އެކި ރަށްރަށުގައި ގުރުއާން އިލްމު ފެތުރުމަށް ސަރުކާރުން ފަށާފައިވާ މަސައްކަތުގެ ތެރެއިން 17 ރަށަކަށް ރާއްޖެއިން ބޭރުން ޓީޗަރުން ގެނެސްފައިވާ ކަމަށް އިސްލާމިކް މިނިސްޓަރު. ޑރ. މުހައްމަދު ޝަހީމް އަލީ ސައީދު ރޭ ވިދާޅުވެއްޖެ އެވެ.
ހާފިޒުން ދަސްވެނިވުމުގެ ޖަލްސާގައި މިނިސްޓަރު ވިދާޅުވީ ގުރުއާން ކިޔަވައިދޭނެ ޓީޗަރުން ނެތް ރަށްރަށަށް ބޭރުން ޓީޗަރުން ގެނެސްގެން އެ އިލްމު ރަށްތަކުގައި ދިރުވުމުގެ މަސައްކަތް ކުރަމުން އަންނަ ކަމަށެވެ.
މިނިސްޓްރީން ރޭ އާންމުކުރި މައުލޫމާތުތަކުގައިވާ ގޮތުން ގުރުއާން ހިތުދަސް ޓީޗަރުން ރާއްޖެ އިން ބޭރުން 17 ރަށަކަށް ފޮނުވި އެވެ.
ގުރުއާން ހިތުދަސް ކުރާ ކްލާސްތަކުގައި ގިނަ ބަޔަކު ކިޔަވަމުން އަންނަ އިރު، އޭގެ ތެރޭގައި ގިނައީ ކުޑަކުދިންނާއި ޒުވާނުން ކަމަށް ވެސް މިނިސްޓަރު ޝަހީމް ވިދާޅުވި އެވެ. އެންމެ ގިނަ މީހުން ހިތުދަސްކުރަމުން އަންނަނީ ގުރުއާނާ ބެހޭ މަރުކަޒާއި އިލްމް އިންސްޓިޓިއުޝަންތަކުގަ އެވެ.
ރާއްޖޭގައި މިވަގުތު 301 ހާފިޒުން އެބަތިބި ކަމަށާއި ހާފިޒުންނަށް ވުމަށް އެކި ކްލާސްތަކުގައި 1،800 އަށް ވުރެ ގިނަ މީހުން ގުރުއާން ހިތުދަސްކުރަމުން އަންނަ ކަމަށް ވެސް ޝަހީމް ވިދާޅުވި އެވެ.
ހާފިޒުން ތަމްރީނު ކުރަން ރައީސް ޑރ. މުހައްމަދު މުއިއްޒު ވަރަށް ބޮޑު އަހައްމިއްޔަތު ކަމެއް ދެއްވާކަން ފާހަގަ ކުރައްވައި މިނިސްޓަރު ވިދާޅުވީ އިސްލާމިކް މިނިސްޓްރީގެ އެންމެ ބޮޑު އަމާޒަކީ މި ސަރުކާރުގެ ފަސް އަހަރު ތެރޭ ރާއްޖޭގައި ތިބި ހާފިޒުންގެ އަދަދު 500 އަށް އިތުރު ކުރުމެވެ.
"މި ވުޒާރާގެ ވިސްނުމަކީ އެ ގައުމެއްގެ އާބާދީގެ ނިސްބަތުން ދިވެހި ރާއްޖެއަކީ އެންމެ ހާފިޒުން ގިނަ ގައުމަކަށް ހެދުން، އިސްލާމީ ގައުމަކަށް ހެދުން. މިއީ އަޅުގަނޑުމެންގެ ގައުމަށް ލިބިގެންދާނެ ވަރަށް މަތިވެރި ޝަރަފެއް،" ޝަހީމް ވިދާޅުވި އެވެ.
ރޭގެ ރަސްމިއްޔާތުގައި ވަނީ ގުރުއާން ހިތުދަސްކޮށް، ހާފިޒުކަމުގެ ސަނަދު ހާސިލްކުރި 31 ހާފިޒަކަށް ސެޓްފިކެޓު ދީފަ އެވެ. އެއީ 19 ފިރިހެން ހާފިޒުންނާއި 12 އަންހެން ހާފިޒުންނެވެ.