ރާއްޖެ އިން އުމްރާގެ އަޅުކަން އަދާކުރަން މައްކާ އަށް ގޮސް ތިބި ދިވެހިންނަށް، މެދުއިރުމަތީގައި ފަށާފައިވާ ހަނގުރާމައާ ގުޅިގެން ކަމެއް ދިމާވެއްޖެ ނަމަ ގުޅުމަށް ސަރުކާރުން ހާއްސަ ހޮޓްލައިން ނަމްބަރެއް ހަމަޖައްސައިފި އެވެ.
އުމްރާވެރިންނަށް ހާއްސަކޮށް އިސްލާމިކް މިނިސްޓްރީން ހަމަޖައްސާފައިވާ ހޮޓްލައިން ނަމްބަރަކީ 9603007070+ އެވެ.
އިސްލާމިކް މިނިސްޓްރީން ވަނީ އުމްރާގެ އަޅުކަން އަދާކުރުމަށް ދަތުރުކުރަމުންދާ ދިވެހިންނާއި މިހާރު މައްކާގައި ތިބި ދިވެހިންނަށް ހާއްސަ ހާލަތެއް ދިމާވެއްޖެ ނަމަ ލަސްނުކޮށް އެ ނަމްބަރަށް ގުޅައި ރިޕޯޓުކުރަން އެދިފަ އެވެ.
އެމެރިކާ އާއި އިޒްރޭލުން އިސްވެ އިރާނަށް ދިން ވަރުގަދަ ހަމަލާތަކާ ގުޅިގެން މެދުއިރުމަތީގައި ފަށާފައިވާ ހަނގުރާމައާ ހެދި ކަމެއް ދިމާވެއްޖެ ނަމަ ސައޫދީގައި ހުންނަ ރާއްޖޭގެ އެމްބަސީ އަށް އަންގަން ވެސް މިނިސްޓްރީން އިއްޔެ ވަނީ އެދިފަ އެވެ.
އުމްރާ ދަތުރުތަކުގެ އެންމެ ފަހުގެ މައުލޫމާތު ހޯދުމާ އެކު، ކަމާގުޅުން ހުރި ރަސްމީ ފަރާތްތަކުންނާއި ސައުދީ ސަރުކާރުން ފޯރުކޮށްދޭ އިރުޝާދުތަކާއި އެންގުންތަކަށް އުމްރާވެރިން ސަމާލުވުމަށް ވެސް ވަނީ ނަސޭހަތްތެރިވެފަ އެެވެ.
ހަނގުރާމައާ ގުޅިގެން ހާއްސަ ކަމެއް ދިމާވެއްޖެ ހާލަތެއްގައި ސައުދީގެ ރިޔާލުގައި ހުންނަ ރާއްޖޭގެ އެމްބަސީގެ ހޮޓްލައިން ނަމްބަރު 966550689447+ ނުވަތަ ސައުދީގެ ޖިއްދާގައި ހުންނަ ރާއްޖޭގެ ކޮންސިއުލޭޓުގެ ހޮޓްލައިން ނަމްބަރު 966530838329+ އަށް ވީ އެންމެ އަވަހަކަށް އަންގަން މިނިސްޓްރީން ވަނީ އެދިފަ އެވެ.
މައްކާގައި ތިބި އުމްރާވެރީންގެ ކަންކަން އިސްލާމިކް މިނިސްޓްރީން ވަރަށް ގާތުން ބަލަމުން އަންނަ ކަން ފާހަގަކޮށް އެ މިނިސްޓްރީން ބުނީ މިވަގުތު އުމްރާގެ އަޅުކަމުގައި 2،154 މީހުން ތިބި ކަމަށެވެ. އޭގެ ތެރޭގައި ހިމެނެނީ 20 ކުންފުނީގެ ހަވާލުގައި ދިޔަ 1،624 އުމްރާވެރިންނާއި ހައްޖު ކޯޕަރޭޝަންގެ ހަވާލުގައި ދިޔަ 530 އުމްރާވެރިން ކަމަށް ބުންޏެވެ.