އެމެރިކާގެ ތިން ފައިޓާ ޖެޓް ކުވައިތަށް ވެއްޓުނީ ކުވައިތުގެ ވައިގެ ދިފާއުން އޮޅިގެން ދިން ހަމަލާއަކުން ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނެފި އެވެ.
ސެންޓްކޮމް އިން ނެރުނު ބަޔާނަކާ ހަވާލާދީ ސީއެންއެން ބުނީ ކުވައިތުގެ ވައިގެ ދިފާއުން އޮޅިގެން ދިން ހަމަލާތަކުގައި ވެއްޓުނީ އެފް-15އީ މަރުކާގެ ސްްޓްރައިކް އީގަލް ފައިޓާ ޖެޓްތަކެއް ކަމަށެވެ. އެ ޖެޓްތަކުގައި ތިބި ހަ މީހުން އިޖެކްޓްކޮށް، ސަލާމަތުން ފޭބި ކަމަށް ވެސް އެ ބަޔާނުގައި ބުންޏެވެ.
އެމެރިކާ އާއި އިޒްރޭލު ގުޅިގެން އީރާނަށް ދެމުން ގެންދާ ހަަމަލާތަކުގައި ބައިވެރިވާ އެ ޖެޓްތައް ވެއްޓުނު ހާދިސާ ތަހުގީގުކުރަމުން އަންނަ ކަމަށް ވެސް ސެންޓްކޮމް އިން ބުންޏެވެ.
އެމެރިކާގެ އެތައް ފައިޓާޖެޓްތަކެއް ވެއްޓިފައިވާ ކަމަށް ކުވައިތުގެ ޑިފެންސް މިނިސްޓްރީން އިއްޔެ ބުނި ނަމަވެސް އެ ޖެޓްތައް ވެއްޓުނު ސަބަބެއް ނުބުނެ އެވެ. ވެއްޓުނީ ސީދާ ކިތައް ޖެޓް ކަމެއް ވެސް ކުވައިތަކުން ނުބުނެ އެވެ.
އެމެރިކާގެ ޖެޓްތައް ވެއްޓުނުކަމަށް އެއްބަސްވެ، ސެންޓްކޮމް އިން ބަޔާން ނެރުނީ އޭގެ ތެރެއިން ޖެޓެއް ވެއްޓޭ މަންޒަރު ފެންނަ ވީޑިއޯއިން އާއްމުވެ، އެ ވީޑިއޯ އަކީ ކޮންތަނެއްގެ މަންޒަރެއްކަން ސީއެންއެން އިން ކަށަވަރުކުރި ފަހުން ކަމަށް އެ އެޖެންސީން ބުންޏެވެ.
"ކްރޫއިންގެ ހަ މީހުން ވެސް ސަލާމަތުން އިޖެކްޓްކުރި، އަދި އެ މީހުން ވަނީ ސަލާމަތްކޮށްފައި. ކުވައިތުން ވަނީ މިހާދިސާ ހިނގިކަން ގަބޫލުކޮށްފައި. މިހާރު ކުރިއަށްދާ އޮޕަރޭޝަނަށް [އީރާނާ ދެކޮޅަށް ކުރާ ހަނގުރާމައަށް] ކުވައިތުގެ ދިފާއީ ބާރުތަކުން އެހީތެރިވާތީ އަހަރެމެން ޝުކުރުވެރިވަން،" ސެންޓްކޮމްގެ ބަޔާނުގައި ބުނި ކަމަށް ނޫސްތަކުން ރިޕޯޓްކޮށްފައިވެ އެވެ.
ކުވައިތުގެ ޑިފެންސް މިނިސްޓްރީގެ ތަރުޖަމާން ކާނަލް ސާއިދު އަލް އަތުވާން ވިދާޅުވީ އެމެރިކާގެ ޖެޓްތައް ވެއްޓުމާ އެކު އެ ޖެޓްތަކުގެ ކްރޫން ހޯދައި ސަލާމަތްކުރަން ކަމާ ބެހޭ އިދާރާތަކުން ވަގުތުން މަސައްކަތް ފެށި ކަމަށެވެ. އެމީހުންގެ ހާލަތު "ސްޓޭބުލް" ކަމަށް ވެސް އޭނާ ވިދާޅުވި އެވެ.
އެމެރިކާގެ ހަނގުރާމަމަތީ މަތިންދާބޯޓްތަކަކީ އެތައް މިލިއަން ޑޮލަރެއްގެ އަގުހުރި އުޅަނދުތަކެއް ކަމަށް ވާއިރު އެއިން އުޅަނދެއް ވެއްޓޭ ކޮންމެ ފަހަރަކު އެގައުމުން އެކަމާ ގުޅޭ ވަރުގަދަ ތަހުގީގެއް ހިންގަ އެވެ.
އެމެރިކާގެ ޖެޓްތައް ވެއްޓިފައި މިވަނީ އީރާނާ ދެކޮޅަށްދޭ ހަަމަލާތައް އެގައުމުން ވަރުގަދަކޮށްފައިވާ ވަގުތެއްގަ އެވެ. އެ ހަނގުރާމަ ފެށުމުގެ ކުރިން އެމެރިކާއިން ވަނީ ގިނަ އަދަދެއްގެ ހަތިޔާރާއި ހަނގުރާމަމަތީ އުޅަނދުތައް މެދުއިރުމައްޗަށް ޖަމާކޮށްފަ އެވެ.
އެމެރިކާއިން ބުނާ ގޮތުގައި އީރާނުގެ ހާހަކަށް ވުރެ ގިނަ އަމާޒުތަކަށް މިހާތަނަށް ބޮންއަޅާފައިވާނެ އެވެ.