މާލޭގައި ވަރަށް ކުދިކުދި ތަންތަނުގައި ދިރިއުޅެމުންދާތީ، އެ މީހުންނަށް ލުޔެއް ހޯދައިދިނުމުގެ މަސައްކަތް ސަރުކާރުން ކުރަމުން އަންނަ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.
ނޫސްވެރިންނާ ބައްދަލުކުރައްވައި، މިނިސްޓަރު ވިދާޅުވީ މާލެ އަށް ނިސްބަތްވާ އާއިލާތަކުގެ ތެރެއިން އެކި ސަބަބުތަކާ ހެދި ގޯތި ނުހެދި އަދި ގޯތި ބައިބައިކުރަން ޖެހުމާއި އެ ކުޑަ ތަންތަންކޮޅުގައި މީހުން އުޅެމުންދާ ހާލަތު ރައީސް ޑރ. މުހައްމަދު މުއިއްޒު މާލޭގެ ގޭގެ އަށް ކުރައްވާ ޒިޔާރާތްތަކުގައި ފެނިވަޑައިގަންފައިވާ ކަމަށެވެ.
މިނިސްޓަރު މުއްތަލިބު ވިދާޅުވީ އެއީ މާލޭގައި ބިމުގެ ދަތިކަމުގެ މައްސަލަ އަށް ހައްލެއް ނުލިބިފައިވާ އާއިލާތައް ކަމަށާއި އެމީހުންނަކީ ސަރުކާރުގެ ބޯހިޔާވަހިކަމުގެ މަޝްރޫއުތަކުގެ ތެރެއިން ވެސް ހައްލެއް ނުލިބިފައިވާ މީހުން ކަމަށެވެ.
މުއްތަލިބު ވިދާޅުވީ ކުދިކުދި ހަނި ގޯޅިތަކުގެ ތެރެއިން ވަދެގެން ގޮސް، އެ ގެތަކަށް ދެވޭއިރު އެ ތަނުގައި އެއްވެސް ކަހަލަ ވެންޓިލޭޝަނެއް ނުހުންނަ ކަމަށެވެ. އިންސާނުން ދިރިއުޅެން އެކަށީގެންނުވާ ފަދަ ތަންތަން ވެސް މާލޭގައި އެބަ ހުރިކަމަށް ވިދާޅުވި އެވެ.
"އެކަކަށް ވަދެވޭ ވަރުގެ ހަނި ގޯޅިތައް އެބަ ހުރި. އެކަކަށް އަރިއަކަށް ހުރެގެން ވަންނަން ޖެހޭ ފަދަ ހަނި ގޯޅިތައް ވެސް އަޅުގަނޑުމެންނަށް ފެނިފައި އެބަ ހުރި. އެއްވެސް ކަހަލަ ވެންޓިލޭޝަނެއް ނެތް އިންސާނުންނަށް އެކަށީގެންވާ ގޮތެއްގައި ދިރިނޫޅެވޭނެ ތަންތަން ވެސް އެބަ ހުރި،"
އެހެންވެ، ސަރުކާރުގެ ވިސްނުމަކީ އެފަދަ އާއިލާތައް ހޯދައި އެމީހުންނަށް ބޯހިޔާވަހިކަމެއް ހޯދައިނުން ކަމަށް މުއްތަލިބު ވިދާޅުބި އެވެ.
"އެގޮތަށް ހުރި ތަންތަން އައިޑެންޓިފައި ކޮށްފައި އެފަރާތްތައް އެއަށް ވުރެ ހާލަތު ރަނގަޅު ކުރެވޭނެ ގޮތަކަށް ކަންކަން ކުރިއަށް ގެންދިއުން. މާނައަކީ ވަކި އުސޫލެއް ހަދައިގެން އެޕްލައިކުރުވުމުގެ ބަދަލުގައި އެފަދަ ތަންތަން ފާހަގަކޮށް، އެފަދަ ގޮތަކަށް ނިކަމެތިކޮށް ތިބި އާއިލާތައް ޑޮކިއުމަންޓްކޮށް އެ އާއިލާތައް ތިބި ހާލަތު ނެރުން،"
އެފަދަ ނިިކަމެތި ހާލަތުގައި އުޅެން ޖެހުމުން ނިކުންނަ އިޖުތިމާއީ މައްސަލަތައް ވެސް ގިނަ ކަމަށާއި އެހެންވެ އެމީހުން މިހާރު އުޅެމުންދާ ހާލަތަށް ވުރެ ރަނގަޅު ތަނަކަށް ބަދަލުކުރުމަށް މަސައްކަތް ކުރައްވާނެ ކަމަށް މުއްތަލިބު ވިދާޅުވި އެވެ.
މީގެ ކުރިން ކުރިއަށް ގެންދިޔަ ބޯހިޔާވަހިކަމުގެ މަޝްރޫއުތަކުގައި ވެސް ހައްލެއް ނުލިބި ތިބި އެމީހުންނަށް ބޯހިޔާވަހިކަން ހާއްސަކޮށްގެން ނޫން ގޮތަކަށް އެކަމަށް ހައްލެއް ނުގެނެވޭނެ ކަމަށް ވިދާޅުވި އެވެ.