މިހާރު ހިނގަމުންދާ އީރާން-އިޒްރޭލު އަދި އެމެރިކާގެ ހަނގުރާމައާ ގުޅިގެން ޔޫއޭއީގެ ވައިގެ ސަރަހައްދު ބަންދުކޮށް ފްލައިޓްތައް ކެންސަލްވުމުގެ ސަބަބުން، އިންޑިއާގެ މަޝްހޫރު ބައެއް ފަންނާނުން ދުބާއީ އާއި އަބޫދާބީގައި ތާށިވެއްޖެ އެވެ.
ރިޕޯޓްތައް ބުނި ގޮތުގައި، އޭގެ ތެރޭގައި ބޮލީވުޑްގެ ބައެއް އެކްޓަރުންނާއި އިންޑިއާގެ ކުޅިވަރު ތަރިން ވެސް ހިމެނެ އެވެ.
ރެސިޑެންޓް ވިސާގައި ދުބާއީގައި ދިރިއުޅޭ ބޮލީވުޑްގެ ތަރި ވިވެކް އޮބެރޯއީ އިއްޔެ އެކްސްގައި ކުރި ޕޯސްޓެއްގައި ވަނީ ދުބާއީގައި ތިބި އޭނާގެ އާއިލާގެ މީހުން ސަރުކާރުން ދޭ އިރުޝާދުތަކާ އެއްގޮތަށް ގޭގައި މަޑުކުރުމަށް އެދިފަ އެވެ. އަދި ހާލަތާ ބެހޭ ގޮތުން ދޮގު ޚަބަރު ނުފެތުރުމަށާއި ބިރުވެރިކަން އުފެދޭ ފަދަ ވާހަކަތައް ނުދެއްކުމަށް އޭނާ އެދުނެވެ.
ޔޫއޭއީގެ ސަރުކާރާއި ސަލާމަތީ ބާރުތަކުން ރައްޔިތުންގެ ރައްކާތެރި ކަމަށް ކުރާ މަސައްކަތަށް ވިވެކް ވަނީ ވަރަށް ބޮޑަށް ތައުރީފު ވެސް ކޮށްފަ އެވެ.
ބޮލީވުޑްގެ އެކްޓްރެސް ސޯނަލް ޗޯހަން ވަނީ އޭނާ ދުބާއީގައި ތާށިވެފައިވާކަން ހާމަކޮށް، އެނބުރި ގައުމަށް ދެވޭނެ މަގެއް ހޯދައިދޭން އިންޑިއާގެ ބޮޑުވަޒީރު ނަރެންދުރަ މޯދީގެ ފަރާތުން އެދިފަ އެވެ. ނަމަވެސް ފަހުން އޭނާ ބުނެފައި ވަނީ އޭނާ ހުރީ ސަލާމަތުން ކަމަށާއި ދުބާއީގެ ކަމާ ބެހޭ ފަރާތްތަކުން ކަންކަން ބަލަހައްޓަމުން ގެންދާ ކަމަށެވެ.
ތަމަޅަ ސުޕަސްޓާރު އަޖިތު ކުމާރު އަބޫދާބީގައި ހުރީ ރޭސިން ޓްރެއިނިންއަކަށް ގޮހެވެ. ފްލައިޓްތައް މެދުކަނޑާލުމުގެ ސަބަބުން އޭނާއަށް ޗެންނާއީއަށް އެނބުރި ނުދެވި ވަނީ މަޑުކުރަން ޖެހިފަ އެވެ.
ބޮލީވުޑްގެ އެކްޓްރެސް އަދި މޮޑެލް އީޝާ ގުޕްތާ ވެސް ހުރީ އަބޫދާބީގަ އެވެ. އޭނާ ސޯޝަލް މީޑިއާގައި ބުނެފައި ވަނީ ވަރަށް ބިރުން ހުރި ކަމަށާއި، ނަމަވެސް ޔޫއޭއީގެ ކަމާ ބެހޭ ފަރާތްތަކުން ދެމުން އަންނަ ރައްކާތެރި ކަމަށް އިތުބާރު ކުރާ ކަމަށެވެ.
އިންޑިއާގެ މަޝްހޫރު ބެޑްމިންޓަން ތަރި ޕީވީ ސިންދޫ ތާށިވީ ދުބާއީ އެއާޕޯޓުގަ އެވެ. އޭނާ ކިޔައިދިން ގޮތުގައި އެއާޕޯޓަށް އަމާޒުވި ހަމަލާތަކާ އެކު ބާރު އަޑުތަކެއް އިވުމުގެ ސަބަބުން ވަރަށް ބިރުގަތް ކަމަށެވެ.
ތެލުގޫ އެކްޓަރު ވިޝްނޫ މަންޗޫ ވަނީ ދުބާއީގެ އުޑުމަތިން މިސައިލްތައް ދަތުރުކުރާ މަންޒަރު ފެންނަ ވީޑިއޯއެއް ހިއްސާކޮށްފަ އެވެ. އޭނާ ބުނި ގޮތުގައި، އެ ބާރު އަޑުތަކުގެ ސަބަބުން އޭނާގެ ދަރިފުޅު ވެސް ވަރަށް ބިރުގަތެވެ.
ކައިވެނިކޮށްގެން މިދިޔަ އަހަރު ދުބާއީ އަށް ދިރިއުޅުން ބަދަލުކުރި ބޮލީވުޑްގެ އެކްޓްރެސް ނަރްގިސް ފަޚްރީ ބުނީ ހަމަލާތަކުގެ އަޑުތަކުގެ ސަބަބުން ނިދި ނުލިބި، ވަރަށް ބޮޑު ނުތަނަވަސް ކަމެއްގައި އުޅެން ޖެހުނު ކަމަށެވެ.
ދުބާއީގައި ދިރިއުޅޭ އިންޑިއާގެ ޓީވީ އެކްޓްރެސް އެރިކާ ފެނާންޑޭޒް ބުނީ މިސައިލްތައް ހުއްޓުވާ ނުވަތަ އިންޓަސެޕްޓު ކުރާ އަޑުތަކަކީ ވަރަށް "ބާރު އަދި ބިރުވެރި" އަޑުތަކެއް ކަމަށެވެ.
ޕަންޖާބީ ލަވަކިޔުންތެރިޔާ އަމީ ބުނީ އޭނާގެ އަންހެނުންނާއި ހަ އަހަރުގެ ދަރިފުޅު ދުބާއީގައި ތާށިވެފައި ވާތީ ވަރަށް ބޮޑަށް ކަންބޮޑުވާ ކަމަށެވެ.
ހަމަލާތަކާ ގުޅިގެން އެއާ އިންޑިއާ، އިންޑިގޯ އަދި އެމިރޭޓްސް އިން ވަނީ ދެ ދުވަސް ވަންދެން ދަތުރުތައް މެދުކަނޑާލުމަށް ފަހު މަދު ފްލައިޓްތަކެއް އޮޕަރޭޓްކުރަން އިއްޔެ ފަށައިފަ އެވެ. އަދި އިންޑިއާ ސަރުކާރުން އަންނަނީ ސައުދި އަރަބިއްޔާ ޖިއްދާ ފަދަ ސިޓީތަކަށް "ރިލީފް ފްލައިޓްތައް" ބާއްވައިގެން މީހުން ގެނައުމުގެ މަސައްކަތް ކުރަމުންނެވެ.