މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން، ދުނިޔޭގެ ބާޒާރުގައި ތެލާއި ގޭހުގެ އަގު އެތައް ގުނައަކުން އުފުލުމާ ގުޅިގެން، ރާއްޖޭގައި ޕެޓްރޯލް އާއި ޑީސަލް ވިއްކާ އަގު ބޮޑުކޮށްފި އެވެ.
އެސްޓީއޯއިން ރޭ ކުރި އިއުލާނެއްގައި ބުނީ، އެ ކުންފުނީގެ ދަށުން ހިންގާ އެފްއެސްއެމްގެ ޕެޓްރޯލް ޝެޑުތަކުން ޕެޓްރޯލާއި ޑީސަލް ވިއްކާ އަގަށް މިއަދުން ފެށިގެން ބަދަލު ގެނެސްފައިވާ ކަމަށެވެ.
އެގޮތުން، 13.50ރ. ވިއްކަމުން އައި ޕެޓްރޯލް ލީޓަރެއް މިއަދުން ފެށިގެން 16.01ރ. އަށް ބޮޑުކޮށްފައިވާ ކަމަށް ބުންޏެވެ. އެއީ 2.51ރ. ގެ އިތުރުވުމުކެވެ.
އަދި 13.92ރ. ގައި ހުރި ޑީސަލް ލީޓަރެއްގެ އަގު 3.62ރ. އިން ބޮޑުކޮށް، މިއަދުން ފެށިގެން ލީޓަރެއްގެ އަގަކީ 17.54ރ. ކަމަށް އެސްޓީއޯއިން ވަނީ ކަނޑައަޅައިފަ އެވެ.
އެސްޓީއޯއާ އެކު، ހޯކްސް އިން ވިއްކާ ޕެޓްރޯލާއި ޑީސަލްގެ އަގުތައް ވެސް ވަނީ ހަމަ އެ އަދަދުން ބޮޑުކޮށްފައި ކަމަށް އެ ކުންފުނިން ރޭ ނެރުނު ބަޔާނެއްގައި ވެ އެވެ.
އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތަކުގެ ރައްދުގައި އީރާނުން ވެސް ގެންދަނީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށްގެން ހަމަލާދެމުންނެވެ. އެކަމާ ގުޅިގެން މެދުއިރުމަތީގެ ދަތުރުފަތުރުގެ ނިޒާމަށް ވެސް ވަނީ ވަރަށް ބޮޑަށް ހުރަސް އެޅިފަ އެވެ.
މެދުއިރުމަތިން ތެޔޮ ސަޕްލައި ކުރަން ބޭނުންކުރާ މުހިންމު ޗެނަލެއް ކަމަށްވާ ހޮރްމުޒް ކަނޑުއޮޅި ވެސް އީރާނުން ވަނީ ބަންދުކޮށްފަ އެވެ. އެކަމާ ގުޅިގެން ތެލުގެެ އަގު އުފުލެން މިހާރު ވަނީ ފަށައިފަ އެވެ.
އެގޮތުން، ދުނިޔޭގެ ބާޒާރުގައި ތެޔޮ ފީފާއެއްގެ އަގު ވަނީ 82 އެމެރިކާ ޑޮލަރަށް ބޮޑުވެފަ އެވެ.
މި އަގުތަކުގެ ހަގީގީ އަސަރު ދިވެހިންނަށް ނުކުރަނީ ސަރުކާރުން ތެޔޮ ސަބްސިޑީ ދޭތީ އެވެ.
ހަނގުރާމައާ ގުޅިގެން ތެލާއި ކާބޯތަކެތީގެ އަގު ކޮންޓްރޯލްކޮށް، ރާއްޖެއަށް ބޭނުންވާ މިންވަރަށް އެ ތަކެތި ލިބޭނެ އިންތިޒާމްތައް ހަމަޖައްސަމުންދާ ކަމަށް ސަރުކާރުން ވަނީ ބުނެފަ އެވެ.
އަދި އިތުރު މާކެޓުތަކުން ރާއްޖެއަށް ބޭނުންވާ އަސާސީ މުދާ ގެނައުމުގެ މަސައްކަތްތައް ފަށައި، ރާއްޖެ ތެލާއި ގޭހަށް ނުޖެހޭނެކަމުގެ ޔަގީންކަން އިކޮނޮމިކް މިނިސްޓަރު މުހައްމަދު ސައީދު ވަނީ ދެއްވައިފަ އެވެ.