އަލް އަބްރާރް ގްރޫޕުގެ ހަވާލުގައި އުމްރާ އަށް ފުރުމަށް ރޭ ހަމަޖެހުނު 110 މީހަކަށް އުމްރާ އަށް ނުފުރުނު މައްސަލައެއް ފެންމަތިވެއްޖެ އެވެ.
އެ މައްސަލާގައި ރޭގައި ބަޔަކު ވަނީ އެ ޖަމާއަތުގެ އޮފީސް ހުންނަ ސަރަހައްދަށް އެއްވެ ކަންބޮޑުވުން ފާޅުކޮށްފަ އެވެ.
އެ ސަރަހައްދުގައި ތިބި މީހުން ބުނެފައިވާ ގޮތުގައި އުމްރާ އަށް ފުރުމުގެ ކުރިން އެ ދުވަހުގެ ހެނދުނު ދަބަސްތައް ގެންދިއުމަށް އެންގި އެވެ. އެކަމަކު ފަހުން އެންގީ އެއާޕޯޓަށް ދަމުން ދަބަސް ގެންދިއުމަށް ކަމަށް ފައިސާ ދެއްކި މީހަކު ބުންޏެވެ.
އޭނާ ބުނި ގޮތުގައި އެ އެންގުމަށް ފަހު، ގްރޫޕުން ވަނީ ކުއްލި ބައްދަލުވުމެއް ބާއްވައިފަ އެވެ. އުމްރާ ދަތުރު ކެންސަލް ކުރިކަން އެ ބައްދަލުވުމުގައި އަންގައި ސަބަބެއް ކަމަށް ބުނީ، މިހާރު މެދުއިރުމަތީގައި ހިނގަމުންދާ ހަނގުރާމަ އަށް މި މަހުގެ 26 ގެ ފަހުން ވެސް ވާނެ ގޮތެއް ނޭނގޭތީ ކަމަށެވެ.
އެ މައްސަލާގައި ނުރުހުންވެ، އެ މީހާ ބުނީ 110 މީހުންގެ ފުރުން ކެންސަލް ކުރިއިރު، އެންމެން ވެސް ތިބީ ރޯދަ އުމުރާއަށް ދިއުމުގެ ހުރިހާ ތައްޔާރީތަކެއް ވެގެން ކަމަށެވެ.
އެކަމާ ގުޅިގެން ބަޔަކު ވަނީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ވެސް ފޯނުން ގުޅައި އެ މައްސަލަ އޭނާގެ ސަމާލުކަމަށް ގެނެސްފަ އެވެ.
އެ މީހުން އުމްރާ އަށް ފުރުމުގެ އިންތިޒާމު ހަމަޖެހިފައިވާ ނަމަ ރޭގައި ފުރުވައިލަން މިނިސްޓަރު އެންގެވި އެވެ. އަދި ހަނގުރާމައިގެ ސަބަބުން އުމްރާގެ އަޅުކަމަށް އެއްވެސް ނުރައްކަލެއް ނެތް ކަަމަށާއި އެހެންވެ އެ މީހުން ފުރުވާލަން ޖެހޭނެ ކަމަށް މިނިސްޓަރު ޝަހީމް އެންގެވި ކަމަށް ވެ އެވެ.
އެ މީހުން ތުހުމަތުކުރާ ގޮތުގައި ރޯދަ އުމްރާ އަށް މީހުން ގެންދިއުމުގެ ހުއްދަ އާއި ވިސާ އާއި ހޮޓަލަށް ވެސް ފައިސާ ދައްކައިފައެއް ނެތެވެ.
އެ މައްސަލާގައި އެ ކުންފުނީގެ އޮފީސް ދޮށަށް އެއްވެ މީހުން ވަނީ އެ މީހުންގެ ރިފަންޑު ދިނުމަށް އާދޭސްކޮށްފަ އެވެ. އެހެންވެ ޓިކެޓު ފައިސާ ފިޔަވައި އެހެން ހުރިހާ ހަރަދަކަށް ރިފަންޑު ދިނުމުގެ މަސައްކަތް ރޭގައި ކޮށްފައިވެ އެވެ.
އެ ގްރޫޕްގެ ހަވާލުގައި އުމްރާއަށް ދާން އޮތް އާއިލާއެއްގެ މެމްބަރަކު "މިހާރު" އަށް ބުނީ، ޓިކެޓަށްވާ 15،000ރ. ކެނޑުމަށް ފަހު، އެއްބައި މިހާރު ވަނީ ބައެއް މީހުންނަށް އަނބުރާ ދީފައި ކަމަށެވެ. އުމްރާގެ އަޅުކަމަށް ދިއުމަށް 45،000ރ. އެ މީހުން ދެއްކި އެވެ.
އިކޮނޮމިކް މިނިސްޓްރީގެ ބިޒްނަސް ރަޖިސްޓްރޭޝަން ޕޯޓަލުގައިވާ ގޮތުން އަލް އަބްރާރް ގްރޫޕުގެ ހިއްސާދާރުންގެ ގޮތުގައި ތިން މީހަކު އެބަ ތިއްބެވެ. އެއީ އަހުމަދު އައްފާން ޝާފީ އާއި އާދަމް ބިންޔާމިން އަދި ޔޫސުފް ސިދްގީ އެވެ.
އެކަމާ ގުޅިގެން ބައެެއް މީޑިއާތަކަށް އެ ކުންފުނިން ބުނެފައިވާ ގޮތުގައި ރީފަންޑު ދިނުމުގެ މަސައްކަތް ކުރަނީ ދީލަތި ބައެއް ފަރާތްތަކުގެ އެހީގަ އެވެ. އެއީ އުމްރާއަށް ދިއުމަށް މީހުން ދެއްކި ފައިސާ، އެ މީހުން އުމްރާ އަށް ގެންދިއުމުގެ ކަންކަމަށް ހަރަދު ކުރުމުންނެވެ. އަދި ޓިކެޓާއި ހޮޓެލް ބުކިން އަށް ފައިސާ ދައްކާފައިވާ ކަމަށް އެ ކުންފުނިން ބުނެފައިވެ އެވެ.
އުމްރާއަށް މީހުން ގެންދިއުމުގެ ފަސް ދުވަސް ކުރިން މިނިސްޓްރީއަށް އުމްރާ ގެންދާ މީހުންގެ ލިސްޓާއި ތިބޭ ހޮޓަލާއި ވިސާގެ މައުލޫމާތު ފޮނުވަން ޖެހެ އެވެ.
އެކަމަކު، އަލް އަބްރާރް ގްރޫޕުން ބުނަނީ އެ ޑޮކިއުމަންޓުތައް އިސްލާމިކް މިނިސްޓްރީ އަށް ފޮނުވި ނަމަވެސް އޭގެ މައުލޫމާތެއް އެ މިނިސްޓްރީއަކު ނެތެވެ. ހާއްސަ ތަހުގީގެއް އިސްލާމިކް މިނިސްޓްރީން ކުރަނީ އެހެންވެ ކަމަށް ޖަމާއަތުން ތުހުމަތު ކުރެ އެވެ.
އެެހެންވެ، އެކަން ހިނގައިދިޔަ ގޮތް އެންގުމަށް މިނިސްޓްރީ އަންގާފައި އޮތުމުން، އެ ހުރިހާ މައުލޫމާތެއް މިނިސްޓްރީ އަށް ހިއްސާކުރާނެ ކަމަށް ވެސް ބުންޏެެވެ.
އެކަމާ ގުޅިގެން ސުވާލުކުރުމުން އިސްލާމިކް މިނިސްޓްރީން ބުނީ އަލް އަބްރާރް ގްރޫޕަކީ އުމްރާ އަށް މީހުން ގެންދިއުމުގެ ހުއްދަ އޮތް ކަމަށް އޭޕްރީލް، 2025 ގައި ނެރެފައިވާ ލިސްޓުގައި ވެސް ހިމެނޭ ކުންފުންޏެެއް ކަމަށެވެ. އެކަމާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ވެސް އިސްލާމިކް މިނިސްޓްރީން ބުންޏެވެެ.