ބާސެލޯނާގެ މައްޗަށް އެގްރިގޭޓް ނަތީޖާއިން ކުރިހޯދައި، އެތުލެޓިކޯ މެޑްރިޑުން ކޯޕާ ޑެލް ރޭގެ ފައިނަލުން ޖާގަ ކަށަވަރުކޮށްފިއެވެ.
ސެމީ ފައިނަލުގެ ދެވަނަ ލެގުގައި ބާސާ އަތުން 3-0 އިން ބަލިވި ނަމަވެސް، ފުރަތަމަ ލެގުގައި 4-0 އިން ހޯދި ބޮޑު މޮޅާއެކު އެތުލެޓިކޯ ފައިނަލަށް ދިޔައީ 4-3 ގެ އެގްރިގޭޓް ނަތީޖާއަކުންނެވެ.
މެޗަށްފަހު ވާހަކަ ދައްކަމުން އެތުލެޓިކޯގެ ކެޕްޓަން ކޯކޭ ބުނީ، މިއީ އޭނާގެ ހަޔާތުގައި ކުރިމަތިވި "އެންމެ އުފާވެރި ބަލިވުން" ކަމަށެވެ.
"ބާސެލޯނާ އަކީ ވަރަށް ވަރުގަދަ ޓީމެއް. އެ ޓީމުގެ ޒުވާން ކުޅުންތެރިން، ޚާއްސަކޮށް ދުނިޔޭގެ އެންމެ މޮޅު ކުޅުންތެރިޔާ ކަމަށްވާ ޕެޑްރީ ފެންނަނީ ވަރަށް އާދަޔާ ހިލާފު ފޯމެއްގައި،" ކޯކޭ ބުންޏެވެ.
އޭނއިތުރަށް ފާހަގަކުރި ގޮތުގައި މެޗުގެ ކުރީކޮޅު ލިބުނު ފުރުސަތުތަކުގެ ބޭނުން ހިފުނުނަމަ މެޗުގެ ނަތީޖާ މިއަށްވުރެ ތަފާތުވީހެވެ. ނަމަވެސް، ޓީމުން ކުރި މަސައްކަތާމެދު އޭނާ ހުރީ ހިތްހަމަޖެހިފަ އެވެ.
މި މެޗުގައި އެތުލެޓިކޯ ސަލާމަތްކޮށްދިނުމުގައި އެންމެ މުހިންމު ދައުރެއް އަދާކުރީ އެ ޓީމުގެ ދެވަނަ ކީޕަރު ހުއާން މުސޯއެވެ. ބާސާގެ ނުރައްކާތެރި ހަމަލާތައް ހުއްޓުވުމަށްފަހު މުސޯ ބުނިގޮތުގައި، ފުރަތަމަ ހާފުގައި ބައިކޮޅަށް ޕެނަލްޓީއެއް ވަނުމަކީ ނަސީބު ދެރަކަމުން ވީ ކަމެކެވެ.
"އަހަރެމެން މި މެޗަށް ނުކުތީ 4-0 ގެ ލީޑެއްގައި އޮވެގެން. އެހެންވެ ޑިފެންސް ކުރަން ޖެހުނީ. ބާސާ ފަދަ ޓީމަކާ ދެކޮޅަށް ކޮންމެ ފަހަރަކު މޮޅު ކުޅުމެއް ނުދެއްކިދާނެ، އެކަމަކު ފައިނަލަށް ދެވުމުން ވަރަށް އުފާވެއްޖެ،" މުސޯ ފާހަގަކުރިއެވެ.
މި ކާމިޔާބީއާއެކު 2013 ވަނަ އަހަރުގެ ފަހުން ފުރަތަމަ ފަހަރަށް އެތުލެޓިކޯ މެޑްރިޑް ވަނީ ކޯޕާ ޑެލް ރޭގެ ފައިނަލަށް ދަތުރުކޮށްފައެވެ.
އޭޕްރީލް 18 ގައި ކުޅޭ ފައިނަލު މެޗުގައި އެތުލޓީއާ ދެކޮޅަށް ނުކުންނާޏީ ރެއާލް ސޮސިއެޑާޑް އާއި އެތުލެޓިކް ކްލަބް ބިލްބާއޯގެ ތެރެއިން ޓީމެކެވެ. އެ ދެ ޓީމުގެ ސެމީ ފައިނަލުގެ ދެވަނަ ލެގް މިރޭ ކުޅޭނެ އެވެ. ފުރަތަމަ ލެގް މެޗު 1-0 ން ސޮސިއެޑާޑުން ކާމިޔާބު ކުރި އެވެ.