ބައެއް ބޭސްތައް ވިއްކޭނެ އެންމެ މަތީ އަގު މިހާރު ވެސް ކަނޑައަޅާފައިވާ ކަމަށާއި މުޅި ލިސްޓު ތަންފީޒު ކުރުމުގެ މަސައްކަތް ކުރިއަށް ގެންދާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.
ސިއްހީ ހިދުމަތް ދިނުމުގެ ގާނޫނުގައިވާ ގޮތުން ޑޮކްޓަރީ ބޭސް ވިއްކޭނެ މެކްސިމަމް ރީޓެއިލް ޕްރައިސް (އެމްއާރުޕީ) ކަނޑައަޅަން ޖެހެ އެވެ. އެހެންވެ، އެ މަސައްކަތް ސަރުކާރުން ފަށައި މުއްދަތުތަކެއް ވެސް މީގެ ކުރިން އިއުލާނުކުރި އެވެ.
އެކަމަކު، ފާމަސީތައް ހިންގާ ފަރާތްތަކުގެ ކަންބޮޑުވުންތަކާ ހެދި އެމްއާރުޕީ އަށް އަމަލެއް ނުކުރެވުނެވެ.
ހެލްތު މިނިސްޓްރީން މިއަދު ބޭއްވި ނިއުސް ކޮންފަރެންސްގައި މިނިސްޓަރު ނާޒިމް ވިދާޅުވީ ބައެއް ބޭސްތަކަށް އެމްއާރުޕީ ތަންފީޒުކުރަން ފަށާފައިވާ ކަމަށެވެ. ނަމަވެސް، ކަނޑައެޅިގެން މުޅި ލިސްޓު ނިންމާލެވޭނެ ދުވަހެއް ދަންނަވަން ދަތިކަމަށް އޭނާ ވިދާޅުވި އެވެ.
"މިހާރު ވެސް އެބަހުއްޓޭ ބައެއް އެސެންޝަލް މެޑިސިންތަކަށް، މެކްސިމަމް ރީޓެއިލް ޕްރައިސް ކަނޑައެޅިގެން އާސަންދައިގެ ނިޒާމުގެ ތެރެއިން ބޭސް ދޫކުރެވޭނެ އަގުތަކެއް ގާއިމް ކުރެވިފައި. ފުޅާކުރަންޖެހޭ މަސައްކަތެއް އަދިވެސް،" ނާޒިމް ވިދާޅުވި އެވެ.
ބޭސް ވިއްކޭނެ އެންމެ މަތީ އަގު ކަނޑައެޅުމަށްޓަކައި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ނޮވެމްބަރު، 2021 ގައި ވަނީ ގަވައިދެއް ނެރެފަ އެވެ.
އެ ގަވާއިދުގައިވާ ގޮތުން ކޮސްޓް ޕްރައިސްގެ 100 ޕަސެންޓު ފައިދާ ލުމަށް ފަހު، އަސާސީ 357 ބޭހެއްގެ އަގު ކޮންޓްރޯލް ކުރުމުގެ ފުރަތަމަ ފިޔަވައްސަށް ޖެނުއަރީ 2022 ގައި އަމަލުކުރަން ފަށާނެ ކަމަށެވެ.
އެ އަށް ފަހު، ޖުލައި 2022 އިން ފެށިގެން ދެން ހުރި ބޭސްތަކުގެ އަގު ވެސް ކޮންޓްރޯލް ކުރާނެ ކަމަށް ކުރިން އިއުލާންކުރި އެވެ.
އެއާ ހިލާފަށް ބޭސް ވިއްކާ ނަމަ 100،000ރ. އާ ހަމައަށް ފާމަސީއެއް ޖޫރިމަނާކުރުމުގެ ބާރު އެމްއެފްޑީއޭ އަށް ލިބެ އެވެ.