ވެސްޓް ހޭމް ޔުނައިޓެޑްގެ ވިންގާ އަޑަމާ ޓްރައޯރޭގެ ހަށިގަނޑުގެ މަސްތައް މިހާރުވެސް ވަރުގަދަ ކަމަށް ބުނެ، އޭނާ އިތުރަށް ބަރުއުފުލުމުގެ ތަމްރީނުތައް ކުރިއަށްގެންދިއުން އެ ޓީމުގެ ކޯޗު ނޫނޯ އެސްޕިރިޓޯ ސަންޓޯ މަނާކޮށްފިއެވެ.
ނޫނޯ ބުނި ގޮތުގައި އުމުރުން 30 އަހަރުގެ ޓްރައޯރޭ އަކީ ގުދުރަތީގޮތުން ވެސް ވަރަށް ވަރުގަދަ ހަށިގަނޑެއް ލިބިފައިވާ ކުޅުންތެރިއެކެވެ. އެހެންކަމުން އޭނާ އިތުރަށް ޖިމްގައި ވަގުތު ހޭދަކޮށް ބަރުއުފުލުމަކީ ބޭނުންތެރި ކަމެއް ނޫން ކަމަށް ކޯޗު ބުންޏެވެ.
"އޭނާގެ މަސްގަނޑަކީ ގަބޫލުކުރަން ދަތި ފެންވަރެއްގެ ވަރުގަދަ ހަށިގަނޑެއް އެއީ ޖެނެޓިކްސް [ގުދުރަތީގޮތުން ވެސް ވަރުގަދަ]. އޭނާ ޖިމަށް ދިއުން ހުއްޓާލަން ޖެހޭ ކަމަށް އަހަރެން އޮންނާނީ ބުނެފައި. މިހާރު ވެސް އޭނާ އެ އުފުލަނީ އެކަށީގެންވާ ވަރަށް ވުރެ ބަރުދަނެއް،" އިއްޔެ އޮތް ޕްރެސް ކޮންފަރެންސްގައި ނޫނޯ ބުންޏެވެ.
ނޫނޯ ބުނިގޮތުގައި ޓްރައޯރޭ ދެން އިތުރަށް ޖިމަށް ދާނީ ހަމައެކަނި އަނިޔާއިން ސަލާމަތްވުމަށް ކުރަންޖެހޭ ރައްކާތެރިކަމުގެ ތަމްރީނުތައް ހެދުމަށެވެ. އެއާ ހިލާފަށް ޓީމުގައި ހިމެނޭ ޒުވާން ކުޅުންތެރިޔާ އެއިރިޑާސް ގޮލަމްބެކިސް ފަދަ ކުޅުންތެރިން ޖިމްގައި ގިނަ ވަގުތު ހޭދަކޮށް ހަށިގަނޑު ވަރުގަދަކުރަން ޖެހޭ ކަމަށް ނޫނޯ ފާހަގަކުރިއެވެ.
ފުލަމް ދޫކޮށް ޖެނުއަރީ މަހު ވެސްޓްހޭމާ ގުޅުނު ޓްރައޯރޭ އަކީ ކުރިން ވުލްވްސްގައި ވެސް ނޫނޯގެ އިރުޝާދުގެ ދަށުން ކުޅުނު ކުޅުންތެރިއެކެވެ. ވެސްޓްހޭމުން ޖެނުއަރީގައި ގެނައި ފަސް ކުޅުންތެރިންގެ ތެރޭގައި ޓްރައޯރޭ ހިމެނެ އެވެ. އެކަމަކު އަދި އޭނާ އަށް އެއްވެސް މެޗެއްގައި އެ ޓީމުގެ ފުރަތަމަ 11 އިން ފުރުސަތެއް ނުލިބެ އެވެ.