އަންނަ މަހު ބާއްވާ އިންތިހާބުގައި މޮނިޓަރުންނާއި އޮބްޒާވަރުންނަށް ވުމަށް އިތުރު ފުރުސަތު ދީފި އެވެ.
އިލެކްޝަންސް ކޮމިޝަން (އީސީ) އިން ބުނީ ލޯކަލް ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީ އަދި ރައްޔިތުންގެ ހިޔާލު ހޯދުމުގެ އާންމު ވޯޓުގައި މޮނިޓަރުންނާއި އޮބްޒާވަރަކަށް ވުމަށް މާދަމާގެ މެންދުރު ފަހު 3:00 އާ ހަމައަށް ފޯމު ހުށަހެޅޭނެ ކަމަށެވެ.
އެ ފުރުސަތަށް އެދުމަށް އެންމެ ފުރަތަމަ ހުޅުވާލީ މިދިޔަ މަހުގެ ނުވަ ވަނަ ދުވަހެވެ. އެ މުއްދަތު ދިނީ މިދިޔަ ހޮނިހިރު ދުވަހާ ހަމައަށެވެ. ނަމަވެސް، ގިނަ ބަޔަކަށް ފުރުސަތު ދިނުމަށް އިތުރު މުއްދަތެއް ދިނީ އެވެ.
މި އިންތިހާބުގައި މޮނިޓަރަކަށް ވުމަށް އެދޭ ފަރާތްތަކުގެ ފޯމު އީސީއަށް ހުށަހަޅާނީ، ނޫސް މަޖައްލާތަކަށާއި ޚަބަރު ފަތުރާ އިދާރާތަކަށް ކަނޑައަޅާ ޑޭޓާ ލިއޭޒަނެއް މެދުވެރިކޮށް ކޮމިޝަނުގެ މައި ޕޯޓަލް my.elections.gov.mv އިންނެވެ.
މިގޮތުން، "މޮނިޓަރުންގެ މައުލޫމާތު ހުށަހެޅުމަށްޓަކައި ޑޭޓާ ލިއޭޒަންއަކަށް ވުމަށް އެދޭ ފޯމު" ފުރިހަމަކޮށް [email protected] އަށް އީ-މެއިލްކުރަންވާނެކަމަށް އީސީން ބުނެފައިވެ އެވެ.
ކޮމިޝަނުން ބުނީ ރަޖިސްޓަރީ ކޮށްފައިވާ ނޫސް މަޖައްލާ އަދި ހަބަރު ފަތުރާ އިދާރާތަކަށް މޮނިޓާކުރުމަށް ފާސް ދޫކުރާނީ، އެއިން ކޮންމެ ތަނަކަށް، ވޯޓުލާ އަދި ވޯޓުގުނާ ކޮންމެ ސަރަހައްދަކަށް އެކަކަށްވުރެ އިތުރުނުވާ ގޮތަށް ކަމަށެވެ.
އޭގެ އިތުރުން، ވޯޓުލާ މަރުކަޒުގައި ކޮންމެ ހައިސިއްޔަތަކުން އެއްފަހަރާ ހަރަކާތްތެރިވެވޭނީ އެންމެ މޮނީޓަރަކަށް ކަމަށް ވެސް ބުންޏެވެ.
ވޯޓު ނެގުމާއި ވޯޓު ގުނާއިރު އޮބްޒާވްކުރަން ސިޔާސީ ޕާޓީތަކަށާއި ޖަމާއަތްތަކަށް ދޫކުރާނީ ކޮންމެ ސިޔާސީ ޕާޓީއަކަށާއި ޖަމިއްޔާއަކާއި އިންތިހާބުގައި ވޯޓުލާން ބަހައްޓާ ވޯޓު ފޮށީގެ އަދަދަށްވުރެ 10 ޕަސެންޓު އިތުރުނުވާ ގޮތަށް ކަމަށެވެ. އަދި ވޯޓުލާ މަރުކަޒުގައި ކޮންމެ ތަނަކުން ވެސް އެއްފަހަރާ ހަރަކާތްތެރިވެވޭނީ އެއް އޮބްޒާވަރަށެވެ.