މާލެއާ 2،500 ކިލޯމީޓަރު ދުރުން މިއަދު ބިންހެލުމެއް އަތުވެއްޖެ އެވެ.
ރާއްޖޭގެ މޫސުމާ ބެހޭ ގައުމީ އިދާރާ، މެޓް އޮފީހުން ދެންމެ ބުނީ އިންޑޮނީޝިއާގެ ސުމަޓްރާގެ އުތުރުގެ ސަރަހައްދަށް 6.1 މެގްނިޓިއުޑްގެ ބާރުމިނުގައި ރާއްޖެ ގަޑިން މިއަދު ހެނދުނު 10 ޖަހަނިކޮށް ބިންހެލުމެއް އައިސްފައިވާ ކަމަށެވެ.
މާލެއާ 2،581 ދުރުން އައި އެ ބިންހެލުމުގެ ސީދާ ނުރައްކާ ރާއްޖެއަށް ކުރާނެ ކަމަށް ނުބެލެވޭ ކަމަށް މެޓް އޮފީހުން ބުންޏެވެ.
ސުމަޓްރާ ސަރަހައްދަށް އެންމެ ބާރުގަދަ ބިންހެލުމެއް އައިސްފައި ވަނީ ޑިސެމްބަރު 26، 2004 ގަ އެވެ. އެ ފަހަރު 9.2 މެގްނިޓިއުޑްގެ ބާރުމިނުގައި އައި ބާރުގަދަ ބިންހެލުމާ އެކު އުފެދުނު ސުނާމީގައި ރާއްޖެއިން ވެސް ގިނަ ބަޔަކު މަރުވެ، އެތައް ބަޔަކު ގެދޮރު ގެއްލި ހާލުގައި ޖެހުނެވެ. އެއީ ދުނިޔެއަށް ތިންވަނަ އަށް އައި އެންމެ ބާރުގަދަ ބިންހެލުމެވެ.
ބިންހެލުން އާންމުކޮށް އުފެދެނީ ޓެކްޓޯނިކް ދެ ޕްލޭޓު ގުޅޭ ސަރަހައްދުތަކުގައި، އެއް ޕްލޭޓު އަނެއް ޕްލޭޓްގެ ހަރަކާތްތަކާ ގުޅިގެން އަންނަ ގުޑުމެއްގެ ސަބަބުންނެވެ. އެ ގޮތަށް ދެ ޕްލޭޓު ޖެހުމުން، އެ ސަރަހައްދުގައި ޖަމާވެފައި ހުންނަ ހަކަތަ ބޭރުވެ، ސައިސްމިކް ރާޅުތަކެއް އުފެދެ އެވެ. އެ ހިނދު، ދެ ޕްލޭޓު ދުރުވެ، ބިންހެލުމެއް އުފެދެނީ އެވެ.