ކުޅިވަރު ސްކޮލާޝިޕް "އަރުތަ" އިން އެތުލީޓުންގެ ކިޔެވުމުގެ ހަރަދުތައް ވެސް ހަމަޖައްސައިދޭ ގޮތަށް އެ ޕްރޮގްރާމަށް ބަދަލު ގެނެސްފައިވާ ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެ އެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި މިނިސްޓަރު ރާފިއު ވިދާޅުވީ، އަރުތަ ޕްރޮގްރާމުން މިހާތަނަށް ހަމަޖައްސައިދެމުން ދިޔައީ ހައި ޕާފޯމަންސް ތަމްރީނުތަކުގެ ހަރަދު އެކަނި ކަމަށެވެ.
"އަރުތަ" ޕްރޮގްރާމް ހިންގާނެ ގަވާއިދު މިހާރު ގެޒެޓްކޮށްފައިވާ ކަމަށާއި، އެ ގަވާއިދުގެ ދަށުން އެތުލީޓުން ހޮވުމާއި ކަންކަން ނިންމުމަށް "އަރުތަ ކޮމިޓީ" އެއް އެކުލަވާލާފައިވާ ކަމަށް މިނިސްޓަރު ފާހަގަކުރެއްވި އެވެ.
މިނިސްޓަރު ވިދާޅުވި ގޮތުގައި ކުޅިވަރުގައި މޮޅު ނަތީޖާ ހޯދާ ކުދިންނަށް ކިޔެވުމަށް ބުރޫނާރާނެ ގޮތަކަށް ކުރިއަށްދިއުމުގެ ފުރުސަތު ފަހިކޮށްދިނުމަކީ މި ޕްރޮގްރާމްގެ އެންމެ ބޮޑު އެއް މަގުސަދެވެ. މީގެ ކުރިން އާންމުކޮށް އުފެދޭ ސުވާލެއް ފާހަގަކޮށް، މިނިސްޓަރު ވަނީ އަރުތަ ޕްރޮގްރާމަށް ގެނައި ބަދަލާ ބެހޭގޮތުން އިތުރު ތަފްސީލު ދެއްވާފަ އެވެ.
"ރާއްޖޭގައި ކުދިން ކުޅިވަރު މޮޅަށް ކުޅެންވީ ކީއްވެތޯ؟،" ސުވާލު އުފައްދަވައި މިނިސްޓަރު ވިދާޅުވި އެވެ.
އެ ސުވާލަށް ޖަވާބުދިނުމުގެ ގޮތުން އަޅުގަނޑުމެން އެބަޖެހޭ ރާއްޖޭގައި ކުޅިވަރު ކުޅޭނެ ކުދިންނަށް ވެސް ކިޔެވޭނެ ގޮތަށް(ކުޅިވަރު ތަމްރީނު) ސްކޮލަޝިޕް ދޭން."
ރާފިއު ވިދާޅުވި ގޮތުގައި، އާ އުސޫލުގެ ދަށުން އެތުލީޓުންނަށް ލިބޭ ސްކޮލާޝިޕްގައި އެ ކުދިންގެ ތައުލީމީ ހަރަދުތައް ހިމެނިގެންދާނެ އެވެ. އަރުތަ ސްކޮލާޝިޕްގައި ގްރޭޑް 9 ނުވަތަ 10 އެއްގައި އުޅޭ ކުދިން ތަމްރީނަށް ރާއްޖޭން ބޭރަށް ނުވަތަ މާލެއަށް ބަދަލުވާން ޖެހުނަސް، އެ ކުދިންގެ ކިޔެވުން މެދުނުކެނޑި ކުރިއަށްދާނެ އިންތިޒާމު ހަމަޖެހިގެންދާނެ އެވެ.
މި ޕްރޮގްރާމްގެ ދަށުން ފުރުސަތުތައް ހޯދުމަށް ބައެއް އެސޯސިއޭޝަންތަކުން މިހާރު ވެސް އެތުލީޓުންގެ ނަންތައް ހުށަހަޅާފައިވާ ކަމަށާއި، މިހާރު ވެސް ބައެއް ކުދިންނަށް މި ސްކޮލާޝިޕްގެ ދަށުން ފުރުސަތުތައް ދީފައިވާކަން މިނިސްޓަރު ފާހަގަކުރެއްވި އެވެ. މިއީ ރާއްޖޭގެ ކުޅިވަރުގެ ކުރިމަގަށް އެޅުނު ވަރަށް މުހިންމު ފިޔަވަޅެއްގެ ގޮތުގައި ރާފިއު ސިފަކުރެއްވި އެވެ.