ކުއްޔަށް ދިނުން ބޮޑުވެފައިވާ ހިޔާ ފްލެޓުތަކާއި ހުޅުމާލޭގެ އެހެން ފްލެޓުތައް ކުއްޔަށް ދޭ މައްްސަލަ ހުއްޓުވުމަށް ގާނޫނަށް އިސްލާހު ގެނައުމުގެ މަސައްކަތް ކުރަމުން އަންނަ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ އެންމެފަހުން ހުޅުމާލެއިން ހަވާލުކުރި 4،000 ފްލެޓްތައް ދީފައިވަނީ ރެންޓް އޯން މޮޑެލްގެ ދަށުން ކަމަށްވާތީ އެހެންވެ އެތަންތަން ކުއްޔަށް ދޭ މީހުންނަށް ފިޔަވަޅު އަޅަން ފަސޭހަ ކަމަށެވެ.
އެ ފްލެޓުތަކުގެ އެއްބަސްވުމުގައި ވެސް ކުއްޔަށް ދިނުމަކީ މަނާ ކަމެއް ކަމަށް އޮވެ އެވެ.
މިނިސްޓަރު ވިދާޅުވީ ފަހި ދިރިއުޅުން ކޯޕަރޭޝަނުގެ ދަށުން އަޅާފައިވާ އެ ފްލެޓުތައް ކުއްޔަށްދޭކަން ފާހަގަވާނަމަ، އެކަމަށް ފިޔަވަޅު އެޅުމަށް އަންގާފައިވާނެ ކަަމަށެވެ. އެފަދަ މައްސަލައެއް ފާހަގަވުމުން ނޫނީ ރިޕޯޓުކުރުމުން ޖޫރިމަނާ ކުރުމަށްފަހު، ވަކި މުއްދަތެއްގެ ތެރޭގައި އެކަން އިސްލާހު ކުރުމަށް ފުރުސަތު ދެ އެވެ. އެކަމަކު އިސްލާހު ނުކޮށްފިނަމަ، ފްލެޓު އަތުލުމުގެ ބާރު އޮވެ އެވެ.
މުއްތަލިބު ވިދާޅުވީ ހިޔާ ފްލެޓާއި ހުޅުމާލެއިން ދެން ދީފައިވާ އެހެން ފްލެޓުތަކަށް ފިޔަވަޅު އެޅުމުގައި އުނދަގޫތަކެއް އެބަހުރި ކަމަށެވެ. އަދި އެ ތަންތަން ދީފައި ހުރީ ސޭލްސް އެންޑް ޕާޗޭސް މޮޑެލްގެ ދަށުންނެވެ.
މުއްތަލިބު ވިދާޅުވި ގޮތުގައި ހިޔާ ފްލެޓުތަކުގެ އެގްރީމަންޓުގައި ވަނީ އެތަނުގައި ގާނޫނާ ހިލާފް ކަމެއް ނުކުރެވޭނެ ކަމަށެވެ. އެހެންވެ، ގާނޫނުގައި ކުއްޔަށް ދިނުމަކީ މަނާ ކަމެއްގެ ގޮތުގައި ކަނޑައަޅަން ގާނޫނު އިސްލާހުކުރަން ނިންމާފައިވާ ކަމަށް މުއްތަލިބު ވިދާޅުވި އެވެ.
ހިޔާ ފްލެޓާއި ދެން ހުރި ފްލެޓުތަކުގައި އުނދަގޫތަކެއް އެބަ ހުއްޓޭ، ގާނޫނަށް ބަދަލުތަކެއް ގެނައުމުގެ މަސައްކަތް ކުރިއަށް އެބަ ގެންދެއޭ. އެއީ އެތަންތަނަކީ ސޭލްސް ޕާޗޭސް އެގްރީމަންޓެއްގެ ދަށުން ދީފައި ހުރި ތަންތަން. ހިޔާ ފްލެޓުގެ އެގްރީމަންޓުގައި ވެސް މިސާލަކަށް މި އިންނަނީ އޭރު ގާނޫނުގައި ކަނޑައަޅާފައިވާ މަނާ ކަމެއް ނުކުރެވޭނެއޭ. އެހެންވެ ގާނޫނުގައި އަޅުގަނޑުމެން ކަނޑައަޅަން މިއުޅެނީ ކުއްޔަށް ދިނުމަކީ މަނާކަމެކޭ.
މިނިސްޓަރު ވިދާޅުވީ ފްލެޓު ކުއްޔަށް ދިނުމަކީ ސޯޝަލް ހައުސިން ސްކީމު ހިންގާ މަގްސަދާއި އުސޫލުތަކާއި ސިޔާސަތުތަކަށް ބަލާއިރު ކުރެވޭނެ ކަމެއް ނޫން ކަމަށެވެ.
މުއްތަލިބު ވިދާޅުވީ ހިޔާ ފްލެޓުގައި ހިންގާ ލޭބާ ކުއާޓާތައް ހުއްޓުވުމަށް ނޯޓިސްދީ، އެފަދަ ތަންތަން ހުސްކުރަމުން ވެސް އަންނަ ކަމަށެވެ.
ގާނޫނަށް އިސްލާހު ގެނެސްގެން ހިޔާ ފްލެޓުތައް ކުއްޔަށް ދިނުން ހުއްޓުވުމަށް ސަރުކާރުން މަސައްކަތް ފެށިއިރު، ގާތްގަނޑަކަށް 4000ރ. އަށް ކުލި ކުޑަކޮށްދީފައިވާ އެ ފްލެޓުތައް 20،000ރ. އަށް ކުއްޔަށް ދޫކުރަމުންދާ މައްސަލަ ބޮޑެވެ.