ކުޅިވަރު އެސޯސިއޭޝަންތަކުގެ ހިންގުން ހަރުދަނާ ކުރުމަށް އަޅާ ފިޔަވަޅުތަކުގެ ތެރެއިން، ހިންގުން ދަނެގަންނާނެ އުސޫލެއް އެކުލަވާލަމުން އަންނަ ކަމަށް ސްޕޯޓްސް މިނިސްޓަރު އަބްދުﷲ ރާފިއު އިއްޔެ ދާޅުވެއްޖެ އެވެ.
މިނިސްޓްރީން މި އަހަރަށް ރާވާފައިވާ މަސައްކަތްތަކާއ މި އަހަރުގެ މިހާ ހިސާބަށް ކޮށްފައިވާ މަސައްކަތްތަކާ ބެހޭގޮތުން ރައީސް އޮފީހުގައި ބޭއްވި ޕްރެސް ކޮންފަރެންސްގައި މިނިސްޓަރު ރާފިއު ވިދާޅުވީ އެސޯސިއޭޝަންތަކުގެ ހިންގުން ހަރުދަނާ ކުރުމަށް ފިޔަވަޅުތަކެއް އަޅަމުން އަންނަ ކަމަށެވެ.
މިނިސްޓަރު ވިދާޅުވި ގޮތުގައި ކުޅިވަރު އެސޯސިއޭޝަންތަކުގެ ހިންގުން ދަނެގަތުމަށްޓަކައި އެކުލަވާލަން ޖެހޭ އުސޫލު މިހާރު އަންނަނީ ތައްޔާރު ކުރަމުންނެވެ.
"ކުޅިވަރު ޖަމިއްޔާތަކުގެ ހިންގުން އިތުރަށް ރަނގަޅު ކުރުމުގެ ގޮތުން، ވަޒަންކުރުމަށް އުސޫލުތަކެއް ނުވަތަ ކޭޕީއައި [ކީ-ޕާފޯމަންސް އިންޑިކޭޓާ] ތަކެއް [އެކުލަވާލުމަށް] އަޅުގަނޑުމެން މިހާރު މިވަނީ ވަރަށް ބޮޑަށް މަސައްކަތް ކުރެވިފައި،" އޭނާ ވިދާޅުވި އެވެ.
"އިރާދަކުރެއްވިއްޔާ އެ ކަންކަން އަޅުގަނޑުމެންނަށް ވަރަށް އަވަހަށް ގާއިމް ކުރެވިގެންދާނެ. [ކުޅިވަރު] ޖަމިއްޔާތަކުގެ ހިންގުމުގެ ފެންވަރު ވަޒަންކުރާނެ ގޮތެއް އަޅުގަނޑުމެން އެބަ އެނގެންޖެހޭ."
މިނިސްޓަރު ވިދާޅުވީ އެސޯސިއޭޝަންތަކުގެ ފައިސާގެ މުއާމަލާތްތައް ކުރާ މަގާމުތަކުގައި ތިއްބަވާ ބޭފުޅުންނަށް ހާއްސަކޮށް ފައިނޭންޝަލް މެނޭޖްމެންޓްގެ ތަމްރީނުތަކެއް މިދިޔަ އަހަރު ހިންގިފައިވާ ކަމަށެވެ. އަދި އެސޯސިއޭޝަންތައް ގަވާއިދުން އޮޑިޓް ކުރުމުގެ މަސައްކަތް ތަންފީޒު ކުރުމަށް މިހާރު ހައްލުތަކެއް ހޯދިފައިވާ ކަމަށް ރާފިއު ވިދާޅުވި އެވެ.
އޮޑިޓް ފާމަކާ ހަވާލުކޮށްގެން، ކުޅިވަރު އެސޯސިއޭޝަންތައް އޮޑިޓް ކުރުމުގެ ގާބިލުކަން ނެތް އެސޯސިއޭޝަންތަކަށް، އޮލިމްޕިކް ކޮމިޓީ މެދުވެރިކޮށް އެކަން ހަމަޖައްސައި ދިނުމަށް މިހާރު ހަމަޖެހިފައިވާ ކަމަށް މިނިސްޓަރު ވިދާޅުވި އެވެ.
އެސޯސިއޭޝަންތަކުގެ އިދާރީ ހިންގުން ހަރުދަނާކުރުމަށް އަޅާ އަނެއް ފިޔަވަޅަކީ ޖެނަރަލް ސެކްރެޓަރީންގެ އިނާޔަތް ބޮޑު ކުރުމެވެ.
މިހާރު ޖެނެރަލް ސެކްރެޓަރީންނަށް މުސާރަ ނުވަތަ އިނާޔަތުގެ ގޮތުގައި ލިބެނީ 15،000ރ. އެވެ. ބޮޑު ކުރި އަދަދާ އެކު މަހަކަށް 20،000ރ. ގެ އިނާޔަތެއް ލިބޭނެ އެވެ.
ރާފިއު ވިދާޅުވި ގޮތުގައި، ޖެނެރަލް ސެކްރެޓަރީންނަކީ އެސޯސިއޭޝަންތައް ހިންގުމުގައި ފުލްޓައިމްކޮށް މަސައްކަތް ކުރައްވަން ތިއްބަވާ ބޭފުޅުންނެވެ.
އެހެންވެ ގިނަ ވަގުތު އެ މަސައްކަތުގައި ހޭދަކުރުމަށް ފުރުސަތު ފަހިކޮށްދިނުމަކީ މުހިންމު ކަމެއްގެ ގޮތުގައި މިނިސްޓަރު ދެކެވަޑައިގަންނަވަ އެވެ. އަދި ޖެނެރަލް ސެކްރެޓަރީންގެ ދަށުން މަސައްކަތް ކުރާ އިތުރު ދެ މުވައްޒަފުންނަށް ވެސް ނަގަން ފުރުސަތު ދޭ ގޮތަށް ބަޖެޓް ސަޕޯޓް ދޭން ހަމަޖެހިފައިވާ ކަމަށް ވެސް ރާފިއު ވިދާޅުވި އެވެ.
"[އެސޯސިއޭޝަންތަކުގެ] ހިންގުން ހަރުދަނާކުރުމަށް މިހާރު އަޅުގަނޑުމެންނަށް ކުރެވުނު އެންމެ މުހިންމު އެއް ކަމަކީ ޖެނެރަލް ސެކްރެޓަރީންގެ މުސާރަ ބޮޑުކޮށް، ތަންކޮޅެއް ރަނގަޅަށް އެ މީހުންނަށް ފުލްޓައިމްކޮށް އެ ތަނުގައި [އެސޯސިއޭޝަންތަކުގައި] މަސައްކަތް ކުރެވޭނެ ގޮތް ހެދުމާއި އަދި މަދުވެގެން އެޑްމިނިސްޓްރޭޓިވް ސްޓާފުން އެސޯސިއޭޝަންތަކަށް ނަގައިގެން އެ މަސައްކަތް ކުރަން ޑޮކިއުމެންޓޭޝަންތައް ބަލަހައްޓަން މަސައްކަތް ކުރެވޭނެ ގޮތަށް އެސޯސިއޭޝަންތަކުގެ އެތެރޭގެ އިންތިޒާމު އެގޮތަށް ހަމަޖެއްސުމަށްޓަކައި ބަޖެޓުން އެކަން ފެސިލިޓޭޓްކޮށްދިނުން، ރާފިއު ވިދާޅުވި އެވެ.