އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލި ހަމަލާ އަކީ އެމެރިކާއިން ދިން ހަމަލާއެއް ނޫން ކަމަށާއި އެކަން ކުރީ އިޒްރޭލުން ކަމަށް ބުނެ އެމެރިކާއިން އެކަމުން ބަރިއްޔަވާން ވާހަކަ ދައްކައިފި އެވެ.
ސެނެޓްގެ އާމްޑް ސާވިސް ކޮމިޓީގެ ސުވާލުތަކަށް ޖަވާބު ދެއްވަމުން ޕެންޓަގަންގެ ޕޮލިސީ ޗީފް އެލްބްރިޖް ކޯލްބީ ވިދާޅުވީ ޚާމަނާއީ އާއި އީރާންގެ އިސް އެތައް ބޭފުޅުންނެއް އަވަހާރަކޮށްލި އަސްކަރީ ހަމަލާތަކަކީ އެމެރިކާގެ ހަމަލާތަކެއް ނޫން ކަމަށެވެ.
"އެއީ އިޒްރޭލުން ހިންގި އޮޕަރޭޝަނެއް،" އީރާނަށް ހަމަލާ ދެނީ އެ ގައުމުގެ ވެރިކަން ބަދަލުކުރުމުގެ ބޭނުމުގައިތޯ މެންބަރުން ސުވާލުކުރަން ފެށުމުން ކޯލްބީ ވިދާޅުވި އެވެ.
އީރާނަށް ދެމުންދާ ހަމަލާތަކާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕު ވާހަކަ ދައްކަވާ ހަރުކަށި ރާގާއި ކޯލްބީގެ ރާގު ތަފާތެވެ.
"އެމެރިކާގެ ހަލާކަށް ގޮވައި ލޭ އޮހޮރުވުމާއި މީހުން މެރުމުގެ ފުޅާ ކެމްޕެއިންތައް އިރާންގެ ވެރިން ހިންގަމުން ގެންދާތާ 47 އަހަރުވެއްޖެ،" ހަމަލާތައް ދޭން ފެށި ހޮނިހިރު ދުވަހު ޓްރަމްޕު ވިދާޅުވި އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕު ވަނީ "އަހަރެމެންގެ ޖާސޫސުންނާއި އާދަޔާ ހިލާފް މޮޅު ޓްރެކިން ސިސްޓަމަށް ފިލައިގެން ޚާމަނާއީއަށް ނޫޅެވުނު" ކަމަށާއި އިޒްރޭލާ އެކު ގާތުން މަސައްކަތް ކުރުމުން ޚާމަނާއީގެ އިތުރުން އީރާންގެ އެހެން ލީޑަރުންނަށް ވެސް އެއްވެސް ނުކުރެވުނު ކަމަށް ވިދާޅުވެ ފަހުރުވެރިކަމާ އެކު ވާހަކަ ދައްކަވައިފަ އެވެ.
އެހެންވެ ޓްރަމްޕު ދެއްކެވި ވާހަކަ އާއި ޕެންޓަގަންގެ ޕޮލިސީ ޗީފްގެ ވާހަކަ އަދި ސެކްރެޓަރީ އޮފް ސްޓޭޓް މާކޯ ރޫބިއޯގެ ވާހަކައިގެ ފުށުއެރުމާ ހެދި، އީރާނަށް ހަމަލާ ދިނުމުގެ ހަގީގީ މަގްސަދާ މެދު އިތުރަށް ވަނީ ސުވާލު އުފެދިފަ އެވެ.
ރޫބީއޯ ވިދާޅުވެފައި ވަނީ އީރާނަށް ހަމަލާދޭން އިޒްރޭލުން ނިންމައި އެކަން ކުރަން އުޅޭކަން އެމެރިކާއަށް އެނގުމުން ހަމަލާގައި ބައިވެރިވީ ކަމަށާއި އެކަން އެހެން ކުރަން ޖެހުނީ އިޒްރޭލުގެ ހަމަލާއާ އެކު އީރާނުން އެމެރިކާގެ މަސްލަހަތު ހިމެނޭ ތަންތަނަށް ހަމަލާދޭނެކަން ޔަގީންވާތީ ކަމަށެވެ.
ސެނެޓްގައި ކޯލްބީ ވަނީ އެމެރިކާ މަގްސަދުތަކުގެ "ދާއިރާ ހަނިކޮށް" ވާހަކަ ދައްކަވައިފަ އެވެ.
"އަސްކަރީ ކެމްޕެއިންގެ މަގްސަދަކީ ... އޭގެ އަމާޒަކީ އީރާންގެ އަސްކަރީ ބާރުތައް އަޅުގަނޑުމެންނާ ދެކޮޅަށް އަދި އަޅުގަނޑުމެންގެ މަރުކަޒުތަކާއި، އަޅުގަނޑުމެންގެ ފައުޖުތަކާއި އަދި ސަރަހައްދީ އަދި އެނޫން ގައުމުތަކުގައި ތިބި އަޅުގަނޑުމެންގެ ބައިވެރިންނާ ދެކޮޅަށް ބޭނުންކުރުން ހުއްޓުވުން،" އޭނާ ވިދާޅުވި އެވެ.
އޭނާ ވިދާޅުވި ގޮތުގައި އެންމެ ބޮޑު އަމާޒަކީ އީރާނުގެ މިސައިލް ގާބިލްކަމާއި އީރާނުގެ ނޭވީގެ ބާރު ނައްތާލުމާއި ހަތިޔާރު އުފެއްދުމުގެ ގާބިލްކަން ކުޑަކުރުމެވެ.
ކޯލްބީ ވިދާޅުވީ މިއީ އެމެރިކާއަށް މި ހަމަލާތަކުން ހާސިލްކުރެވޭނެ އަމާޒުތައް ކަމަށެވެ.
އޭނާ އެހެން ވިދާޅުވުމުން އީރާންގެ އިސް ލީޑަރު އަވަހާރަކޮށްލުމާ މި މަގްސަދުތައް ހާސިލްކުރުމާ ހުރީ ކޮން ގުޅުމެއްތޯ ކޮމިޓީގެ އިސް މެންބަރު ޑިމޮކްރެޓިކް ޕާޓީގެ ޖެކް ރީޑް ސުވާލުކުރެއްވުމުން ކޯލްބީ ވިދާޅުވީ އޭނާ ހާމަކުރެއްވީ އެމެރިކާގެ މަގްސަދުތައް ކަމަށާއި އީރާންގެ ލީޑަޝިޕްގެ ބޭފުޅުން އަވަހާރަކޮށްލި ހަމަލާ އަކީ އިޒްރޭލުގެ އަމަލެއް ކަމަށެވެ.
އީރާނުގެ ވެރިކަން ވައްޓާލަން ލިބިފައިވާ ފުރުސަތުގެ ބޭނުން ހިފުމަށް ޓްރަމްޕް އީރާންގެ ރައްޔިތުންނަށް ފާޅުގައި ގޮވާލައްވާފައިވާއިރު، ކޯލްބީ ވިދާޅުވީ އެމެރިކާގެ އަސްކަރީ ކެމްޕޭނުގެ ބޭނުމަކީ އީރާނުގެ ބާރުތައް ކުޑަކުރުމަށް ކަމަށާއި ވެރިކަން ބަދަލުކުރުމަކީ ސީދާ މަގްސަދެއް ނޫން ކަމަށެވެ. -- އޭއެފްޕީ