އެމެރިކާ އާއި އިޒްރޭލުން އީރާނަށް ދެމުން ގެންދާ ހަމަލާތަކުގެ ބަދަލުހިފުމަށް އީރާނުން ދޭ ރައްދު ހަމަލާތަކުގައި، ސައޫދީ އަރަބިއްޔާގެ ވެރިރަށް ރިޔާޟްގައި ހުންނަ އެމެރިކާގެ އެމްބަސީއަށް ރޭ އީރާނުން ދިން ޑްރޯން ދެ ހަމަލާއެއްގައި އެތަނުގައި އަލިފާނުގެ ހާދިސާއެއް ހިނގައިފި އެވެ.
ހޮނިހިރު ދުވަހު އީރާނަށް ހަމަލާ ދިނުމާ އެކު އެ ގައުމުން ގަލްފުގެ ގައުމުތަކުގައިވާ އެމެރިކާގެ ތަންތަނަށް ހަމަލާ ދެމުން ދާއިރު އާންމުން އުޅޭ ހިސާބުތަކާއި މަދަނީ އެއާޕޯޓްތަކަށް ވެސް ހަމަލާތައް އަމާޒުވެފައިވެ އެވެ.
"ރިޔާޟްގައި ހުންނަ އެމެރިކާ އެމްބަސީއަށް ދެ ޑްރޯނުން ހަމަލާ ދީފައިވާ ކަމަށް މިހާތަނަށް ވަނީ ބެލެވިފައި. ހަމަލާގެ ސަބަބުން ކޮންމެވެސް ވަރަކަށް އަލިފާން ރޯވެ އިމާރާތަށް ކުދި ގެއްލުންތަކެއްވި،" ހާދިސާއާ ބެހޭ ގޮތުން ނެރުނު ބަޔާނުގައި ބުނެފައިވެ އެވެ.
އެމެރިކާ އެމްބަސީން ވަނީ މި ހާދިސާ ހިނގިކަން ކަށަވަރުކޮށްދީ އެމްބަސީ ވަގުތީ ގޮތުން ބަންދުކޮށްފަ އެވެ.
މަންޒަރު ދުށް ދެ މީހަކު އޭއެފްޕީއަށް ބުނި ގޮތުގައި އެމްބަސީ ބޭރުގައި، އަލިފާން ނިއްވާ ދެ ވެހިކަލް އޮއްވައި ފެނުނެވެ.
މަންޒަރު ދުށް މީހުން ކުރިން ބުނި ގޮތުގައި ސައުދީ ވެރިރަށް ސައޫދީގައި، ބޭރުގެ އެމްބަސީތައް ހުންނަ ޑިޕްލޮމެޓިކް ކްއާޓާއާ ދިމާލުން ބާރުގަދަ އަޑެއް އިވުމަށް ފަހު އެ ދިމާލުން ދުން އަރާތީ ވެސް ފެނިފައިވެ އެވެ.
ސައޫދީ ސިފައިންގެއިން އޭއެފްޕީއަށް މައުލޫމާތު ދިން މީހަކު ނަން ސިއްރުކޮށްދިނުމަށް އެދި ބުނީ ޑިޕްލޮމެޓުން ތިބޭ ސަރަހައްދަށް ހަތަރު ޑްރޯނެއް އައި ކަމަށާއި އެ ޑްރޯންތައް އިންޓަސެޕްޓުކޮށްފައިވާ ކަމަށެވެ.
ސައުދީގެ ޑިފެންސް މިނިސްޓްރީން މިއަދު ބުނީ ވެރިރަށް ރިޔާޟާއި އަލް ޚަރްޖް ސިޓީ ކައިރިން އަށް ޑްރޯން އިންޓަސެޕްޓުކޮށް ވައްޓާލާފައިވާ ކަމަށެވެ.
ސައޫދީގެ އިތުރުން ޔޫއޭއީއަށް ވެސް އެތައް ހަމަލާއެއް އީރާނުން ދެމުން ދާއިރު އެ ހަމަލާތައް ހުއްޓުވަން މަސައްކަތްކުރަމުން އަންނަ ކަމަށް ވަނީ ބުނެފަ އެވެ. އަދި ކުވައިތުގައި ހުންނަ އެމެރިކާގެ އެކި ތަންތަނަށް ވެސް ދަނީ ހަމަލާ ދެމުންނެވެ. -- އޭއެފްޕީ