ހަނގުރާމައާ ގުޅިގެން މެދުއިރުމަތީގެ ގައުމުތަކުގެ އެއާޕޯޓުތައް ބަންދުކުރުމުގެ ސަބަބުން ރާއްޖޭގައި ތާށިވި ފަސިންޖަރުން ގެންދަން އެމިރޭޓްސްގެ ފްލައިޓްތައް އަންނަން ފަށައިފި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ ފަސިންޖަރުން ގެންދަން އެމިރޭޓްސްގެ މަތިންދާބޯޓެއް ވެލާނާ އިންޓަނޭޝަނަލް އެއާޕޯޓަށް ރޭ އައި ކަމަށެވެ. އަދި މިރޭ ވެސް އެމިރޭޓްސްގެ އިތުރު ފްލައިޓެއް އަންނާނެ ކަމަށް އަމީން ވިދާޅުވި އެވެ.
އެމިރޭޓްސްއަކީ ރާއްޖެ އާއި ދުބާއީއާ ދެމެދު ވަރަށް ގިނަ ދަތުރުތައް ކުރާ އެއާލައިނެކެވެ.
އަމީން ވިދާޅުވީ ޔޫއޭއީގެ ދުބާއީ އެއާޕޯޓާއި ޝާރްޖާ އެއާޕޯޓުގައި ވެސް، ރާއްޖެ ހިމެނޭ ގޮތަށް ވަރަށް ކުޑަ ކޮރިޑޯއެއްގެ ތެރެއިން ފްލައިޓް އޮޕަރޭޝަންތައް މިހާރު އެބަ ހިންގާ ކަމަށެވެ.
"އެންމެ ބޮޑަށް މިވަގުތު އަޅުގަނޑުމެން ވިސްނާލަން ޖެހޭ އެއްޗަކީ ދޯހާ އިންޓަނޭޝަނަލް އެއާޕޯޓް، އެއީ ރާއްޖެއަށް އެންމެ ގިނައިން ޑައިރެކްޓް ފްލައިޓްސް އޮޕަރޭޓްކުރާ އެއް އެއާޕޯޓް. އެ އެއާޕޯޓް އަދިވެސް އޮތީ ބަންދުކޮށްފައި،" އަމީން ވިދާޅުވި އެވެ.
އޮމާންގެ މަސްކެޓް އެއާޕޯޓަށް ވެސް ހާއްސަ ދަތުރުތަކާ އެކު، ބައެއް ޝެޑިއުލްތައް ދަތުރުތައް އަލުން ފަށާފައިވާ ކަމަށް އަމީން ވިދާޅުވި އެވެ.
އީރާނަށް އިޒްރޭލާއި އެމެރިކާއިން މިދިޔަ ހޮނިހިރު ދުވަހު ދޭން ފެށި ހަމަލާތަކުގެ ރައްދުގައި އީރާނުން ވަނީ މެދުއިރުމަތީގެ އެކި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާ ދީފަ އެވެ. އަދި އެމެރިކާގެ ހަމަލާތަކުގައި އީރާންގެ ލީޑަރު އާޔަތުﷲ އަލީ ހާމަނާއީ ވަނީ އަވަހާރަވެފަ އެވެ.
އެ ހަމަލާތަކާ ގުޅިގެން ގައުމުތަކުގެ ވައިގެ ސަރަހައްދު ބަންދު ކުރުމުން، ރާއްޖެއަށް ދަތުރުކުރާ ގިނަ އެއާލައިންތަކުގެ ފްލައިޓްތައް ކެންސަލްވެ ވެލާނާ އިންޓަނޭޝަނަލް އެއާޕޯޓުގައި ވެސް ގިނަ ޓޫރިސްޓުންތަކެއް ވަނީ ނުފުރި ތާށިވެފަ އެވެ.