އީރާނަށް އިޒްރޭލާއި އެމެރިކާއިން ދެމުން ގެންދާ ހަަމަލާތަކަށް އީރާނުން ދޭ ރައްދު ހަމަލާތަކުގެ ސަބަބުން މެދުއިރުމައްޗަށް ދަތުރުތައް ހުއްޓާލާފައިވާ އިންޑިއާގެ ބައެއް އެއާލައިންތަކުން ބައެއް ދަތުރުތައް އަލުން ފަށަން ނިންމިކަން މިއަދު އިއުލާނުކޮށްފި އެވެ.
ހަނގުރާމައިގެ ސަބަބުން އެތައް ހާސް ފަސިންޖަރުންނެއް އެކި ގައުމުތަކުގައި ތާށިވެފައި ވާއިރު މެދުއިރުމައްޗަކީ ދެކުނު އޭޝިއާގެ ވަރަށް ގިނަ މީހުން ވަޒީފާ އަދާކުރާ ސަރަހައްދެކެވެ.
އިންޑިއާގެ އިންޑިގޯއިން ބުނީ ދަތުރުތައް އާންމު ހާލަތަކަށް ގެނައުމުގެ ގޮތުން ސައުދީ އަރަބިއްޔާގެ ޖިއްދާއަށް ހަތަރު ފްލައިޓް ބާއްވާނެ ކަމަށެވެ.
އެއާ އިންޑިއާ އެކްސްޕްރެސް އިން ބުނީ އަންނަ މިއަދުން ފެށިގެން އޮމާންގެ ވެރިރަށް މަސްކަޓަށް ދަތުރުތައް އަލުން ފަށާނެ ކަމަށެވެ.
ނަމަވެސް ބަހްރެއިން، ކުވައިތު، ގަތަރު، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކުރާ ދަތުރުތައް އަދިވެސް މެދުކަނޑާލާފައިވާ ކަމަށް އެ އެއާލައިންތަކުގެ ބަޔާނުގައިވެ އެވެ.
ބަޖެޓް އެއާލައިން އަކާސާ އެއާއިން ވެސް ޖިއްދާއަށް ދަތުރު ފަށާނެ ކަމަށް އެ އެއާލައިނުން ބުންޏެވެ.
މިހާރު ދެމުންދާ ހަމަލާތަކުގައި ދެކުނު އޭޝިއާގެ ބައެއް މީހުން ވަނީ މަރުވެފަ އެވެ. އޭގެ ތެރޭގައި އަބޫދާބީގައި ނޭޕާލްގެ އެކަކު އަދި ބަހްރެއިން އާއި ޔުނައިޓެޑް އަރަބް އެމިރޭޓްސްގައި މަރުވި ބަންގްލަދޭޝްގައި ދެ މީހަކު ހިމެނެ އެވެ.
މީގެ އިތުރުން އޮމާން ބޭރުން ތެޔޮ ޓޭންކަރަކަށް ދިން ހަމަލާގައި އިންޑިއާ މީހަކު ވެސް މަރުވެފައިވެ އެވެ.
ޔުނައިޓެޑް އަރަބި އެމިރޭޓްސް (ޔޫއޭއީ) ގެ އެއާޕޯޓްތަކުން ވެސް ރޭ ބައެއް ސިޓީތައް ވެސް ހިމެނޭ ގޮތަށް "ލިމިޓެޑް" ދަތުރުތައް އަލުން ވަނީ ފަށައިފަ އެވެ. އެއީ ދުބާއީ އިންޓަނޭޝަނަލް އެއާޕޯޓްސް އަދި ދުބާއީ ވޯލްޑް ސެންޓްރަލް - އަލް މަޚްތޫމް އިންޓަނޭޝަނަލް އެއާޕޯޓުންނެވެ.