ހަމަލާދޭން އީރާނުން މިއަދު އައި ދެ ޖެޓް ވައްޓާލާފައި ވާނެ ކަމަށް ގަތަރުގެ ޑިފެންސް މިނިސްޓްރީން ބުނެފި އެވެ.
ޑިފެންސް މިނިސްޓްރީން ނެރުނު ބަޔާނެއްގައި މިހެން ބުނެފައިވަނީ ގަތަރުގެ ދެ ގޭސް ފެސިލިޓީއަކަށް ވެސް އީރާނުން ހަމަލާދޭން މަސައްކަތްކުރި ކަމަށް ބުނެފައި ވަނިކޮށެވެ.
"ގަތަރް އަމީރީ އެއާފޯސް އިން ކާމިޔާބުކަމާ އެކު ވަނީ އީރާނުން އައި ދެ (އެސްޔޫ24) އެއާކްރާފްޓަށް ހަމަލާދީ ވައްޓާލާފައި. އަދި ގަތަރް އަމީރީ އެއާފޯސް އާއި ގަތަރް އަމީރީ ނޭވީ ފޯސަސްގެ އެއާ ޑިފެންސުން ވަނީ ހަތް ބެލަސްޓިކް މިސައިލާއި ފަސް ޑްރޯން އެކި ސަރަހައްދުތަކުން މިއަދު އިންޓަސެޕްޓުކޮށްފައި،" ޑިފެންސް މިނިސްޓްރީން ބުންޏެވެ.
އެކަމަކު ވައްޓާލި ކަމަށް ބުނާ ދެ އެއާކްރާފްޓުގެ ޕައިލެޓުންނަށްވީ ގޮަތަކާ މެދު އެ ބަޔާނުގައި އެއްޗެއް ބުނެފައެއް ނުވެ އެވެ.
މިއީ އީރާނަށް އިޒްރޭލާއި އެމެރިކާއިން ދޭން ފެށި ހަމަލާތަކުގެ ރައްދުގައި އީރާނުން ދެމުން ގެންދާ ހަމަލާތަކުގައި މި ވީ ތިން ދުވަސް ތެރޭ ގަލްފުގެ ގައުމަކުން އީރާންގެ ޕައިލެޓުން ތިބި އެއާކްރާފްޓަކާ ކުރިމަތިލި ކަމަށް ބުނި ފުރަތަމަ ފަހަރެވެ.
މި ހާދިސާތަކަށް ފަހު ގަތަރުން މިއަދު ވަނީ އެ ގައުމުގެ ދައުލަތުގެ ގޭސް ކުންފުނިން ލިކިއުފައިޑް ނެޗުރަލް ގޭސް (އެލްއެންޖީ) އުފެއްދުން މެދުކަނޑާލާފައިވާ ކަމަށް ބުނެފަ އެވެ. އެއީ ކުންފުނީގެ މައި ދެ ޕްލާންޓަކަށް އީރާންގެ ދެ ހަމަލާއެއް އަމާޒުވުމާ ގުޅިގެންނެވެ.
ގަތަރުގެ ޑިފެންސް މިނިސްޓްރީން ކުރިން ބުނެފައިވާ ގޮތުގައި ގަތަރުގެ އެނާޖީ ކުންފުނީގެ ރަސް ލަފާން އިންޑަސްޓްރިއަލް ސިޓީގައި ހުންނަ ހަކަތަ އުފައްދާ މަރުކަޒަކަށް އީރާނުގެ ޑްރޯން ހަމަލާތައް އަމާޒުވެފައިވާ ކަމަށެވެ.
ގަތަރުގެ ވެރިރަށް ދޯހާއާ ދެކުނުން 40 ކިލޯމީޓަރު (25 މޭލު) ދުރުގައި އޮންނަ ސަރަހައްދެއްގައި ގާއިމުކޮށްފައިވާ، ގޭސް ކާރުހާނާއެއްގެ އިންޖީނުގޭގެ ފެން ޓޭންކަކަށް ވެސް ހަމަލާ ދީފައިވާ ކަމަށް ބުނެފައިވެ އެވެ. -- އޭއެފްޕީ