އިސްތަންބޫލް (އޮކްޓޯބަރު 10) - މި އަހަރު ނިމޭއިރު ތެޔޮ ފީފާއެއްގެ އަގު 60 ޑޮލަރަށް އެރުން އެކަށީގެންވާ ކަމަށް ސައުދީ އަރަބިއާ އިން ބުނެފި އެވެ.
އިސްތަންބޫލްގައި ފެށި ވޯލްޑް އެނާޖީ ކޮންގްރެސްގައި ވާހަކަ ދައްކަވަމުން ސައުދީ އަރަބިއާގެ އެނާޖީ މިނިސްޓަރު ޚާލިދު އަލް ފާލިހު ވިދާޅުވީ ތެލުގެ އަގު ކޮންމެ މިންވަރެއްގައި ހުރި ނަމަވެސް ސައުދީ އަރަބިއާގެ އިގްތިސާދަށް ގެންނަ ބަދަލުތައް ހުރީ ރަނގަޅު މަގުގައި ކަމަށެވެ. ސައުދީގެ ވަލީ އަހުދުގެ ނައިބް މުހައްމަދު ބިން ސަލްމާން އެޕްރީލް މަހު ވަނީ ތެލަށް ބާރޯސާ ނުވެ އިގްތިސާދު ކުރިއަށް ގެންދެވޭނެ ޕްލޭނެއް އެޕްރީލް މަހު އާއްމު ކުރައްވައިފަ އެވެ.
ސައުދީން މިދިޔަ މަހު ވަނީ ތެޔޮ އުފައްދާ މިންވަރު ދަށް ކުރުމަށް އެއްބަސްވެފަ އެވެ. ޚާލިދު އަލް ފާލިހު ވިދާޅުވީ އޯޕެކުގެ ގިނަ ގައުމުތަކުން ވެސް ސަޕްލައި ދަށް ކުރުމަށް އެއްބަސްވުމުން ނޮވެމްބަރު ހިސާބުގައި ތެލުގެ އަގަށް ބަދަލު އަންނާނެ ކަމަށް ބެލެވޭ ކަމަށެވެ. ޖޫން މަހަށް ފަހު މިދިޔަ ހަފުތާގައި ވަނީ ތެލުގެ އަގު ފުރަތަމަ ފަހަރަށް 50 ޑޮލަރަށް އަރައިފަ އެވެ.
ޚާލިދު އަލް ފާލިހު ވިދާޅުވީ މިހާރު ސަމާލުކަން ދެނީ ތެލުގެ އަގަށް ނޫން ކަމަށާއި ސަޕްލައި އަދި ޑިމާންޑަށް ކަމަށެވެ. އަދި ތެލުގެ އަގަށް އަންނަ ކޮންމެ ބަދަލަކަށް ސައުދީ އޮތީ ތައްޔާރަށް ކަމަށް އޭނާ ވިދާޅުވި އެވެ.
ސައުދީގެ އިގްތިސާދީ އިސްލާހީ ޕްރޮގްރާމުގެ ދަށުން އެ ގައުމުގެ އެންމެ ބޮޑު ތެޔޮ ކުންފުނި އަރާމްކޯގެ ހިއްސާ އާއްމުންނަށް ވިއްކުމަށް ވެސް ވަނީ ހަމަޖައްސައިފަ އެވެ.