ނިއު ރޭޑިއަންޓްގެ ޓެކްނިކަލް ޑައިރެކްޓަރުގެ މަގާމުގައި ކުރިން ހުރި ފްރެންސިސްކޯ މެނުއަލް ކައިންޒޯސް، އެ ޓީމުގެ ހެޑް ކޯޗުގެ މަގާމަށް އައްޔަންކޮށްފި އެވެ.
ސްޕެއިންގެ ބާސެލޯނާ އަށް އުފަން ކައިންޒޯސް ވަނީ ޔޫތު ކުޅުންތެރިޔެއްގެ ގޮތުގައި ބާސެލޯނާގެ 19 އަހަރުންދަށުގެ ޓީމަށް ކުޅެފަ އެވެ.
ޖެނުއަރީ މަހު އޭނާ ރާއްޖެ ގެނެސް ނިއު ރޭޑިއަންޓުން ހަވާލު ކުރީ އެ ކްލަބްގެ ޓެކްނިކަލް ޑައިރެކްޓަރު ކަމެވެ. ހޮނިހިރު ދުވަހާ ހަމައަށް އޭނާ ހުރީ އެ މަގާމުގަ އެވެ. ނިއުގެ ކޯޗުގެ މަގާމުގައި އޭރު ހުރި ތަޖުރިބާކާރު އަލީ ސުޒޭން ކޯޗުގެ މަގާމުން ފަހަތަށް ޖެހިލައި ޓެކްނިކަލް ޑައިރެކްޓަރު ކަމާ ހަވާލުވި އެވެ. އެ ކްލަބުން ބުނިގޮތުގައި ކޯޗުކަމުން ސުޒޭން އިސްތިއުފާ ދިނީ އާއިލީ ސަބަބަކާ ހެދި އެވެ.
އުމުރުން 52 އަހަރުގެ ކައިޒޯސްއަކީ ނިއު ރޭޑިއަންޓްގެ ކުރީގެ ލެޖެންޑްރީ ކޯޗު އޮސްކާ ބުރްޒޯން ބަރޭރަސްގެ އެކުވެރި ކޯޗެކެވެ. "މިހާރު" އަށް އެނގިފައިވާ ގޮތުގައި ނިއުގެ ކޯޗުކަމަށް ކައިންޒޯސް ގެންދަން ލަފާ ދިނީ، އިންޑިއާގެ އީސްޓް ބެންގާލްގެ މިހާރުގެ ކޯޗު އޮސްކާ އެވެ.
ނިއު އިން ބުނީ ފުޓްބޯޅައިގައި އެ ޓީމުން ކުރިން ދެމެހެއްޓި "ރަސްކަން" އަލުން ހޯދަން ކުރާ މަސައްކަތުގައި ކައިންޒޯސްއާ އެކު ކާމިޔާބުވާނެ ކަމުގެ އުއްމީދު އެބައޮތް ކަމަށެވެ.
"އަންދުރޭ [ކައިންޒޯސް] އަކީ ފުޓްބޯޅައިގެ ދާއިރާގައި ގިނަ ތަޖުރިބާތަކެއް ލިބިފައިވާ، ހުނަރުވެރި ކޯޗެއް. އޭނާގެ އިރުޝާދުގެ ދަށުން ނިއު ރޭޑިއަންޓުން ކުރިއަށް އޮތް މުބާރާތުގައި [އެފްއޭ ކަޕްގައި] ކާމިޔާބީގެ އައު އުސްމިންތަކަކަށް ވާސިލުވާނެ ކަމަށް އުންމީދު ކުރަން،" ސޯޝަލް މީޑިއާގައި ނިއުއިން ކޮށްފައިވާ ޕޯސްޓްގައި ވެއެވެ.
"ފަޚުރުވެރި ނިއު ރޭޑިއަންޓް އަލުން އަނބުރާ ކުރީގެ ރަސްކަމަށް ގެންދިއުމަށް ކުރާ މަސައްކަތުގައި އަންދުރޭ ފުރިހަމަ ކާމިޔާބީއަށް އެދެމެވެ."
ޖެނުއަރީ މަހު ރާއްޖެ ގެނެސް، ޓެކްނިކަލް ޑައިރެކްޓަރުގެ މަގާމަށް ކައިންޒޯސް ހަމަޖެއްސި ނަމަވެސް "މިހާރު" އަށް އެނގިފައިވާ ގޮތުގައި އެ ކްލަބްގެ ވިސްނުމަކީ ކޮންމެވެސް ހިސާބަކުން ޓީމުގެ ހެޑް ކޯޗުގެ މަގާމު ކައިންޒޯސްއާ އެއްކޮށް ހަވާލުކުރުމެވެ.