ކައުންސިލް އިންތިހާބުގެ ނާކާމިޔާބީ އަށް ފަހު ޕީޕީއެމް އާއި އެމްޑީއޭ ކޯލިޝަންގެ ޖަގަހައިގައި ފެށި ޖަލްސާތަކަށް މީހުން ނުދާތީ ކެލާ ދާއިރާގެ މެމްބަރު އަލީ އާރިފް ކަންބޮޑުވުން ފާޅުކުރައްވައިފި އެވެ.
ޕީޕީއެމް ވައިބަ ގްރޫޕަށް ފޮނުއްވި އަދި މިހާރު އާއްމުވެފައިވާ މެސެޖުގައި އޭނާ ވިދާޅުވެފައި ވަނީ، ޕީޕީއެމް ކޯލިޝަންގެ ޖަގަހަ ޖަލްސާތަކަކީ ރައީސް އަބްދުﷲ ޔާމީން ވިދާޅުވެގެން ބާއްވާ ޖަލްސާތަކެއް ކަމަށް އެ ޕާޓީގެ ނައިބު ރައީސް އަބްދުއްރަހީމް ވިދާޅުވެފައިވާ ކަމަށެވެ. ނަމަވެސް އެ ޖަލްސާތަކުގެ "ހާޒިރީން ބުނެދެނީ އެހެން ވާހަކައެއް" ކަމަށް އަލީ އާރިފް ވިދާޅުވި އެވެ.
"...މި ތަނުގެ ހާޒިރީން ބުނެދެނީ މުޅިން އެހެން ވާހަކައެއްހެން ހީވާތީ ހަމަ ދަންނަވާލެވުނީ. ކުށެއް ކަމުގައި ވާ ނަމަ ދީލަތި މާފަކަށް އެދެން،" އެ މެސެޖުގައިވެ އެވެ.
މި މެސެޖާ ގުޅޭ ގޮތުން އަލީ އާރިފް ވަކިން ކޮމެންޓެއް ނުކުރެއްވި އެވެ. އޭނާ އެދިވަޑައިގަތީ، އެއީ އޭނާ ފޮނުއްވި މެސެޖެއްތޯ، އާއްމުކުރި މީހާ ގާތުން އެހުމަށެވެ. ޖަގަހަ ޖަލްސާގެ ހާޒިރީއާ ގުޅޭ ގޮތުން، ޕީޕީއެމްގެ ވައިބަ ގްރޫޕަށް މެސެޖެއް ފޮނުއްވިންތޯ ސުވާލުކުރުމުން އޭނާ ޖަވާބެއް ނުދެއްވި އެވެ.
ކައުންސިލް އިންތިހާބަށް ފަހު ޕީޕީއެމް ޖަގަހައިގައި ކޮންމެ ރެއަކު ކަހަލަ ގޮތަކަށް އަންނަނީ ޖަލްސާ ބާއްވަމުންނެވެ. މި ޖަލްސާތަކުގައި ސަރުކާރު ކޯލިޝަންގައި ހިމެނޭ އެމްޑީއޭގެ މެމްބަރުން ވެސް ބައިވެރިވެ އެވެ.