މި ސަރަހައްދުގެ ބައެއް ގައުމުތަކުގައި ދިވެހިން ގާއިމްވެ ތިބެ ރާއްޖެއަށް ފުޅާ ދާއިރާއެއްގައި މަސްތުވާތަކެތި ފޮނުވާ ކަމުގެ ތުހުމަތުގައި ހޯދާ ތިން މީހުން އަދިވެސް އަތުލައިނުގަނެވޭ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
މެލޭޝިއާގައި ތިބެގެން އެއާ ކާގޯ އަދި ސީ ކާގޯ މެދުވެރިކޮށް، އިލެކްޓްރޯނިކް އަދި ބަދިގެ ސާމާނުތަކުގައި ހިމެނޭ އަވަނާއި ތެލި ފަދަ ތަކެތީގައި މަސްތުވާތަކެތި ކޮންސީލްކޮށްގެން ޑްރަގްސް އެތެރެކުރާ ތިން ދިވެހިން ފާހަގަކުރެވިފައިވާ ކަމަށް މިދިޔަ ޑިސެމްބަރު މަހު ފުލުހުން ބުނެފައިވެ އެވެ.
ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ އެ ތިން މީހުން ހިފާ ހައްޔަރުކުރުމުގެ މަސައްކަތް އިންޓަޕޯލް އަދި ބޭރުގެ އެހެން އިދާރާތަކާ އެކު މިހާރު ވެސް ކުރަމުންދާ ކަމަށާއި ނަމަވެސް، އެމީހުން ހިފައި ހައްޔަރުކޮށް ރާއްޖެ ގެނެވޭވަރު އަދި ނުވާ ކަމަށެވެ.
މަސްތުވާތަކެތީގެ ވިޔަފާރި ފުޅާވެ، ބޮޑެތި ނެޓްވޯކްތަކުގައި ކުރިފަޅައި އާ ޓްރެންޑްތައް ރާއްޖެއަށް ގެންނަމުން ދިޔައިރު 2011 ވަނަ އަހަރު ފާސްކުރި ގާނޫނުގައި ހުރި ބޮޑެތި ބާގަނޑުތައް އިދާރާތަކުން ފާހަގަކުރަމުންދިޔަ އެވެ. މިހާރު ވަނީ އެ ގާނޫނަށް ބޮޑެތި އިސްލާހުތަކެއް ގެނެސްފަ އެވެ.
މަސްތުވާތަކެތީގެ މައްސަލައިގައި ހަރުކަށި ފިޔަވަޅުތައް އަޅާނެ ކަމަށް ސަރުކާރުން ވަނީ ބުނެފަ އެވެ.
މަސްތުވާތަކެތި އެތެރެކުރާ މީހުންނަށް އެންމެ ބޮޑު އަދަބު މިހާރު ވަނީ ކަނޑައަޅައިފަ އެވެ. މިހާރު ގާނޫނު އޮތް ގޮތުން ރާއްޖެ އަށް މަސްތުވާތަކެތި އެތެރެކުރާ މީހުންނަށް އޮތީ މަރުގެ އަދަބެވެ. އެ އަދަބު ދޭން ސުޕްރީމް ކޯޓުގެ ފަނޑިޔާރުން އިއްތިފާގު ނުވާ ހާލަތުގައި ވެސް ކުށް ސާބިތުވާ ނަމަ އުމުރު ދުވަހުގެ ޖަލު ހުކުމެކެވެ. އުމުރު ދުވަހުގެ ޖަލު ހުކުމަކީ، ގާނޫނުގައިވާ ގޮތުން އެ މީހަކު މަރުވަންދެނެވެ. ކުރިން އޮތް ގޮތަށް 25 އަހަރެއް ނޫނެވެ.
މަސްތުވާތަކެތި ޓްރެފިކް ކުރާ މީހުންގެ މައްޗަށް ވެސް އޮތީ މަރުވަންދެން ޖަލުގައި އޮންނަން ޖެހޭ އުމުރު ދުވަހުގެ ޖަލު ހުކުމެވެ. އަދި މި ބާވަތުގެ ކުށްތައް ސާބިތުވާ މީހުންނަށް މާފުދިނުމާއި ޕެރޯލްގެ ދަށުން ދޫކޮށްލުން ވަނީ ގާނޫނުން މަނާކޮށްފަ އެވެ.