ފްލެޓާއި ގޯއްޗަށް އެދުމަށް ޑްރާފްޓުގައިވާ ފޯމުތަކާއެކު 18،036 މީހަކު ފޯމް ހުށަހަޅާފައިވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ޕްރެސް ކޮންފަރެންސްގައި މިނިސްޓަރު ވަނީ ފްލެޓާއި ގޯއްޗަށް އެދި ކުރިމަތިލާފައިވާ އަދަދުތައް ހާމަކުރައްވައިފަ އެވެ.
ފޯމުގެ އަދަދުތައް:
- ބިމަށް އެދި 2،513 ފޯމު ސަބްމިޓްކޮށްފައިވޭ. 2851 ފޯމު ޑްރާފްޓްގައި
- ފްލެޓަށް އެދި 3396 ފޯމު ހުށަހަޅާފައިވާއިރު، ޑްރާފްޓުގައި 8466 ފޯމް އެބައޮތް
- • ވެށިފަހި މާލެ އާއި ހިޔާ މަޝްރޫއުން ފުލެޓް ލިބޭނެކަމުގެ ލިޔުން ލިބި، ފުލެޓް ލިބިފައިވާނުވާ މީހުންނަށް ހާއްސަ ކެޓަގަރީއަށް 953 ފޯމު ހުށަހަޅާފައިވޭ. އަދި ޑްރާފްޓުގައި 220 ފޯމު
މިދިޔަ ޖެނުއަރީ މަހުގެ 18 ވަނަ ދުވަހު ހުޅުވާލި "އާއިލީ ބޯހިޔާވަހިކަން" ޕްރޮގްރާމްގެ ދަށުން 7،900 ފްލެޓާއި 1،250 އަކަފޫޓުގެ ޖުމްލަ 15،000 ގޯތި ދޫކުރާނެ އެވެ.
ފްލެޓަށް ކުރިމަތިލުމުގެ ފުރުސަތު ކުރިން ދީފައިވަނީ އަންނަ އޭޕްރީލް މަހުގެ 17 ވަނަ ދުވަހާ ހަމައަށެވެ. އަދި ގޯއްޗަށް އެދުމުގެ ފުރުސަތު ދިނީ އަންނަ މަހުގެ ހަތަރު ވަނަ ދުވަހުގެ ނިޔަލަށެވެ. އެކަމަކު އެ މުއްދަތު މިހާރު ވަނީ އަންނަ މަހުގެ 30 ގެ ނިޔަލަށް އިތުރުކޮށްފަ އެވެ.
ފްލެޓް ދޭން ސަރުކާރުން ކަނޑައަޅާފައިވަނީ މާލޭގެ ރަށްވެހިންނަށް 4،000 ފްލެޓާއި މާލޭގައި ދިރިއުޅެމުން އެހެން ރަށްރަށުގެ މީހުންނަށް 1،500 ފްލެޓުގެ އިތުރުން ހާއްސަ ކެޓަގަރީތަކަށް ކަނޑައަޅާފައިވާ 2،400 ފްލެޓެވެ.
ބޯހިޔާވަހިކަމަށް ހައްލެއް ހޯދަން މިހާރު ހިއްކަމުން އަންނަ ރަސްމާލެއިން 25،000 ގޯތި ދޫކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވެ އެވެ. އެކަމަކު ފުރަތަމަ ބުރުގައި އެތަނުން ދޫކުރަނީ 15،000 ގޯއްޗެވެ.