އައު އަހަރަކަށް މަރުހަބާ ކިޔަން ތައްޔާރުވާއިރު؛ ފެޝަނަށް ލޯބިކުރާ މީހުން އިންތިޒާރުކުރާނީ އަންނަ އަހަރުގެ އައު ސްޓައިލްތަކަށެވެ. ނުވަތަ ސުވާލަކީ މި އަހަރު ގިނަ ބަޔަކަށް ކަމުދިޔަ ޓްރެންޑްތައް އަދިވެސް ލާނީ ބާވެ އެވެ؟
އެގޮތުން، 2016ގެ އެންމެ މަގުބޫލުވި ހެދުމާއި އެކްސެސަރީ ޓްރެންޑުތަކަގު ކުރު ހުލާސާއެއް ހިއްސާކޮށްލާނަމެވެ.
1- ޗޯކާޒް
ފެޝަން ޓްރެންޑުތަކުގެ ތެރެއިން އެއްވަނަ ހޮވާ ނަމަ މިއީ އެއް ވަނަ އެވެ. މި އަހަރު އެންމެ މަގުބޫލުވި އެކްސެސަރީޒް ޓްރެންޑު ޗޯކާޒް އަކީ އެކި ޒާތުގެ ހެދުން ސްޓައިލާ ގުޅޭ ކޮންމެ ކުއްޖަކަށް ވެސް އަޅާލެވޭނެ ވައްތަރެއްގެ ފަށެކެވެ. ސޯޝަލް މިޑިއާގެ ރާނީ އަދި ފަހުގެ ޓޮޕް މޮޑެލް ކެންޑަލް ޖެނާގެ ސަބަބުން މި ޓްރެންޑު އިތުރަށް ވައިގައި ހިފި އެވެ.
2- އޮފް ޝޯލްޑާ
މި އަހަރު އޮފް ޝޯލްޑާ ސްޓައިލުގެ ހެދުންތައް ވެސް ވަރަށް މަޝްހޫރުވި އެވެ. ދުނިޔޭގެ އެކި ކަންކޮޅުތަކުގެ އަންހެން ކުދިންނަށް މަގުބޫލުވި މި ޓްރެންޑަކީ، ބައެއް މީހުންގެ ނަޒަރުގައި، ވަރަށް ލަތީފީ ހެދުމުގެ ސްޓައިލެކެވެ. ނަމަވެސް އަންނަ އަހަރު މި ޓްރެންޑު ފެންނާނެ ކަމާ މެދު ގިނަ ފެޝަން މާހިރުން ޝައްކު ކުރެ އެވެ.
3- ބޮމްބާ ޖެކެޓް
ފިނި ގައުމުތަކަށް ހާއްސަކޮށް ފަރުމާކޮށްފައިވާ މި ޖެކެޓު ސްޓައިލު ވަނީ އެކި ފެޝަން ޝޯތަކުންނާއި ފެޝަން ބްރޭންޑުތަކުން ތަފާތު ގޮތް ގޮތަށް ސްޓައިލު ކޮށްފަ އެވެ. ހިތްގައިމު ޑިޒައިނަށް އެމްބްރޮއިޑާ ކޮށްފައިވާ ޖެކެޓުގެ އިތުރުން އެކި ޒާތުގެ ފޮތި ބޭނުންކޮށްގެން ވެސް ފަރުމާކޮށްފައި ހުރި ތަން ފާހަގަވެ އެވެ.
4- މިއުލްސް
ބޫޓު ސްޓައިލްތަކުގެ ތެރެއިން އެންމެ މަގުބޫލު ސްޓައިލަކީ މިއުލްސް އެވެ. ތިރިކޮށް ނުވަތަ އުސްކޮށް ފަރުމާކޮށްފައިވާ މިއުލްސް އަރާލަން ފަސޭހަ ވެފައި ޒަމާނީ އެވެ. މިފަހުގެ ސްޓައިލަކީ ތިރި ފްލެޓްސް އެވެ. އަދި މިއުލްސްގެ ތެރެއިން ވެސް ގިނަ ބަޔަކަށް ކަމުދަނީ ތިރި މިއުލްސް އެވެ. އެގޮތުން އަންނަ އައު އަހަރު ވެސް މިއުލްސް ޓްރެންޑީ ބޫޓު ސްޓައިލަކަށް ވާނެ ކަމަށް ފެޝަން އެޑިޓަރުންނާއި އެކި މަޖައްލާތަކުން ލަފާ ކުރެ އެވެ.
5- ވީދައިފައިވާ ޖިންސު
ޖިންސުގެ އެކި ސްޓައިލްތައް މި އަހަރު ފެނިއްޖެ އެވެ. ޑެނިމް ޖިންސު ލެގިންސްގެ ބަދަލުގައި މި އަހަރު އެންމެ މަޝްހޫރުވީ ހައި ވެއިސްޓަޑް ދޫ ޖިންސެވެ. އަދި ޖިންސުގައި އެކި ހިސާބުން އިރާފައި ރޮދި ނެއްޓިފައި ހުންނަ ޖިންސުގެ ޑިމާންޑް ދިޔައީ ބޮޑުވަމުންނެވެ. ބައެއް މީހުންނަށް މިޒާތުގެ ރިޕްޑް ޑެނިމް އަގު ބޮޑުކޮށް ގަތުމަކީ ހެއްވާ ކަމެއް ގޮތަށް ވެސް ފެނެ އެވެ.
6- ސްލިޕް ޑްރެސް
ދެހާސް ފަނަރައިގެ ފަހުކޮޅުއްސުރެން މަޝްހޫރުވަމުން އައި 90ގެ ސްޓައިލްތައް މި އަހަރު ވަރަށް ގިނައިން ފެނިފައިވެ އެވެ. އެގޮތުން، ސްލިޕް ޑްރެސް އަކީ 90ގެ އަހަރުތަކުގައި ވަރަށް ގިނައިން ލައި އުޅުނު ހެދުމުގެ ސްޓައިލެކެވެ. މަހުމާ ފޮތިން ނުވަތަ ސެޓިން ފޮތިން ފަހާފައި ހުންނަ ސްލިޕް ޑްރެސް އެކި ގޮތްގޮތަށް ސްޓައިލް ކޮށްލަ އެވެ. ހުދު ޓީޝާޓެއް މަތިން ސްލިޕް ޑްރެސްއެއް ލުމަކީ ގިނަ ބަޔަކަށް ކަމުދިޔަ ގޮތެއް ވެސްމެ އެވެ.