އިންޑިއާ ކަނޑުގެ އީރާންގެ މަނަވަރެއް ފައްތާލީ އެމެރިކާގެ ސަބްމެރިންއަކުން ދިން ޓޯޕިޑޯ ހަމަލާއެއްގައި ކަމަށް އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވުމަށް ފަހު އެ ހަމަލާގެ ވީޑިއޯ އާންމުކޮށްފި އެވެ.
"އީރާންގެ މަނަވަރު ފައްތާލީ، ރައްކާތެރިކަން ލިބޭނެ ކަމަށް ހީކޮށް ބައިނަލްއަގުވާމީ ކަނޑުގެ ސަރަހައްދުގައި އޮއްވައި، އެމެރިކާގެ ޓޯޕިޑޯއަކުން،" ހެގްސެތު ނޫސްވެރިންގެ ބައްދަލުވުމެއްގައި ވިދާޅުވި އެވެ.
މިއީ މިދިޔަ މަހު އިންޑިއާގައި އޮތް، އެކި ގައުމުތަކުން ބައިވެރިވި މިލާން-2026 ނޭވަލް އެކްސަސައިޒްގައި ބައިވެރިވުމަށް ފަހު އެނބުރި ދިޔަ މަނަވަރެކެވެ.
މަނަވަރު އެހީއަށް އެދުމުން އެހީވި ސްރީ ލަންކާގެ އޮފިޝަލުން ވަނީ އައިރިސް ޑެނާ މަނަވަރުން 32 ފަޅުވެރިން ސަލާމަތް ކޮށްފައިވާ ކަމަށާއި އިތުރު 148 ފަޅުވެރިން ގެއްލިފައިވާ ކަމަށް މިއަދު ބުނެފަ އެވެ. އަދި ގެއްލިފައިވާ މީހުންގެ ތެރެއިން މިހާތަނަށް 87 މީހެއްގެ ހަށިގަނޑު ފެނިފައިވާ ކަމަށް ވެސް ވަނީ ބުނެފަ އެވެ.
މިއީ ދެ ވަނަ ބޮޑު ހަނގުރާމައިގެ ފަހުން އެމެރިކާއިން ހަނގުރަމާއެއްގައި ޓޯޕިޑޯ ހަމަލާދީ އުަޅަނދެއް ފައްތާލި ފުރަތަމަ ފަހަރެވެ.
"ހަމަ އެ ހަނގުރާމަ ގޮތަށް،" ހެގްސެތު ވިދާޅުވީ "ހަނގުރާމަ މި ކުރަނީ ކާމިޔާބުކުރަން" ކަމަށެވެ.
ޕެންޓަގަން އިން ބުނީ އެމެރިކާ އާއި އިޒްރޭލުން އީރާނަށް ދޭ ހަމަލާތަކުގެ އެއް މަގްސަދަކީ އީރާންގެ ކަނޑުގެ ސިފައިންގެ ބާރު ނައްތާލުން ކަމަށެވެ.
އީރާނުގެ ފްރިގޭޓް އައިރިސް ޑެނާއިން 32 ފަޅުވެރިން ފެނުނު ކަމަށާއި އެ މީހުން ވަނީ ވަރަށް ބޮޑަށް ޒަހަމްވެފައި ކަމަށް ލަންކާގެ ފޮރިން މިނިސްޓަރު ވިޖިތަ ހީރަތު ގާނޫނު ހަދާ މަޖިލީހުގައި ވިދާޅުވި އެވެ. ހީރަތު އޭރު ވިދާޅުވީ 180 މީހުންގެ ޖާގައިގެ މަނަވަރުގައި އަޑިއަށް ދިޔަ ހާދިސާ ހިނގި ގޮތެއް އޭރަކު ނޭނގެ އެވެ.
ސްރީ ލަންކާގެ ޑިފެންސް މިނިސްޓްރީން ބުނީ މަނަވަރުގައި ދެން ތިބި ފަޅުވެރިން ހޯދުމުގެ މަސައްކަތް ކުރަމުން އަންނަ ކަމަށާއި އެ އުޅަނދު އަޑިއަށް ދިޔައީ ލަންކާގެ ދެކުނުން 40 ކިލޯމީޓަރު (25 މޭލު) ބޭރަށް ކަމަށެވެ.
ލަންކާގެ ނޭވީން ބުނީ އެހީވާން ދިޔައިރު މަނަވަރު އެއްކޮށް އަޑިއަށް ގޮސް ފެންނަން އޮތީ އެއިން ބޭރުވި ތެޔޮތައް ކަމަށެވެ.
މަނަވަރުން މީހުން ސަލާމަތްކުރުމާއި މީހުން ހޯދުމުގެ މަސައްކަތްކުރާ ވީޑިއޯ އާންމު ނުކުރާނެ ކަމަށާއި އެއީ އެހެން ގައުމެއްގެ އަސްކަރިއްޔާ ހިމެނޭ ކަމަކަށް ވާތީ ކަމަށް ލަންކާއިން ވަނީ ބުނެފަ އެވެ. ނަމަވެސް ޕެންޓަގަން އިން ވަނީ މަނަވަރަށް ހަމަލާދޭ ވީޑިއޯ އާންމުކޮށްފަ އެވެ.