ބޮޑުކަންނެލި ޕްރޮސެސްކުރަން ހުޅުމާލޭގައި ކާރުހާނާއެއް ހަދަން ނިންމައިފި އެވެ.
ރައީސް އޮފީހުގައި ބޭއްވި ޕްރެސް ކޮންފަރެންސްގައި، ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ ބޮޑުކަންނެލި މަސްވެރިންގެ ޑިމާންޑުތަކަށް އޮތް އެންމެ ހައްލަކީ، ހުޅުމާލެއިން ބޮޑުކަންނެލި ގަނެ، ޕްރޮސެސްކުރެވޭނެ ގޮތް ހެދުން ކަމަށެވެ.
މި އަހަރުގެ ތެރޭގައި ފެކްޓްރީ ހަދައި އެ ހިދުމަތްތައް ދިނުމަށް މަސައްކަތްކުރާ ކަމަށް ވެސް އޭނާ ވިދާޅުވި އެވެ.
ޝިޔާމް "މިހާރު"އަށް ވިދާޅުވީ ފެކްޓްރީ ހަދަން ހުޅުމާލެ ބަނދަރުމަތިން 25،000 އަކަފޫޓުގެ ބިމެއް އެޗްޑީސީން ހަމައްސައިދީފައިވާ ކަމަށެވެ.
ރޯދަ މަސް ނިންމައި ސަރުކާރު ހުޅުވޭ ފުރަތަމަ ހަފުތާގައި، ކޮންޓްރެކްޓް ފައިނޭންސް އުސޫލުން އެ ޕްރޮޖެކްޓު ހަވާލުކުރާނެ ކަމަށް ވެސް އޭނާ ވިދާޅުވި އެވެ.
ހުއްޓާލާފައި އޮތް ކަނޑުއޮތްގިރި އަލުން އޮޕަރޭޝަނަށް ގެނެސް، 15 ކިލޯ އަށް ވުރެ ބަރު ކަންނެލި ގަންނަން މިދިޔަ ޖެނުއަރީ މަހު ވަނީ ފަށައިފަ އެވެ.
މިފްކޯގެ ސީއީއޯ ފަރުހަތު ޝަހީރު ކުރިން ވިދާޅުވި ގޮތުގައި 25ރ. ގެ ރޭޓުން މާލެ ސަރަހައްދުން ކަންނެލި ގަންނާނެ ކަމަށެވެ. އޭގެ އިތުރުން ކަނޑުމަސް ވެސް ގަންނާނެ ކަމަށް ފަރުހަތު ވިދާޅުވި އެވެ.
"މިއީ ފެށުމެއް. ކުރިއަށް އޮތް ތަނުގައި މި ކޮޅުގައި އަޅުގަނޑުމެންގެ ކޯލްޑް ސްޓޯރޭޖާއި އަދި އައިސް ލިބުމުގެ ހިދުމަތާއި މަސްވެރިންނަށް ތެޔޮ ދިނުމުގެ ހިދުމަތް ވަރަށް އަވަހަށް، އިންޝާﷲ އަޅުގަނޑުމެން ގާއިމްކުރާނަން،" ކަނޑުއޮތްގިރީގައި ހުންނަވައިގެން މީޑިއާއާ ވާހަކަ ދައްކަވަމުން އޭނާ ވިދާޅުވި އެވެ.