ލޯކަލް ކައުންސިލް އިންތިހާބުގައި ވޯޓުލާން ރަޖިސްޓްރީކޮށްފައިވާ ފޮށިތަކުގެ ލިސްޓް އާންމުކޮށް، އެކަމާ ގުޅޭ ޝަކުވާއަށް މިއަދު ހުޅުވާލައިފި އެވެ.
އިލެކްޝަންސް ކޮމިޝަނުން ބުނީ އަންނަ މަހުގެ 4 ވަނަ ދުވަހު ބާއްވާ އިންތިހާބުގައި ވޯޓުލާން ރަޖިސްޓްރީކޮށްފައިވާ ފޮށީގެ ލިސްޓް މިއަދު އާންމު ކޮށްފައިވާއިރު، އެކަމާ ގުޅޭގޮތުން މާދަމާގެ މެންދުރުފަހު 1:30 ގެ ނިޔަލަށް ޝަކުވާ ހުށަހެޅޭނެ ކަމަށެވެ.
އެ ކޮމިޝަނުން ބުނީ ރަޖިސްޓްރީކޮށްފައިވާ ފޮށީގެ މައުލޫމާތު ވެބްސައިޓު ނުވަތަ VR(ހުސްތަންކޮޅެއް) ދިނުމަށްފަހު އައިޑީކާޑު ނަމްބަރާއެކު 1414 އަށް ފޮނުވައިގެން ވެސް ބެލޭނެ ކަމަށެވެ. އަދި ކޮމިޝަނުގެ އޮންލައިން ރަޖިސްޓަރީ ޕޯޓަލް މެދުވެރިކޮށް ވެސް ޝަކުވާ ހުށަހެޅޭނެ ކަމަށް އެ ކޮމިޝަނުން ބުންޏެވެ.
މި މުއްދަތުގައި ޝަކުވާ ހުށަހަޅާނީ ވޯޓުލާން ރަޖިސްޓަރީކޮށްފައިވާ ފޮށްޓާ ގުޅޭގޮތުން އެކަންޏެވެ.
ލޯކަލް ކައުންސިލް އިންތިހާބުގައި 1،592 އަދި އަންހެނުންގެ ކޮމިޓީތަކުގެ އިންތިހާބުގައި 1،368 ކެންޑިޑޭޓުން ވާދަކުރެ އެވެ. އެ އިންތިހާބުތަކުގައި ވޯޓުލުމުގެ ހައްގު 294،937 މީހަކަށް ލިބިފައިވެ އެވެ.
މިފަހަރު ލޯކަލް ކައުންސިލާއި އަންހެނުންގެ ކޮމެޓީތަކަށް ކޮންމެ ތަނަކަށް 678 ކެންޑިޑޭޓުންނާއެކު، ޖުމްލަ 1،356 މީހަކު އިންތިހާބު ކުރާނެ އެވެ.