މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަކު ބޮޑުތަނުން އުފުލިއްޖެ އެވެ.
މީޑިއާ ރިޕޯޓުތަކުން އެނގޭ ގޮތުން ތެލުގެ އަގު އެހާ ބޮޑަށް އުފުލުނީ، ތެޔޮ ސަފްލައި ކުރުމުގެ ދަތުރުފަތުރުގެ ނިޒާމަށް ބުރޫ އެރުމުގެ ސަބަބުންނެވެ.
ތެލުގެ އަގުތައް ވަނީ ޔޫރަޕްގެ ގައުމުތަކާއި ދުނިޔޭގެ އެހެން ގައުމުތަކުގައި ވެސް އުފުލިފަ އެވެ. ބާޒާރުގައި މިހާރު ސާފުނުކުރާ ތެޔޮ ފީފާއެއް އުޅެނީ 84 ޑޮލަރަށެވެ. އެއީ ގާތްގަނޑަކަށް 10 ޕަސެންޓުގެ އުފުލުމެކެވެ. ހަނގުރާމައިގެ ކުރިން ތެލުގެ އަގު ހުރީ 78 ޑޮލަރުގަ އެވެ.
ތެލުގެ އަގު މޮނިޓާކުރާ ފަރާތްތަކުން ލަފާކުރާ ގޮތުގައި ކުރިއަށް އޮތް ދެ ހަފުތާގައި މިހާރު ތެލުގެ އަގު ހުރި ވަރަށް ވުރެ އިތުރަށް އުފުލުމުގެ ފުރުސަތު ވަރަށް ބޮޑެވެ.
ތެލުގެ އަގު އުފުލުމާ ގުޅިގެން ޔޫރަޕާއި އޭޝިއާގެ ސަރަހައްދުތަކާ ދެމެދު ކުރާ ދަތުރުތަކުގެ އަގުތައް ވެސް ވަނީ ވަރަށް ބޮޑަށް އުފުލިފަ އެވެ. ބައެއް އެއާލައިންތަކުން ވިއްކަ ޓިކެޓެއްގެ އަގު 1،000 ޑޮލަރަށް ވުރެ މިހާރު ބޮޑެވެ.
އިނގިރޭސި ވިލާތުގެ ބައެއް މީޑިއާ ރިޕޯޓުތަކުގައިވާ ގޮތުން ބައެއް މަންޒިލްތަކުން ލަންޑަނަށް ކުރާ ދަތުރުތަކުގެ އަގު ވަނީ 3،200 ޑޮލަރުން 4،800 ޑޮލަރަށް އުފުލިފަ އެވެ.
ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން ރާއްޖޭގެ އެސްޓީއޯ އިން ވިއްކާ ތެލުގެ އަގުތަކަށް ވެސް ބޮޑެތި ބަދަލުތަކެއް މިއަދުން ފެށިގެން ވަނީ ގެނެސްފަ އެވެ. އެގޮތުން، 13.50ރ. ވިއްކަމުން އައި ޕެޓްރޯލް ލީޓަރެއް 16.01ރ. އަށް ވަނީ ބޮޑުކޮށްފަ އެވެ. އެއީ 2.51ރ. ގެ އިތުރުވުމުކެވެ.
ޑީސަލް ލީޓަރެއްގެ އަގު ވަނީ 13.92ރ. އިން 17.54ރ. އަށް ބޮޑުކޮށްފަ އެވެ. އެއީ 3.62ރ. ގެ އިތުރުވުމެކެވެ.