އިޒްރޭލާއި އެމެރިކާއިން އީރާނަށް ހަމަލާދީ އެ ގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ އެކު ބަދަލުހިފުމުގެ ގޮތުން ލުބްނާންގެ ހިޒްބުﷲ ޖަމާއަތުން އިޒްރޭލަށް ދިން ރޮކެޓް ހަމަލާތަކާ އެކު އިޒްރޭލުން މިއަދު ހަމަލާދީ ލުބްނާނުން މަދުވެގެން 31 މީހުން މަރާލައިފި އެވެ.
އިޒްރޭލުގެ އަސްކަރިއްޔާއިން ލުބްނާނުގެ ދެކުނުގެ ސަރަހައްދުތަކަށް ވަރުގަދަ ހަމަލާތަކެއް ދިނުމަށް ފަހު ބުނީ ލުބްނާންގައި ހިޒްބުالله ޖަމާއަތުގެ ބާރުގެ ދަށުގައި އޮންނަ އެހެން ހިސާބުތަކަށް ވެސް ހަމަލާ ދޭނެ ކަމަށެވެ.
ހިޒްބުالله އިން އިޒްރޭލަށް ދިން ހަމަލާއަކީ 2024 ވަނަ އަހަރުގެ ނޮވެމްބަރު މަހު އިޒްރޭލާ ދެކޮޅަށް ކުރި ހަނގުރާމަ ހުއްޓާލުމަށް ފަހު އެ ޖަމާއަތުން އިޒްރޭލާ ދެކޮޅަށް ހަމަލާދިން ކަމަށް ފާޅުގައި ބުނި ފުރަތަމަ ފަހަރެވެ.
އެ ޖަމާއަތުން ބުނީ ހައިފާ ސިޓީގެ ދެކުނުގައި އޮންނަ އިޒްރޭލުގެ އަސްކަރީ މަރުކަޒަކަށް މެންދަމުން އަލިވެ 3 (ޖީއެމްޓީން 0100) ގައި ހަމަލާ ދީފައިވާނެ ކަމަށެވެ.
އެ ބަޔާނުގައި ބުނެފައި ވަނީ މިއީ "އީރާނުގެ އިސް ލީޑަރު އާޔަތުالله އަލީ ޚާމަނާއީގެ ތާހިރު ލޭގެ ބަދަލު ހިފުމުގެ ގޮތުން" ދިން ހަަމަލާތަކެއް ކަމަށެވެ.
"ހިޒްބުالله އިން ލުބްނާންގެ މައްޗަށް އީރާނުގެ ވެރިކަން އިޚްތިޔާރު ކޮށް، އަހަރެމެންގެ އާންމު ރައްޔިތުންނާ ދެކޮޅަށް ހަމަލާ ދޭން ފެށީ. ހިޒްބުﷲ އިން ބޮޑު އަގެއް އަދާކުރަންޖެހޭނެ،" އިޒްރޭލުގެ އަސްކަރިއްޔާގެ ނޮދަން ކޮމާންޑްގެ ވެރިޔާ ރަފީ މީލޯ ބުންޏެވެ.
އޭނާ ބުނީ ހަމަލާތައް އަދިވެސް ދާނީ ކުރިއަށް ކަމަށާއި ހަމަލާތައް ދާނީ ވަރުގަދަވަމުން ކަމަށެވެ.
ލުބްނާނުގެ ހެލްތު މިނިސްޓްރީން ބުނީ އިޒްރޭލުން ދިން ހަމަލާތަކުގައި 31 މީހުން މަރުވެފައިވާ ކަމަށެވެ. އޭގެ ތެރޭގައި ބެއިރޫތުގެ ދެކުނުގައި މަރުވި 20 މީހުން ހިމެނެ. ހަމަލާތަކުގައި 149 މީހުން ޒަހަމްވެފައިވާ ކަމަށް ވެސް ރިޕޯޓުތައް ބުނެއެވެ.