އީރާންގެ މަނަވަރެއްގައި އެއްޗެއް ގޮވައި ސްރީ ލަންކާގެ ކަނޑުގެ ސަރަހައްދާ ކައިރިއަށް އަޑިއަށް ގޮސްފައިވާ ކަމަށާއި އެ އުޅަނދުގައި ތިބި މީހުން މިއަދު ސަލާމަތްކޮށްފައިވާ ކަމަށް ސްރީ ލަންކާގެ ފޮރިން މިނިސްޓަރު ވިޖިތަ ހީރަތު ވިދާޅުވެއްޖެ އެވެ.
އީރާނުގެ ފްރިގޭޓް އައިރިސް ޑެނާގައި 32 ފަޅުވެރިން ތިބި ކަމަށާއި އެ މީހުން ވަނީ ވަރަށް ބޮޑަށް ޒަހަމްވެފައި ކަމަށް ލަންކާގެ ފޮރިން މިނިސްޓަރު، ގާނޫނު ހަދާ މަޖިލީހުގައި ވިދާޅުވި އެވެ. ހީރަތު ވިދާޅުވީ 180 މީހުންގެ ޖާގައިގެ މަނަވަރުގައި އަޑިއަށް ދިޔަ ހާދިސާ ހިނގި ގޮވުމުގެ ހަގީގަތެއް އަދި ނޭނގޭ ކަމަށެވެ. އޭނާ ވިދާޅުވީ ޒަހަމްވެފައި ތިބި މީހުން ލަންކާގެ ދެކުނު ސަރަހައްދުގައިވާ ހޮސްޕިޓަލަކަށް ގެންގޮސްފައިވާ ކަމަށެވެ.
ސްރީ ލަންކާގެ ޑިފެންސް މިނިސްޓްރީން ބުނީ މަނަވަރުގައި ދެން ތިބި ފަޅުވެރިން ހޯދުމުގެ މަސައްކަތް ކުރަމުން އަންނަ ކަމަށާއި އެ އުޅަނދު އަޑިއަށް ދިޔައީ ލަންކާގެ ދެކުނުން 40 ކިލޯމީޓަރު (25 މޭލު) ބޭރަށް ކަމަށެވެ.
"އުޅަނދުގައި ދެން ތިބި ފަޅުވެރިން ހޯދުމުގެ މަސައްކަތް މި އަންނަނީ ކުރަމުން. އެކަމަކު އެ މީހުންނަށް ވީ ކިހިނެއް ކަމެއް ނޭނގެ،" އެ މީހުން ފެނުމުގެ އުންމީދު ވަރަށް ކުޑަކަން ފާހަގަކުރައްވަމުން އޮފިޝަލަކު އޭއެފްޕީއަށް ވިދާޅުވި އެވެ.
މިނިސްޓަރު ހީރަތު ވިދާޅުވީ މަނަވަރުން އެހީއަށް އެދުމުން ލަންކާގެ ކަނޑުގެ ސިފައިންގެ ދެ އުޅަނދަކާއި އެއާކްރާފްޓެއް ފޮނުވި ކަމަށެވެ. އޭނާ ވިދާޅުވީ މަނަވަރު ފެތ
މަޖިލީހުގެ އިދިކޮޅު މެންބަރަކު ވަނީ މިއީ އީރާނާ ދެކޮޅަށް އެމެރިކާ އާއި އިޒްރޭލުން ދެމުން ގެންދާ ހަމަލާތަކުގައި ބޮން އަޅައި ފައްތާލި މަނަވަރެއްތޯ ސުވާލުކުރައްވައިފަ އެވެ. އެކަމަކު އެ ސުވާލަށް ލަންކާ ސަރުކާރުން ޖަވާބެއް ނުދެ އެވެ.
ސްރީ ލަންކާގެ ނޭވީގެ ތަރުޖަމާން ބުދިކާ ސަމްޕަތު ވިދާޅުވީ، އީރާނުގެ 32 ފަޅުވެރިން ލަންކާގެ ވެރިރަށް ކޮލަމްބޯގެ ދެކުނުން 115 ކިލޯމީޓަރު ދުރުގައި ހުންނަ، ގޯލްގެ މައި ހޮސްޕިޓަލަށް ގެންގޮސްފައިވާ ކަމަށެވެ.
"ޑިސްޓްރެސް ކޯލަށް އިޖާބަ ދިނީ އިންޑިއާ ކަނޑުގައި އަޅުގަނޑުމެންގެ ސާޗް އެންޑް ރެސްކިއު އޭރިއާގެ ތެރެއިން މި ހާދިސާ ހިނގާފައި ވާތީ އަދި އަޅުގަނޑުމެންގެ ބައިނަލްއަގުވާމީ ޒިންމާގެ ދަށުން،" ސަމްޕްތު އޭއެފްޕީއަށް ވިދާޅުވި އެވެ.
ލަންކާގެ ކަނޑުގެ ސިފައިންނާއި ވައިގެ ސިފައިން ވެސް ބުނީ ރެސްކިއު އޮޕަރޭޝަންގެ ފުޓޭޖް ހާމަ ނުކުރާނެ ކަމަށާއި އެއީ އެހެން ގައުމެއްގެ އަސްކަރިއްޔާ މީގެ ތެރޭގައި ހިމެނޭތީ ކަމަށެވެ.
ލަންކާ ފުލުހުން ވަނީ އީރާން މީހުންނަށް ފަރުވާ ދޭ ހޮސްޕިޓަލްގެ ބޭރުގައި ސަލާމަތީ ފިޔަވަޅުތައް ވަރުގަދަކޮށްފަ އެވެ. -- އޭއެފްޕީ