ކުރިއަށް އޮތް ލޯކަލް ކައުންސިލާއި އަންހެނުންގެ ކޮމިޓީތަކުގެ އިންތިހާބުގައި ވޯޓުލުމަށް މާލެ ސަރަހައްދުގައި 190 އަށް ވުރެ ގިނަ މަރުކަޒު ހަދަން ނިންމައިފި އެވެ.
އިލެކްޝަންސް ކޮމިޝަން (އީސީ) އިން އިއްޔެ ވަނީ ވޯޓުލާ މަރުކަޒުތައް ތައްޔާރުކުރުމުގެ މަސައްކަތް ކޮށްދޭނެ ބަޔަކު ހޯދަން އިއުލާންތައް ކޮށްފަ އެވެ.
އެ އިއުލާންތަކުގައިވާ ގޮތުގައި، މާލެ ސަރަހައްދުގައި 193 މަރުކަޒެއް ހަދާނެ އެވެ. އެއީ؛
- މާލޭގައި 132 މަރުކަޒު
- ހުޅުމާލެ 1 ގައި 34 މަރުކަޒު
- ހުޅުމާލެ 2 ގައި 18 މަރުކަޒު
- ވިލިމާލޭގައި 9 މަރުކަޒު
ވޯޓުލާ މަރުކަޒުތައް ގާއިމްކުރުމަށް މާލޭގެ ތިން ތަނެއްގައި ޓެންޓު ޖަހަން ވެސް އީސީން ވަނީ ނިންމައިފަ އެވެ. އެއީ މާފަންނު ސްޓޭޑިއަމްގެ ވޮލީ ކޯޓާއި ބޮޑުތަކުރުފާނު މަގުގައި ހުންނަ މާލޭ ސިޓީ ކައުންސިލްގެ ހޯލުގެ އިތުރުން ހެންވޭރު ދަނޑުގަ އެވެ.
ލޯކަލް ކައުންސިލް އިންތިހާބުގައި 1،592 އަދި އަންހެނުންގެ ކޮމިޓީތަކުގެ އިންތިހާބުގައި 1،368 ކެންޑިޑޭޓުން ވާދަކުރެ އެވެ. މި އިންތިހާބުތަކުގައި ވޯޓު ލުމުގެ ހައްގު 294،937 މީހަކަށް ލިބިފައިވެ އެވެ.
ލޯކަލް ކައުންސިލް އިންތިހާބުގައި ހޮވާނީ 678 މީހުންނެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 678 މީހުންނެވެ. އެހެންވެ މި ދެ އިންތިހާބުގައި ޖުމްލަ 1،356 މީހަކު އިންތިހާބުކުރާނެ އެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު އަދި ރިޔާސީ އިންތިހާބާއި މަޖިލިސް އިންތިހާބު އެއްކޮށްލަން ހިޔާލު ނެގުމުގެ ވޯޓު ބާއްވަނީ އަންނަ އެޕްރީލް މަހުގެ ހަތަރު ވަނަ ދުވަހު އެވެ.