ޖަކާޓާ (އޮގަސްޓް 13) - އިންޑޮނީޝިއާގެ ސުމަޓުރާ ޖަޒީރާ އަށް ރިކްޓާ މިންގަނޑުން 6.4 ގެ ބާރު މިނުގައި މިއަދު ބިންހެލުމެއް އަތުވެއްޖެ އެވެ.
ނަމަވެސް ސުނާމީގެ އިންޒާރު ނެރެފައެއް ނުވެ އެވެ. އެކަމަކު ބިންހެލުމާ އެކު ސުމަޓުރާގެ ގިނަ ބަޔަކު ވަނީ ގެދޮރުން ނުކުމެފަ އެވެ.
ޔޫއެސް ޖިއޮލޮޖިކަލް ސާވޭ އިން ބުނީ ބިންހެލުން އައީ ބެންކުލޫގެ ހުޅަނގުން 73 ކިލޯ މީޓަރުން ބިމުއަޑީގެ 35 ކިލޯ މީޓަރަށް ކަމަށެވެ.
"ބިންހެލުމުގެ ބާރު ވަރަށް ގަދަ. އަދި އެއީ ވަރަށް ތިލަ ހިސާބަކަށް އައި ބިންހެލުމެއް. އޭގެ އަސަރު ވެސްޓް ސުމަޓްރާ އަށް ވަރަށް ބޮޑަށް ކުރި. އެކަމަކު ސުނާމީއެއްގެ ބިރެއް ނެތް،" އިންޑޮނީޝިއާގެ މިޓިއޮރޮލޮޖީ އެންޑް ޖިއޯފިޒިކްސް އެޖެންސީގެ އޮފިޝަލެއް ކަމަށްވާ މުހައްމަދު ރިޔާޒީ ވިދާޅުވި އެވެ.
އޭނާ ވިދާޅުވީ ބިންހެލުމުގައި އެއްވެސް މީހަކު މަރުވެފައިވޭތޯ ބަލަމުންދާ ކަމަށެވެ.
ސުމަޓުރާގެ ހުޅަނގުން އޮންނަ ބެންގްކްލޫ ޕްރޮވިންސްގައި ދިރިއުޅޭ ނެންގް ހަސްނާ އޭއެފްޕީ އަށް ބުނީ މަދު ސިކުންތުކޮޅަކަށް ބިންހެލުން ދެމިގެން ދިޔަ ކަމަށެވެ. އަދި އެއީ ވަރަށް ބާރުގަދަ ބިންހެލުމެއް ކަމަށް އޭނާ ބުންޏެވެ.
"ބިންހެލުމާ އެކު އާއިލާގެ އެންމެން ގެއިން ނުކުތީ. އޭރު އަހަރެންގެ އަތުގައި ހަތް މަހުގެ މާމަ ދަރިއަކު ވެސް އޮތް،" ހަސްނާ ބުންޏެވެ.
އިންޑޮނީޝިއާ އޮންނަނީ ބިންހެލުން އެންމެ ގިނައިން އަންނަ ޕެސިފިކް "ރިންގް އޮފް ފަޔާ" ގަ އެވެ.
އިންޑޮނީޝިއާގެ ހުޅަނގުގެ އަސޭ އަށް މިދިޔަ ޑިސެމްބަރު މަހު އައި ބިންހެލުމެއްގައި ވަނީ 100 އަށް ވުރެ ގިނަ މީހުން މަރުވެފަ އެވެ. އަދި އެތައް ހާސް ބަޔަކު ވަނީ ގެދޮރު ގެއްލިފަ އެވެ. އަދި ޑިސެމްބަރު 26، 2004 ގައި ސުމަޓްރާ އަށް އައި ބިންހެލުމުގައި އުފެދުނު ސުނާމީގައި ވަނީ 280،000 މީހުން މަރުވެފަ އެވެ.