އެކި މީހުން ލޯބި މާނަކުރާނީ އެކި ގޮތަށެވެ. އެއް ބަޔަކު ބުނާ ގޮތުން ނަމަ ލޯތްބަކީ ވަރަށް ހިތްގައިމު އެއްޗެކެވެ. ތެދުވެރި، ވަފާތެރި ލޯބި ލިބޭނީ ނަސީބުވެރިންނަށެވެ. ނަމަވެސް އަނެއް ބަޔަކު ދެކޭ ގޮތުގައި ލޯތްބަކީ ވޭން ހުރި އެއްޗެކެވެ. ދިރިއުޅުމަށް ކޮންމެހެން މާ މުހިންމު އެއްޗެއް ނޫނެވެ. ބައެއް ފަހަރު ލޯބީގައި ހަލާކުވާ މީހުން މަދެއް ނޫނެވެ. ލޯބި ވެވިއްޖެ ނަމަ އެކަމާ އިންކާރު ނުކުރާށެވެ. އެކަމަކު ލޯބި ވާންވާނީ އެ ލޯބި ދެމެހެއްޓޭނެ ނަމައެވެ.
އަހަރެންނަށް ލޯބި މާނަ ކުރެވޭ ގޮތް މި ބުނި ގޮތްތަކާ ތަފާތު ވެދާނެއެވެ. ހަގީގަތުގައި ލޯތްބަކީ ކޮން އެއްޗެއް ކަމެއް އަހަރެންނަކަށް ނޭނގެއެވެ. މީހަކު ދެކެ ލޯބިވެވުމުން ކުރެވޭނީ ކޮން ކަހަލަ އިހުސާސްތަކެއް ކަމެއް ވެސް ނޭނގެއެވެ. ކަމުދާ މީހަކު ފެނުމުން ގަޔާ ވެވެއެވެ. އެ މީހަކު ކަމުދާން ފަށައެވެ. ނަމަވެސް އޭނާ މަތިން ހަނދާންކޮށް ރޭރޭ ނުނިދާ ހޭދަ ކުރާކަށް ނުޖެހެއެވެ. ނުވަތަ އޭނާގެ މެސެޖަކަށް އިންތިޒާރެއް ނުކުރެވެއެވެ. އޭނާ ފެންނާނެ ވަގުތަކަށް އުންމީދެއް ވެސް ނުކުރަމެވެ. އަހަރެންގެ ހިތުގައި އަޖައިބެއް ކަހަލަ މިއުޒިކެއް ކުޅޭކަށް ނުފަށައެވެ. ހަށިގަނޑުގެ އެންމެ ހިމަ ނާރަށް އެކަމުގެ އަސަރެއް ނުކުރެއެވެ. ވުމާއެކު މީހަކު ކަމުދިއުން އެއީ އަދި ލޯބި ވެވުނީ ކަމަކަށް ގަބޫލެއް ނުކުރެވެއެވެ.
އަހަރެންގެ އުމުރަކީ 23 އަހަރެވެ. އަހަރެން ދުވަހަކު ވެސް މީހަކާ "ރައްޓެއްސެއް" ނުވަމެވެ. އަހަރެންނަކީ ގޮތްދޫނުކުރާ މީހެކޭ ބުނެވިދާނެއެވެ. އެއީ ކުޑައިރުއްސުރެ ވެސް އަހަރެންގެ މިޒާޖުގައި ހުންނަ ސިފައެކެވެ. އެހެން މީހުންގެ ފަރާތުން އުންމީދު ކުރެވޭ ކަންކަން އަހަރެން ބޭނުން ވަނީ އަހަރެން ނުބުނަނީސް އެ މީހަކަށް އެނގޭށެވެ. އެއީ މައިންބަފައިން ކަމަށް ވިޔަސް ނުވަތަ ރައްޓެހިންނަށް ވިޔަސް ވެހެވެ. ކިތަންމެ ބޭނުންވާ އެއްޗެއް ވެސް ހޯދާދޭށެކޭ ނުބުނަމެވެ. އަހަރެންގެ އިޝާރާތުން އެކަމެއް އެ މީހަކަށް އެނގެން ޖެހޭނެއެވެ. އަހަރެން ގަބޫލު ކުރާ ގޮތުގައި އެއީ އެކަން އޮންނަން ޖެހޭނެ ގޮތެވެ. އޮފީސް މާހައުލުގައި ވެސް މި ކަން އޮންނަން އަހަރެން ބޭނުން ވަނީ މިހެންނެވެ. އަހަރެންނާ ވާހަކަ ދައްކަން ބައެއް މީހުންނަށް ވަރަށް އުނދަގޫވާ ކަމަށް އަޑު އިވެއެވެ. ނަމަވެސް އެ އަޑުތަކަށް އަހަރެން ދިނީ ބީރު ކަންފަތެކެވެ. އަހަރެންގެ މިޒާޖަކަށް ބަދަލެއް ނުގެންނަމެވެ. މީހުންނަށް އުނދަގޫވާ ނަމަ ވާހަކަ ނުދައްކާ އުޅެންވީއެވެ. އަހަރެންނަށް ވާނެ ދެރައެއް ނޯންނާނެއެވެ.
އަހަރެންނަކީ ރީތި ކުއްޖެކެވެ. ލޯގަނޑު ކުރިމައްޗަށް ހުއްޓިފައި އަހަރެންގެ ފައިން ފެށިގެން ބޮލަށް ބަލައިލީމެވެ. ފިރިހެނުންނަށް ކަމުނުދާ އެންމެ ސިފައެއް ވެސް އަހަރެންގެ ނުހުންނާނެއެވެ. އެއީ އަހަރެންނަށް ހީވާ ގޮތެވެ. އަހަރެންގެ ފަން، ދިގު އިސްތަށިގަނޑުގެ ޖާދޫގައި ކިތަންމެ ފިރިހެނަކު ޖެހޭނެއެވެ. އަހަރެންގެ މަސްތުވީ ދެ ލޮލުގެ ފުންކަމުގެ ތެރެއަށް ޣަރަގުނުވާނެ ފިރިހެނަކު މަދުވާނެއެވެ. ކޮންމެ މީހަކު ވެސް އަހަރެން ފަދަ ބައިވެރިޔަކު ބޭނުންވާނެއެވެ. އަމިއްލަ ސިފައާ މެދު އެހާ ބޮޑު ޔަގީންކަމެއް އޮވެއެވެ. ތަގުދީރުގައި ލިޔެވިފައި އޮތީ ކީކޭ ކަމެއް ނޭނގެއެވެ. އެއީ އަހަރެން ވިސްނާކަމެއް ނޫނެވެ.
އޮފީހަށް އަލަށް ވަން މީހެކެވެ. އޭނަގެ މަގާމަކީ އޮފީހުގައި މަތީ މަގާމެކެވެ. ނަމަކީ އަޒްމީލެވެ. މިއަދަކީ އަޒްމީލް އޮފީހަށް އަންނަ ދުވަހެވެ. ކޮންމެ މީހަކު ވެސް އޭނައަށް މަރުހަބާ ކިޔަން ހުރީ ތައްޔާރު ވެގެންނެވެ. އަތުގައި މާ ބޮޑިއެއް ނުވަތަ ޕާރުސަލެއް އޮތެވެ. އަހަރެން ހުރީ ހުސް އަތާއެވެ. އެ ކަމަށް އަހަރެން މާބޮޑު ސަމާލުކަމެއް ނުދެމެވެ. އެއީ މާ މުހިންމު ކަމެއް ކަމުގައި ނުދެކޭތީއެވެ. ދޮރު ހުޅުވާލާފައި އަޒްމީލް އޮފީހަށް ވަން ވަގުތެވެ. އަހަރެންނަށް އޭނައާ ދިމާލަށް ބަލާލެވުނެވެ. ހިތަށް ވީ ގޮތެއް ނޭނގުނެވެ. ހައިރާން ވެވުނީ ކަމެއް ނޭނގުނެވެ. އަހަރެންގެ ލޮލުގެ ނަޒަރު ހުއްޓިފައި ހުރީ އަޒްމީލަށެވެ. މަޑު ނޫކުލައިގެ ގަމީހެއް ލައިގެން ދަށަށް ޖަހާލާފައި ހުރި އިރު އޭނާގެ ފިރިހެންވަންތަކަން އިތުރަށް ފުރިހަމައެވެ. އިސްތަށިގަނޑު ވަރުގަދައެވެ. ކަޅު އިސްތަށްޓާ އެއް ވަރަށް ނުރަ ވެސް ހުއްޓެވެ. ބަލާ ބެލުމަށް ހީވަނީ ސާޅީސް އަހަރު ހެންނެވެ. އެކަމަކު މޫނުމަތިން ފެންނަނީ އުޖާލާ ކަމެވެ.
އެންމެންނާ ސަލާމް ކުރަމުން އައިސް އަހަރެންގެ ކުރި މައްޗަށް ހުއްޓުނެވެ. އަދި ސަލާމަށް އަތް ދިއްކޮލިއެވެ. އަމިއްލަ ނަން ބުނެލިއެވެ. އަހަރެން ހުރީ ބުނާނެ އެއްޗެއް ނޭނގިފައެވެ. އެއީ އަހަރެންނަށް ދުވަހަކު ވެސް ވީ ގޮތެއް ނޫނެވެ. އަނެއްކާ ވެސް އޭނާ ސަލާމް ގޮވާލިއެވެ. އަހަރެން ސިއްސައިގެން ދިޔައެވެ. އަދި ދެފަރާތަށް އެނބުރިލެވުނެވެ. އެއަށްފަހު ކުރިމަތީ ހުރި އަޒްމީލަށް ބަލާލެވުނެވެ. ސަލާމް ކޮށްލީމެވެ. އެ އަތް ފިންޏެވެ. ހީވަނީ ގަނޑުފެން ކޮޅެއް ހެންނެވެ. އަހަރެން ހިންދިރުވާލީމެވެ. އަޒްމީލް ހިނިތުންވެލާފައި ދިޔައެވެ.
އަހަރެން އިންނަނީ އަޒްމީލްގެ ކެބިންގެ ކުރިމަތީގައެވެ. ދެ މީހުންގެ ހުރަހަކަށް ވެފައި ހުރީ ސާފު ބިއްލޫރި ބިތެކެވެ. ބޭއިޚުތިޔާރުގައި އަހަރެންނަށް ބެލެނީއެވެ. އަޒްމީލް ކޮބާތޯ ހޯދެނީއެވެ. މިވަނީ ކީއްކަމެއް ޚުދު އަހަރެންނަކަށް ނޭނގުނެވެ. ހިތް ބުނަމުން ދިޔައީ ތިޔަ ކުރެވޭ އިހުސާސްތަކުގެ މައްޗަށް ބާރު ފޯރުވާށެވެ. ނަމަވެސް ސިކުނޑި ދެކޮޅު ހެދިއެވެ. އަޒްމީލްއާ ދޭތެރޭ ވިސްނެނީއެވެ. އެންމެ ފެނިލުމަކުން އޭނާ އަހަރެންގެ ހިތުން ޖާގަ ހޯދިއެވެ. ކުރިން އަހަރެން ވިސްނަމުން އައި ގޮތް ބަދަލުވާން ނެގީ ހިނދުކޮޅެކެވެ. އަހަރެންނަށް ކުރިން ކަމުދަނީ އިސްތަށިގަނޑު ބުޅިކޮށް ތިބޭ ފިރިހެނުންނެވެ. މިހާރު ކަމުދަނީ އިސްތަށިގަނޑު ފަންކޮށް ތިބޭ މީހުންނެވެ. ކުރިން ރީތީ ހިކިކޮށް، ދިގުކޮށް ތިބޭ މީހުންނެވެ. މިހާރު ކަމުދަނީ ބާމަތި ފުޅާކޮށް، ވަރުގަދަކޮށް ތިބޭ މީހުންނެވެ. އެއީ އަޒްމީލްގެ ސިފަތަކެވެ. ކޮންމެއަކަސް އަހަރެންނަށް އެ ދުވަހަކު މަސައްކަތެއް ނުކުރެވުނެވެ. އެހެން ކަމަކާ ފިކުރު ކުރެވެނީއެވެ. އެންމެ ފަހުން ގެއަށް އައީމެވެ. އެނދުގައި އިށީނދެ ވިސްނަން ފެށުނެވެ. މިއީ ކޮން ކަހަލަ ކަމެއް ހެއްޔެވެ؟ މިވީ ކިހިނެއް ހެއްޔެވެ؟
އަނެއް ދުވަހުގެ އިރު އެރިއެވެ. ރޭގަނޑު ހަތަރުދަމު އަހަރެންނަށް ވިސްނުނީއެވެ. ހިޔާލުތަކުގެ ތެރެއަށް ގެއްލުނީއެވެ. އަޒްމީލް ހިތުގައި އަހަރެންނަށް އެއްވެސް ޖާގައެއް ދެވިފައި ވާނެބާއެވެ. ވާނެއެވެ. ޔަގީނެވެ. އަހަރެން ކަހަލަ ކުއްޖަކު މީހަކަށް ލިބުމަކީ އުފާވެރިކަމެކެވެ. ނަސީބެކެވެ. އަހަރެންނަށް މި ކުރެވޭ އިހުސާސްތައް އޭނާ ވެސް ކުރާނެއެވެ. ނުވާ ނަމަ އަހަރެން ފެނުމުން ހިނިތުން ނުވާނެއެވެ. އަހަރެންނާ ދިމާލަށް އޭނާ ބަލައިލީ އެހެން ނަޒަރަކުންނެވެ. ނުވަތަ މިއީ އަހަރެންނަށް ކުރެވޭ ކުށްހީއެއް ހެއްޔެވެ؟ އަހަރެންގެ ހިޔާލުތައް މަސްހުނި ވަމުން ދިޔައެވެ.
އޮފީހަށް ވަދެ ގޮނޑީގައި ހަމަޖެހިލީމެވެ. ކުރިމަތި ބަލާލީމެވެ. އަޒްމީލް އިނީ މީހަކާ ވާހަކަ ދައްކާށެވެ. އަހަރެންނަށް އޭނާގެ މޫނު ފެންނަވަރެއް ނުވިއެވެ. އިނީ އަންހެނެއްކަން އެނގެއެވެ. ހިނދުކޮޅަކަށް ހިތުގެ ވިންދު ހުއްޓުނު ކަހަލައެވެ. އެ އަންހެން މީހާ ތެދުވިއެވެ. އަހަރެން ކުރިމަތިންލާފައި ނުކުމެގެން ދިޔައެވެ. އޭނާގެ ސިފައަށް އަހަރެން ބަލާލީމެވެ. ރީތި މީހުން ތެރޭގައި އޭނާ ގުނާލެވޭނެއެވެ. އަހަރެންގެ ނިތްކުރިއަށް ރޫތައް ޖަމާވިއެވެ. އެއީ ކާކު ހެއްޔެވެ؟ ފޫހިވެފައި މޭޒުގެ ވަތްގަނޑު ހުޅުވާލީމެވެ. އެތަނުގައި ކުޑަކުޑަ ޕާރުސަލެއް އޮތެވެ. ވަރަށް ކުޑައެވެ. އަހަރެންގެ މޫނު މައްޗަށް ހިނިތުންވުން ގެނުވިއެވެ. އަވަސް އަވަހަށް ޕާރުސަލް ކަނޑާލީމެވެ. އެތެރޭގައި އޮތީ ބިއްލޫރިން ހަދާފައިވާ ފިނިފެންމަލެކެވެ. މަލުގެ އެތެރޭގައި ލިޔެފައި އޮތީ "ވަރަށް ލޯބި" މިހެންނެވެ. އަހަރެންނަށް ބަލާލެވުނީ އަޒްމީލަށެވެ. އެ ވަގުތަކީ އޭނަ ބަލަހައްޓައިގެން އިން ވަގުތެވެ. އޭނާ ހިނިތުންވެލިއެވެ. އަހަރެންނަށް ގަބޫލުކުރަން އުނދަގޫވިއެވެ. އަޒްމީލަށް އަހަރެން ކަމުދިޔައީ ހެއްޔެވެ؟ އެކަމަކު އެންމެ ފެނިލުމަކުން އެހެން ވާނެ ހެއްޔެވެ؟ ނުވާންވީ ކީއްވެ ހެއްޔެވެ؟ އަހަރެންނަށް ވެސް ވީއެވެ. އަހަރެން ވަރަށް އުފާވިއެވެ. މޫނުމަތި އަލިވެގެން ދިޔައެވެ. ހިތުގައި ޖަހަމުން ދިޔަ ވިންދު ދެ ގުނައަށް އަވަސްވިއެވެ. އުންމީދު ކުރެވެމުން ދިޔައީ އަޒްމީލްއާ ބައްދަލުވާނެ ވަގުތަކަށެވެ.
އޮފީހުގައި ހޭދަ ކުރާ ވަގުތު އިތުރު ވެގެން ދިޔައެވެ. އޮފީސް ބައްދަލުވުންތަކުގައި އަޒްމީލްއާ އެންމެ ގާތުގައި އިނދެވޭތޯ އަހަރެން ބަލަމެވެ. އޭނާ އަހަރެންނާ ވާހަކަ ދައްކައެވެ. އެކަމަކު އެހެން މީހުންނަށް އެއްވެސް އެއްޗެއް ނޭނގޭ ގޮތަށެވެ. އެ ކަހަލަ އިޝާރާތެއް ވެސް ނުވާ ގޮތަށެވެ. މީހަކަށް އެ ފަދަ ޝައްކެއް ވިޔަ ނުދެއެވެ. އަޒްމީލްގެ އެ ކަމަށް އަހަރެން ތަރުހީބު ދެމެވެ. އޮފީހުގެ ގިނަ އަންހެން ކުދިންގެ ލޯތައް އޭނާއަށް އަމާޒުވެފައި ހުންނަކަން އަހަރެންނަށް އެނގެއެވެ. އެ ކަންކަން ފާހަގަ ކުރެވެން ފެށިއެވެ. އެ ކަމާ ހަސަދަލެވެން ފެށިއެވެ. އަޒްމީލްގެ މެސެޖަކަށް ނުވަތަ ކޯލަކަށް އިންތިޒާރު ކުރެވެއެވެ. ކޮންމެ ރެއަކު ނިދެނީ ފޯނަށް ބަލަން އޮއްވައެވެ. އަހަރެން ހިތަށް އަރައެވެ. އަޒްމީލް ފާޅުގައި އަހަރެންނަށް ލޯބި ހުށައަޅާނީ ކޮން އިރަކުންބާއެވެ. އަހަރެން ކެތްކުރާނަމެވެ. އެ ދުވަހަކަށް އިންތިޒާރު ކުރާނެމެވެ.
އޮފީހުން ނުކުމެ ސައިކަލަށް އެރީމެވެ. ސައިކަލުގެ މުއްގަނޑުގައި އަޅުވާލާފައި ހުރި ކުޑަ ކޮތަޅެއް ފާހަގަވިއެވެ. ކޮތަޅުގެ އެތެރެ ބަލާލީމެވެ. އޮތީ ކުޑަކުޑަ ޕާރުސަލެކެވެ. ކުރީ ދުވަހު ލިބުނު ކަހަލަ ޕާރުސަލެކެވެ. އަހަރެންނަށް އުފަލުން ހުރެވުނުތަން ވެސް ނޭނގުނެވެ. މަޑުމަޑުން ޕާރުސަލް ކަނޑާލީމެވެ. އެތެރޭގައި އޮތީ ހަމަ އެ ކަހަލަ ފެނިފެންމަލެކެވެ. މަލުގެ އެތެރޭގައި ލިޔެފައި އޮތީ "ވަރަށް ހަނދާންވޭ" މިހެންނެވެ. އަހަރެން ވަށައިގެން ހޯދާލީމެވެ. އަޒްމީލް ފެންނާކަށް ނެތެވެ. ހިތަށް އެރިއެވެ. ކޮންމެ ވެސް ތަނެއްގައި ފިލާ ހުންނާނެއެވެ. އަހަރެންނާ ދިމާލަށް ބަލާނެއެވެ.
އޮފީހުގައި ކެއުމެއް އޮތް ދުވަހެކެވެ. އެއީ އޮފީސް ކުއްޖެއްގެ އުފަންދުވަހެވެ. ނަމަކީ ޒަރާއެވެ. ޒަރާއަކީ ވެސް އަހަރެން ހިތުގައި ހަސަދަލައިގެން އުޅޭ ކުއްޖެކެވެ. ސަބަބުތައް ގިނައެވެ. ހުރިހާ ގޮތަކުން ވެސް އަހަރެންނަށް ވުރެ ކުރިއަރައި ދިޔުމެވެ. ހުރިހާ ފިރިހެނުން ޒަރާގެ ރީތި ވާހަކަ ދައްކައެވެ. އޭނާ ހީލާ ގޮތެވެ. އޭނާ ހިނގާ ގޮތެވެ. އޭނަގެ ކޮންމެ ސިފައަކަށް ފިދާވާ ފިރިހެނުންތައް ގިނައެވެ. އެކަމަކު އެކަން ގަބޫލުކުރާކަށް އަހަރެން ބޭނުމެއް ނޫނެވެ. އެ މަގާމު ލިބެން ޖެހޭނީ އަހަރެންނަށެވެ.
ކެއުމުގެ ތެރޭގައި އެކަކު އަނެކަކަށް ހީ ސަމާސާ ކުރެވެމުން ދިޔައެވެ. އަޒްމީލް ގާތުގައި ޒަރާ ގިނަ ވަގުތު ހޭދަ ކުރިއެވެ. އެ ގޮތް އަހަރެންނަކަށް ކަމަކު ނުދިޔައެވެ. ނަމަވެސް މާހައުލަށް ވިސްނާފައި އަހަރެން ހަނު ހުރީއެވެ. އެ ވަގުތު ހިތުގައި ވަރަށް ގިނަ ސުވާލު އުފެދުނެވެ. އަޒްމީލް ލޯބިވާ ނަމަ އެކަން ފާޅުގައި ނުބުނަނީ ކީއްވެ ހެއްޔެވެ؟ އަހަރެން އަޒުމް ކަނޑައަޅައިގެން ހުރީ އިސްވެ އަހަރެން ނުބުނާށެވެ. ލޯބިވާ ވާހަކަ ފުރަތަމަ ބުނަން ޖެހޭނީ ފިރިހެނުންނެވެ. ކައިވެނި ކުރަން ހުށައަޅަން ޖެހޭނީ ވެސް ފިރިހެނުންނެވެ. އެ މީހުންނަށް ކެރެން ޖެހޭނެއެވެ. އަޒްމީލް ޖެހިލުންވަނީ ކޮން ކަމަކާ ހެއްޔެވެ؟ ފަސްޖެހެނީ ކޮންކަމަކާ ހެއްޔެވެ؟ ހަގީގީ ލޯބިވާނަމަ އެކަން ޖެހޭނީ އެންމެންގެ ކުރިމަތީގައި ހާމަ ކުރާށެވެ. އަހަރެން އަތުގައި ހުރި ތަށި ވެއްޓުނީ އެ ވަގުތުއެވެ. ބިއްލޫރި ތަށްޓެއްކަމުން ތަޅައިގެން ދިޔައެވެ. އެންމެންގެ ސަމާލުކަން އަހަރެންނާ ދިމާލަށް ހުއްޓުނެވެ. އަޒްމީލްއާއި ޒަރާ ވެސް ބަލަހައްޓައިގެން ތިއްބެވެ. އަހަރެންގެ މޫނުމަތީގައި ވަނީ ހިތްހަމަނުޖެހުމެވެ. އެތަނުން ނުކުތީމެވެ. އަދި ބެލްކަންޏަށް ދިޔައީމެވެ.
ކޯތާފަތްމަތީ ތެތްކަމެއް އިހުސާސް ކުރެވުމުން އަތްލީމެވެ. ލޮލުން ފައިބަމުން ދިޔައީ ކަރުނައެވެ. އަހަރެން ކަހަލަ މީހެއްގެ ލޮލުން ކަރުނަ އައުމަކީ ވަރަށް ނާދިރު ކަމެކެވެ. އެއީ ވެސް ފިރިހެނަކަށްޓަކައެވެ. އަހަރެން ގަބޫލު ކުރާ ގޮތުގައި އަހަރެންނަށް ވިސްނޭނީ އެންމެ ރަނގަޅަށެވެ. އެއީ ކޮންމެ ދާއިރާއަކުން ކަމުގައި ވިޔަސް ވެހެވެ. ދިރިއުޅުމުގެ ހުރިހާ ކަމެއް އަހަރެންނަށް އެނގޭނެއެވެ. ކޮންމެ ކަމެއް ކޮންމެ ގޮތަކަށް ވިޔަސް އެ ކަމުގެ ހައްލު އަހަރެންނަށް ލިބޭނެއެވެ.
ފަހަތުގައި މީހަކު ހުރިހެން ހީވެގެން ފަހަތް ބަލައިލީމެވެ. ހުރީ އާދިލްއެވެ. އެއީ އަހަރެންނާ އެކު އޮފީހަށް ވަން މީހެކެވެ. އޭނާ ހިނިތުންވެލިއެވެ. އަދި ޓިޝޫއެއް ދިއްކޮށްލިއެވެ. ބަދަލުގައި އަހަރެން އެތަނުން ދިޔައީމެވެ. އިތުރަށް ފޫހިކަން ގެނުވީ އަނެއްކާ ވެސް އެ މަންޒަރު ފެނުމުންނެވެ. އަޒްމީލްއާއި ޒަރާގެ އިތުރުން ސީމާ ވެސް އެ މީހުންނާއެކު ހެނީއެވެ. ސީމާއަކީ އޮފީހުގައި އަހަރެންނާ އެންމެ ގާތްކޮށް އުޅޭ ކުއްޖާއެވެ. އޮފީހުން ނުކުމެގެން ސައިކަލުގައި ދުއްވާލީމެވެ. ދާނެ ވަކި މަންޒިލެއް ނެތި މަޖީދީ މަގުން ދިޔައީ އިރުމަތީ ކޮޅަށެވެ. ލޮލުގައި އަޅާފައިވާ އަވި އައިނުގެ ދަށުން ކަރުނަތައް ފައިބަމުން ދިޔައެވެ. ހިތުގައި ވަކި އަޅަމުން ދިޔައީ އަޒްމީލްއާއި ޒަރާ ހެމުން ދިޔަ މަންޒަރެވެ. ސައިކަލުގެ މުށްގަނޑަށް ބާރު ކުރެވެމުން ދިޔައެވެ. ބޮލުތެރޭގައި އެނބުރޭ ހައިޖާނުގަނޑަށް އެއްވެސް ލުޔެއް ނުލިބެއެވެ. ގޯޅިއަކުން ނުކުތް ސައިކަލެއްގައި ނުޖެހުނީ ކިރިޔާއެވެ. އަހަރެންނަށް ސައިކަލު މަޑު ކުރެވުނެވެ. އަދި ވަރަށް ބާރަށް ނޭވާ ލެވެމުން ދިޔައެވެ.
ޖެހިގެން އައި ދުވަހު އަހަރެން އޮފީހަކަށް ނުދަމެވެ. އެނދުގައި އޮތީއެވެ. މެންދުރު ވީ އިރު ވެސް އެނދުން ނުތެދުވަމެވެ. ކިތަންމެ ފަހަރަކު މަންމަ ގޮވިއެވެ. އެކަމަކު ނުތެދުވަމެވެ. ކައިރީގައި ދެ ފިނިފެންމާ އޮތެވެ. ދެ މަލުގައި ވެސް ފިރުމާލީމެވެ. މީހަކު ދޮރުގައި ޓަކި ޖަހާލިއެވެ. އެއީ މަންމަ ނޫންކަން ޔަގީންވީ ޓަކި ޖެހީމައެވެ. ދެން އިވުނީ ފޯނުގެ ރަނގަބީލެވެ. ސީމާގެ ނަން ފެނުމުން އިތުރަށް ފޫހިވިއެވެ. ބާލީސް ދަށަށް ފޯނު ލާފައި މޫނު އަނެއް ފަރާތަށް އަނބުރާލީމެވެ. އަޒްމީލްގެ މެސެޖަކަށް އިންތިޒާރު ކުރާތާ ކިތަންމެ އިރެކެވެ. އޭނާގެ އެއްވެސް ހަބަރެއް ނުވިއެވެ. އެންމެ ފަހުން ތެދުވެ ފެންވަރާލީމެވެ. އަދި ރީތި ހެދުމެއް ލައިގެން އޮފީހަށް ދިޔައީމެވެ. އަހަރެންނަކީ ކިތަންމެ ގޮތްދޫނުކުރާ މީހަކަށް ވިޔަސް މިއަދު މި ޖެހުނީ ހަތިޔާރު ބަހައްޓާށެވެ. ހިތަށް ވިސްނައިދިނުމަކީ ބޭކާރު ކަމެކެވެ.
އޮފީހަށް ވަދެފައި އަޒްމީލް އިން ކެބިންއަށް ވަނީމެވެ. ފުރަތަމަ ބުނާނީ ކީކޭ ކަމެއް ނުވިސްނުނެވެ. އަޒްމީލް އިނީ ގަނޑުތަކެއް މޭޒުމަތީ އަތުރައިގެން އެއަށް ގެއްލިފައެވެ. އިސް އުފުލާ ބަލާވެސް ނުލައެވެ. ކުރިމަތީ ހުރީ ކާކު ކަމެއް ވެސް ނޭނގެއެވެ. އަހަރެން ހުރީ ހަރަކާތްކޮށްލަން ނޭނގިފައެވެ. ބުނާނެ އެއްޗެއް ވިސްނުމަކަށް ނައެވެ. އެ ވަގުތު އޭނާ ބަލާލިއެވެ. އަދި ކިހިނެއްވީތޯ އަހާލިއެވެ. އަހަރެން ގަދަކަމުން ހިނިތުންވެވޭތޯ އުޅުނީމެވެ. އެއްޗެއް ބުނަން އަނގަ ހުޅުވާލި ވަގުތު އެތަނަށް އެހެން މީހަކު ވަނެވެ. އަހަރެން އަވަސް އަވަހަށް ނުކުތީމެވެ. ގޮނޑީގައި އިށީނދެފައި ދެލޯ މަރާލީމެވެ. ފުންނޭވައެއް ބޭރުކޮށްލެވުނެވެ. ދަބަހުގައި އޮތް ދެ ފިނިފެންމަލަށް ބަލާލީމެވެ. އެ ވަގުތު ސީމާއައެވެ. އަވަސް އަވަހަށް ދެ މާ ފޮރުވީމެވެ. އޭނަގެ ފޯނު ނުނެގީ ކީއްވެތޯ ސުވާލު ކުރިއެވެ. އޮފީހަށް ނައީ ކީއްވެތޯ ވެސް އެހިއެވެ. އަހަރެން އިނީ ބޮލަށް އުނދަގޫވެފައެވެ. އެ ސުވާލުތަކަށް ޖަވާބުދޭކަށް ބޭނުމެއް ނޫނެވެ. އެއަށް ވުރެ މުހިންމު ސުވާލުތައް އަހަރެންގެ ބޮލު ތެރޭގައި އެނބުރެމުން ދިޔައެވެ. އެންމެ ފަހުން ސީމާ އެތަނުން ފޮނުވާލީމެވެ. އަދި މަސައްކަތާއިގެން ކުރިއަށް ދެވޭތޯ އުޅުނީމެވެ.
އޮފީހުގެ މަސައްކަތު މީހާ އައެވެ. އަދި ޕާރުސަލެއް ދިއްކޮށްލިއެވެ. އެއީ ވެސް ހަމަ އެ ކަހަލަ ކުޑަކުޑަ ޕާރުސަލެކެވެ. ކާކުތޯ ދިނީ އަހާލުމުން ބުނީ ކާކުކަން ނޭނގޭ ކަމަށެވެ. ހަމައެކަނި އެނގެނީ އެ މީހަކު ހުރީ މާސްކެއް އަދި ތޮތްޕެއް އަޅައިގެންކަމެވެ. އަހަރެން ބަލާލީ އަޒްމީލް ކޮބާތޯއެވެ. އޭނާ ފެންނާކަށް ނެތެވެ. ޕާރްސަލް ކަނޑާލީމެވެ. އޮތީ ފިނިފެންމަލެކެވެ. ލިޔެފައި އޮތީ "ވަރަށް ކަމުދޭ" މިހެންނެވެ. އަޒްމީލް ލޯބި ހުށައަޅާ ގޮތް ތަފާތީ ހެއްޔެވެ؟ ލޯބިވާ ވާހަކަ ބުނާނީ ކޮން އިރަކުން ހެއްޔެވެ؟ އިންތިޒާރު ކުރެވެމުން ދިޔައީ އެ ދުވަހަކަށެވެ.
އޮފީހުގެ އެކި މީހުންގެ ފަރާތުން އަޒްމީލްގެ ގިނަ ކަންކަން އެނގުނެވެ. އޭނައަށް އެންމެ މީރީ ލަޒާނިއާއެވެ. އެންމެ މީރު ބުއީމަކީ ކުރުނބާ ފަންޏެވެ. އެންމެ ކަމުދާ ސެންޓަކީ ސޯވޭޖްއެވެ. އެންމެ ރީތި ކުލައަކީ ކަޅުކުލައެވެ. އަހަރެންނަށް ވެސް އެ ގޮތްތަށް ކަމުދާން ފެށިއެވެ. ލަޒާނިއާއަކީ އަހަރެންނަށް ކުރިން ވަރަށް ނުބައި އެއްޗެކެވެ. ނަމަވެސް މިހާރު މީރެވެ. ކަޅުކުލައަށް ލޯބިކުރަން ފެށުނެވެ. އަޒްމީލްގެ ނަންބަރު ހޯދީމެވެ. ފޯނުގައި ސޭވް ކުރީ "އޭ" އަކުރެއް ޖަހާފައި ހިތެއް ޖަހާފައެވެ. މި ކުރެވޭ އިހުސާސްތަކަކީ ލޯބި ހެއްޔެވެ؟ ހިތާހިތުން ސުވާލު ކުރެވުނެވެ. އަޒްމީލަށް ކުރެވެމުން ދިޔަ ޝައްކު ހުއްޓާލީމެވެ. މި ގުޅުމަކީ ތެދުވެރި، ވަފާތެރި ގުޅުމަކަށް ހެދުމަށް އަޒުމް ކަނޑައެޅީމެވެ.
ކުރިއަށް އޮތީ ރަމަޝާންމަހެވެ. ހުރިހާ އެންމެން ބޭނުންވީ ދަތުރެއް ދާށެވެ. ހަފުތާ ބަންދާ ދިމާކޮށް އެންމެން ތައްޔާރުވިއެވެ. ކޮންމެ މީހަކު އެ މީހަކު ގެންދަން ބޭނުންވާ، އާއިލާގެ އެކަކަށް ފުރުސަތު ދިނެވެ. އަހަރެން ގެންދަން ބޭނުންވަނީ އެންމެ މީހެކެވެ. އޭނާ މި ދަތުރުގައި ބައިވެރިވެއެވެ. އަހަރެންގެ ތުންފަތަށް ލާނެތް ހިނިތުންވުމެއް ވެރިވިއެވެ. ދަބަސްތައް ހިފައިގެން އެންމެން ލޯންޗަށް އެރިއެވެ. އަހަރެންނާ ޖެހިގެން އިނީ އާދިލްއެވެ. ކުރިމަތީ އިނީ ސީމާއެވެ. އެންމެ ކުރީ ގޮނޑިތަކުގައި ތިބީ އަޒްމީލްމެންނެވެ. އެތަނުގައި ތިބީ ސީދާ ކޮންބައެއް ކަމެއް ނުފެނުނެވެ. ބައެއް މީހުން ކޮޅަށް ވެސް ތިއްބެވެ. އަރަމުން ދިޔަ އިރަށް ބަލާލީމެވެ. އާ ދުވަހަކަށް، އާ ދުންމީދުތަކަކާއެކު ދުވަހަށް މަރުހަބާ ކިއެވެ. މަޑުމަޑުން ލޯ މަރާލީމެވެ. އެ ވަގުތު ފެނުނީ އަޒްމީލެވެ. އެ ހިނިތުންވުމެވެ. އެކަމުގެ އަސަރު އަހަރެންގެ ތުންފަތަށް ވެސް ވެރިވިއެވެ.
ކުޑަ އިރުކޮޅެއްގެ ތެރޭގައި އެ ރަށަށް ދެވުނެވެ. ހުރިހާ އެންމެން ފައިބަން ފެށިއެވެ. ދޮންވެލިގަނޑުގައި ފައިޖެހުމުން މުޅި ހަށިގަނޑަށް އާ ދިރުމެއް ލިބުނު ކަހަލައެވެ. އެކި މީހުން އެކި މަސައްކަތާއިގެން ކުރިއަށް ދިޔައެވެ. ޓެންޓްތައް އަޅަން ފެށިއެވެ. އަނެއް ބަޔަކު މޫދަށް އެރުނެވެ. ދެން ތިބި މީހުން ކެއްކުމުގެ ކަންކަމަށް ތައްޔާރުވާން ފެށިއެވެ. އަހަރެން ބެލީ އަޒްމީލް ކޮބާތޯއެވެ. އޭނާ ފެންނާކަށް ނެތެވެ. ރާޅު ޖަހާ ހިސާބުގައި އަހަރެން ހިނގަމުން ދިޔައީމެވެ. މިއީ ފަޅު ރަށަކަށް އަހަރެން އައި ފުރަތަމަ ފަހަރެވެ. ވަކި ހިސާބަކަށް ދެވުނު ތަނާ އަޒްމީލް ފެނުނެވެ. އޭނާ ހުރީ ފުރަގަސް ދީގެންނެވެ. އަހަރެން ދުވެފައި އަޒްމީލްއާ ދިމާލަށް ދިޔައީމެވެ. އެ ވަގުތު އޭނާގެ ކުރިމަތިން މީހަކު އޭނާގެ ހަށިގަނޑުގައި ބައްދާލިއެވެ. އަހަރެންނަށް ހުރެވުނުތަން ވެސް ނޭނގުނެވެ. ގަސްތަކާ ނިވާވެ ހުރީމެވެ. ކުޑަ ހިނދުކޮޅެއްގެ ތެރޭގައި ކާކުކަން ފެނުނެވެ. އެއީ ކުރިން ފެނުނު މީހެކެވެ. އަޒްމީލްގެ ކެބިން ތެރެއިންނެވެ. އަހަރެންގެ ހިތުގައި ކަނި ޖަހަމުން ދިޔަ ހުޅުކޮޅު ނިވުނެވެ. ހިނދުކޮޅެއްގެ ތެރޭގައި އަޅިއަށް ބަދަލުވެ ނިމިއްޖެއެވެ. ދަބަހުގައި އޮތް ތިން ފިނިފެންމާ ނަގާފައި މޫދާ ދިމާލަށް އެއްލަން އުޅުނީމެވެ. އެ ވަގުތު އަތުގައި މީހަކު ހިފެހެއްޓިއެވެ. އަދި އަހަރެންގެ އަތު ތެރެއަށް ލައިދިނީ ހަމަ އެ ކަހަލަ ފިނިފެން މަލެކެވެ. އޭގައި ލިޔެފައި އޮތީ "ވަރަށް ލޯބިވޭ" މިހެންނެވެ. އަހަރެން އިސް އުފުލައި ބަލާލީމެވެ. އެއީ އާދިލްއެވެ. ލޮލުން ފައިބަމުން ދިޔަ ކަރުނަތައް ފުހެލީމެވެ. އަދި ހިނިތުންވެލީމެވެ. އާދިލްގެ ލޯތްބަށް އަހަރެންގެ ހިތުން ޖާގަ ދިނީމެވެ. ތިމާދެކެ ތެދުވެރި ލޯބިވާ މީހަކު ލިބުމަކީ ނަސީބެކެވެ. (ނިމުނީ)
ނޯޓް: މިއީ މި ރޯދަ މަހު "މިހާރު" އިން ބާއްވާ ކުރުވާހަކަ މުބާރާތަށް ހޮވިފައިވާ ވާހަކައެކެވެ.