ކުށުގެ ވެށީގައި ހަރަކާތްތެރިވާ ގްރޫޕަކީ ގޭންގެއް ކަމަށް ކަނޑައެޅުމަށާއި އެ ގްރޫޕުން ހިންގާ ހުރިހާ ކުޅިވަރު ހަރަކާތްތައް ހުއްޓުވައި އަދި ގްރޫޕަށް ނިސްބަތްވާ މީހުންނަކީ ގޭންގް މެމްބަރުން ކަމަށް ކަނޑައަޅަން ފުރަތަމަ ފަހަރަށް ޕްރޮސެކިއުޓާ ޖެނެރަލްގެ އޮފީހުން (ޕީޖީ) ހައި ކޯޓަށް ހުށަހެޅި މައްސަލައިގެ ޝަރީއަތް ސިއްރު ކޮށްފި އެވެ.
މިދިޔަ އަހަރު އަމަލުކުރަން ފެށި ގޭންގް ކުށުގެ ގާނޫނުގެ ދަށުން، އައްޑޫގައި ހަރަކާތްތެރިވާ "ސްކޫޕް" ގްރޫޕަކީ ގޭންގެއް ކަމަށް ކަނޑައަޅަން ހުށަހެޅި މައްސަލައިގެ އިބްތިދާއީ އަޑުއެހުމެއް ބޭއްވި އެވެ. އެއީ މައްސަލަ ކުރިއަށް ގެންދާނެ ގޮތަކާ މެދު ގޮތެއް ކަނޑައަޅަން ބޭއްވި އަޑުއެހުމެކެވެ.
ރޭ ކުރިއަށް ގެންދިޔަ އަޑުއެހުމުގައި މައްސަލަ ބަލާ ބެންޗުން ނިންމީ ޝަރީއަތް އާންމުކޮށް ހުޅުވާ ނުލާ ކުރިއަށް ގެންދާށެވެ.
މައްސަލައިގެ އަޑުއެހުންތައް ހުޅުވާލައިގެން ކުރިއަށް ގެންދެވިދާނެތޯ ސުވާލު އުފައްދައި ސްކޫޕް ގުރޫޕުގެ ފަރާތުން ވެސް ހައި ކޯޓަށް އިޖުރާއީ ނުކުތާކެއް ހުށަހެޅި އެވެ. އެގޮތުން، އެއީ ގޭންގެއް ކަމަށް ކަނޑައަޅާ ހާލަތުގައި ގޭންގަށް ނިސްބަތްވާ މީހުންގެ މައްޗަށް ދަށު ކޯޓުގައި ޝަރީއަތްތައް ކުރިއަށް ގެންދާއިރު، މި މައްސަލަ ހުޅުވާލައިފި ނަމަ އެ ޝަރީއަތްތަކަށް އަސަރު ފޯރާނެ ކަން ފާހަގަކޮށްފައިވެ އެވެ.
ހައި ކޯޓުގައި މި މައްސަލަ ބައްލަވަނީ ފަނޑިޔާރު މުހައްމަދު ޝަނީޒް އަބްދުﷲ އާއި ފަނޑިޔާރު އަބްދުއްމާނިއު ހުސައިން އަދި ފަނޑިޔާރު އިބްރާހީމް މާހިރެވެ.
ޕީޖީ އޮފީހުން މައްސަލަ ކޯޓަށް ހުށަހެޅީ "ސްކޫޕު" ގްރޫޕަކީ ގޭންގުތަކުން ހިންގާ ކުށްތަކާއި އެ ނޫން ވެސް ނުރައްކާތެރި ކުށްތައް ހުއްޓުވުމުގެ ގާނޫނުގެ ދަށުން އިންތިޒާމުވެފައިވާ ކުށްކުރާ ގްރޫޕެއްގައި ހުންނަ ޝަރުތުތައް ފުރިހަމަވާ އަދި މިހާރު ވެސް އެކަމުގައި ހަރަކާތްތެރިވާ ގްރޫޕެއް ކަމަށް ބުނެ އެވެ.
އެހެންވެ ގާނޫނުގައި ބަޔާންކޮށްފައިވާ ގޮތުގެ މަތިން "ސްކޫޕު" އާއި "ސްކޫޕު ކަންމަތި" ނުވަތަ "SKP” ގުރޫޕަކީ ކުށްކުރާ ގްރޫޕެއް (ގޭންގެއް) ކަމަށް ކަނޑައަޅައިދިނުމަށް ހައި ކޯޓުގައި އެދިފައިވާ ކަމަށް ވެސް ޕީޖީން ބުންޏެވެ.
އޭގެ އިތުރުން ޕީޖީން ވަނީ އެ ގްރޫޕަށް ނިސްބަތްވާ މީހުން ކަމަށް ފާހަގަވެފައިވާ ނުވަ މީހުންނަކީ އެ ގްރޫޕްގެ މެންބަރުން ކަމަށް ކަނޑައަޅަން ވެސް ވެސް ހައި ކޯޓުގައި އެދިފަ އެވެ.
އެ ގްރޫޕަށް ނިސްބަތްވާ ކަމަށް ބެލެވޭ ސްޕޯޓްސް ކްލަބެއް ކަމަށްވާ "އެސްކޭޕީ ސްޕޯޓްސް ކްލަބް" އުވާލުމަށް ކޮމިޝަނާ އޮފް ސްޕޯޓްސްގެ މައްޗަށް އަމުރު ކުރުމަށާއި "ސްކޫޕު" އާއި "ސްކޫޕު ކަންމަތި" އަދި "SKP" ލިޔެފައިވާ ފާރުތަކާއި ހުރިހާ ތަންތަނުން އެނަންތައް ފޮހެލުމަށް އައްޑޫ ސިޓީ ކައުންސިލްގެ މައްޗަށް އަމުރު ކޮށްދިނުމަށް ވެސް ހައި ކޯޓަށް ޕީޖީން ހުށަހަޅައިފައިވެ އެވެ.
މިއީ ފުލުހުންގެ ފަރާތުން ޕީޖީ އަށް ހުށަހެޅި މިފަދަ ދެވަނަ މައްސަލަ ކަމަށް ވިޔަސް ގޭންގުތަކުން ހިންގާ ކުށްތަކާއި އެ ނޫން ވެސް ނުރައްކާތެރި ކުށްތައް ހުއްޓުވުމުގެ ގާނޫނުގެ ދަށުން ގޭންގެއް ކަމަށް ކަނޑައަޅައިދިނުމަށް ކޯޓަށް ހުށަހެޅި ފުރަތަމަ ފަހަރެވެ.