އަލްއަބްރާރް ގުރޫޕުގެ ހަވާލުގައި އުމްރާ އަށް ފުރުމަށް އިއްޔެ ރޭ ހަމަޖެއްސި 110 މީހުންގެ ދަތުރު ކެންސަލްކުރީ މަގުބޫލު ސަބަބެއް ނެތިކަން މިހާތަނަށް ބެލިބެލުމުން އެނގޭތީ އެ ގުުރޫޕަށް ދީފައިވާ ހުއްދަ ވަގުތީ ގޮތުން އިސްލާމިކް މިނިސްޓްރީން މިއަދުން ފެށިގެން ސަސްޕެންޑުކޮށްފި އެވެ.
އެ މިނިސްޓްރީން ނެރުނު ނޫސްބަޔާނެއްގައި ބުނީ، އަބްރާރު ގުރޫޕުގެ ހަވާލުގައި އުމްރާ އަށް ފުރަން ހަމަޖެއްސި މީހުންގެ ދަތުރު އެންމެ ފަހު ވަގުތު ކެންސަލްކުރި މައްސަލާގައި ޝަކުވާ ލިބުމުން އެ މައްސަލަ ބަލަމުން އަންނަ ކަމަށެވެ.
މިހާތަނަށް ބެލި ބެލުމުން އެނގުނީ އިސްލާމިކް މިނިސްޓްރީން ބުނި ގޮތުގައި، ދަތުރު ކެންސަލް ކޮށްފައި ވަނީ މަގުބޫލު އެއްވެސް ސަބަބެއް ނެތި، ރާއްޖެ އިން މީހުން އުމްރާ އަށް ގެންދިއުމުގެ އުސޫލާ ހިލާފަށެވެ.
"މި ސަބަބަށްޓަކައި، މި ކުންފުންޏަށް ދޫކުރެވިފައިވާ ދިވެހިރާއްޖެ އިން މީހުން އުމްރާ އަށް ގެންދިއުމާ ބެހޭ ހުއްދަ ވަގުތީ ގޮތުން ހިފަހައްޓައި، އެކަން އެ ކުންފުންޏަށް މިހާރު ވާނީ އަންގައިފަ އެވެ،" ނޫސްބަޔާނުގައި ވެ އެވެ.
މިނިސްޓްރީން ބުނީ، އަބްރާރު ގުރޫޕުން އަމަލުކުރި ގޮތާ ގުޅޭ މައްސަލަ އިތުރަށް ބަލައި، އުސޫލުގެ ތެރެއިން އަޅަންޖެހޭ ފިޔަވަޅުތައް އެ ކުންފުންޏާ ދެކޮޅަށް އަޅާނެ ކަމަށެވެ.
އިސްލާމިކް މިނިސްޓްރީން މިހާރު އަންނަނީ އަބްރާރް ގުރޫޕުގެ ސަބަބުން އުމްރާ އަށް ނުފުރި ތިބި މީހުންނަށް އެހީތެރިކަން ފޯރުކޮށްދެވޭނެ ގޮތްތައް ވެސް ބަލަމުން ކަމަށް ބުންޏެވެ.
އެ ގުރޫޕުގެ ހަވާލުގައި އުމްރާ އަށް ފުރުމަށް އިއްޔެ ރޭ ހަމަޖެހުނު މީހުންގެ ތެރެއިން ނުފުރުނު 28 މީހަކަށް ހައްޖު ކޯޕަރޭޝަނުން ޖާގަ ހަމަޖައްސައިދީފައިވާ ކަމަށް އެ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް އިއްޔެ ވިދާޅުވެފައި ވެ އެވެ.
އަބްރާރުން އުމްރާ ދަތުރު ކެންސަލް ކުރިކަން އަންގައި ސަބަބެއް ކަމަށް ބުނީ، މިހާރު މެދުއިރުމަތީގައި ހިނގަމުންދާ ހަނގުރާމަ އަށް މި މަހުގެ 26 ގެ ފަހުން ވެސް ވާނެ ގޮތެއް ނޭނގޭތީ ކަމަށެވެ.
އެ ގުރޫޕުގެ ހަވާލުގައި އުމްރާ އަށް ފުރަން ތައްޔާރުވި މީހުން ތުހުމަތުކުރާ ގޮތުގައި ރޯދަ އުމްރާ އަށް މީހުން ގެންދިއުމުގެ ހުއްދަ އާއި ވިސާ އާއި ހޮޓަލަށް ވެސް ފައިސާ ދައްކައިފައެއް ނެތެވެ.
އަބްރާރުގެ ހަވާލުގައި އުމްރާ އަށް ފުރަން އުޅުނު މީހުންގެ ދަތުރު ތާވަލް ކޮށްފައި އޮތީ މިދިޔަ އަންގާރަ ދުވަހުން ފެށިގެން މި މަހުގެ 26 ގެ ނިޔަލަށެވެ.