް ވެސް އަލުން ހަމަލާދޭން ފަށައިފަ އެވެ.
ހަނގުރާމަ ދިގުލައިގެން ހިނގައިދާނެ ކަމަށް ބެލެވޭއިރު އެކި ގައުމުތަކުން މިހާރު ގެންދަނީ މިކަން ވީހާވެސް އަވަހަށް ނިމުމަކަށް ގެނެވޭނެ ގޮތެއް ހޯދަން ގޮވާލަމުންނެވެ. ހަަމަލާތަކުގައި އީރާނުން މަރުވި އަދަދު މިހާރު ވަނީ 800 އާ ގާތްކޮށްފަ އެވެ.
ޗައިނާގެ ފޮރިން މިނިސްޓަރު ވަންގް ޔީއާ ހަވާލާދީ ޝިންހުއާ ނިއުސް އެޖެންސީން ބުނީ އީރާނަށް ހަމަލާ ދެމުންދާ ނަމަ އިތުރު މައްސަލަތައް އުފެދުން ނޫން ކަމެއް ނުވާނެ ކަމަށެވެ.