މެޗުތަކުގެ ތެރޭގައި އިދިކޮޅު ކުޅުންތެރިންނާ ވާހަކަދައްކާއިރު، އަނގަމަތީގައި އަތްއަޅައިގެން ނުވަތަ ޖާޒީން އަނގަ ފޮރުވައިގެން ވާހަކަދައްކާ ކުޅުންތެރިން ދަނޑުން ފޮނުވާލެވިދާނެ ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.
ބެންފީކާގެ ޖިއާންލޫކާ ޕްރެސްޓިއާނީ، ރެއާލް މެޑްރިޑްގެ ވިނީޝިއުސް ޖޫނިއާ އަށް ނަސްލީ ގޮތުން ފުރައްސާރަކުރި ކަމަށް ބުނާ މައްސަލައެއް ވަނީ ފެންމަތި ވެފަ އެވެ.
ޔޫއެފާ ޗެމްޕިއަންސް ލީގު ދެވަނަ ބުރުގެ ޕްލޭއޮފް މެޗުގައި އާޖެންޓީނާގެ ޕްރެސްޓިއާނީ، ވިނީޝިއުސްއާ ނަސްލީގޮތުން ދިމާކުރިކަމަށް ބެލޭވެ ވާހަކަ ބުނި އޭނާގެ ޖާޒީން އަނގަމަތި ފޮރުވައިގެން ހުރެއެވެ. މި މައްސަލައާ ގުޅޭގޮތުން ހޮނިހިރު ދުވަހު އޮތް އިންޓަނޭޝަނަލް ފުޓްބޯޅަ އެސޯސިއޭޝަން ބޯޑު (އައިއެފްއޭބީ) ގެ ބައްދަލުވުމުގައި ވަނީ މަޝްވަރާކޮށްފައެވެ.
ސްކައި ނިއުސް އަށް ދިން އިންޓަވިއުގައި އިންފަންޓީނޯ ވިދާޅުވީ، ކުޅުންތެރިއަކު އަނގަމަތި ފޮރުވައިގެން ހުރެ ދައްކާ ވާހަކައަކުން ނަސްލީ ފުރައްސާރައެއް އުފެދިއްޖެނަމަ، އެ ކުޅުންތެރިއަކު ވަގުތުން ދަނޑުން ފޮނުވާލަން ޖެހޭނެ ކަމަށެވެ.
"ކުޅުންތެރިއަކު އަނގަމަތި ފޮރުވަނީނަމަ، ބެލެވެންވާނީ އޭނާ އެ ބުނަނީ ބުނަން ނުޖެހޭ ކަހަލަ ވާހަކައެއް ކަމަށް. އެހެން ނޫންނަމަ އަނގަމަތި ފޮރުވަންޖެހޭ އެއްވެސް ސަބަބެއް އޮވެގެން ނުވާނެ،" އިންފަންޓީނޯ ވިދާޅުވިއެވެ.
"މިއީ ނަސްލީ ތަފާތުކުރުންތަކާ ދެކޮޅަށް އަޅުގަނޑުމެން ކުރާ މަސައްކަތުގައި ނަގަންޖެހޭ ހަރުދަނާ ފިޔަވަޅެއް."
އަންނަ މަހު ކެނަޑާގެ ވެންކޫވާގައި ބޭއްވުމަށް ހަމަޖެހިފައިވާ ފީފާ ކޮންގްރެސްގައި، މިއަހަރު އޮންނަ ވޯލްޑް ކަޕުން ފެށިގެން މި ގަވާއިދު ތަންފީޒު ކުރުމާ މެދު ގޮތެއް ނިންމާނެ ކަމަށް ބެލެވެއެވެ.
ނަސްލީ ފުރައްސާރަ ކުރާ ކުޅުންތެރިން އާންމުކޮށް މާފަށް އެދޭނަމަ، އެމީހުންނަށް ދޭ އަދަބަށް ލުޔެއް ދިނުމާ މެދު ވެސް އިންފަންޓީނޯ ވަނީ ވާހަކަ ދައްކައިފަ އެވެ. އޭނާ ވިދާޅުވިގޮތުގައި ރުޅި އައިސްގެން ކުރެވޭ ކަމަކަށް މައާފަށް އެދުމުގެ ސަގާފަތެއް އުފެއްދުމަކީ މުހިންމު ކަމެކެވެ.
ޕްރެސްޓިއާނީ ވަނީ ވިނީޝިއަސްއަށް ނަސްލީ ގޮތުން ފުރައްސާރަކުރި ކަމަށް ކުރެވޭ ތުހުމަތުތަކަށް އިންކާރުކޮށްފައެވެ. ނަމަވެސް ޔޫއީއެފްއިން މައްސަލަ ބަލަމުންދާތީ އޭނާ މިހާރު ހުރީ ސަސްޕެންޝަނެއްގައެވެ. ކުށް ސާބިތުވެއްޖެނަމަ 10 މެޗުގެ ސަސްޕެންޝަނެއް އޭނާއަށް އައުން އެކަށީގެންވެއެވެ. (އޭއެފްޕީ)