މި އަހަރުގެ ޖޫން ޖުލައިގައި އެމެރިކާ، މެކްސިކޯ އަދި ކެނެޑާ ގުޅިގެން ބޭއްވާ ފީފާ ވޯލްޑް ކަޕްގައި ކުޅެން އީރާނުން ނަޔަސް އެއްވެސް ފަރުވާލެއް ނެތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
"ޕޮލިޓިކޯ" އަށް އިއްޔެ ދެއްވި އިންޓަވިއުގައި ޓްރަމްޕް ވިދާޅުވީ އީރާނުން ވޯލްޑް ކަޕްގައި ކުޅުނަސް އޭނާއަށް އެއީ މައްސަލައެއް ނޫން ކަމަށެވެ.
"އަހަރެން ހަގީގަތުގައިވެސް އަޅައެއް ނުލަން. އީރާނަކީ ވަރަށް ބޮޑަށް ބަލިވެފައިވާ ގައުމެއް،" ޓްރަމްޕް ވިދާޅުވިއެވެ.
ވޯލްޑް ކަޕްގެ ގުރޫޕް ސްޓޭޖްގައި އިރާނުގެ ތިން މެޗު ވެސް އޮތީ އެމެރިކާގެ ފަސްގަނޑުގަ އެވެ. އެއީ ލޮސް އެންޖެލެސްގައި ކުޅޭ ދެ މެޗާއި ސިއެޓްލްގައި ކުޅޭ މެޗެވެ. ނަމަވެސް،
އެމެރިކާ އާއި އިޒްރޭލުން އިސްވެ އިރާނާ ދެކޮޅަށް ފެށި ހަނގުރާމައިގައި މެދުއިރުމަތީގެ މަސްރަހު ގޯސްވެ، އިރާނުގެ ޓީމަށް އެމެރިކާ އަށް ދަތުރުކުރާނެ ކަމާ މެދު މިހާރު ވަނީ ސުވާލު އުފެދިފައެވެ.
އެމެރިކާގެ އެޓްލާންޓާގައި މި ހަފުތާގައި ބޭއްވި ފީފާގެ ޕްލޭނިންގ ސަމިޓަށް ހާޒިރުނުވި ހަމައެކަނި ގައުމަކީ ވެސް އިރާނެވެ.
އިރާނުގެ ފުޓްބޯޅަ ފެޑަރޭޝަނުގެ ރައީސް މަހްދީ ތާޖް ވިދާޅުވީ، އެމެރިކާ އާއި އިސްރާއީލުން ދެމުންދާ ހަމަލާތަކުގެ ސަބަބުން މުބާރާތް ބޭއްވުމަށް އެދެވޭ މާހައުލެއް ނެތް ކަމަށެވެ.
އޭޝިއާގެ ކޮލިފައިންގެ އެއްވަނަ ހޯދައިގެން، ވިދިވިދިގެން ހަތަރުވަނަ ފަހަރަށް އިރާން ވޯލްޑް ކަޕުން ޖާގަ ހޯދާފައިވާ ގައުމެކެވެ.
އިރާނުން ވޯލްޑް ކަޕް ބޮއިކޮޓްކޮށްފާނެ ކަމަށް ބެލެވިފައިވާ އިރު ވެސް ފީފާއިން އަދި ރަސްމީ އެއްޗެއް ބުނެފައެއް ނުވެ އެވެ.