ރާއްޖެއިން ބޭރުގައި ކިޔަވަމުން އަންނަ 75 ޕަސެންޓް ދަރިވަރުންނަށް ގަވާއިދުން ފައިސާ ދޫކުރަމުން އަންނަ ކަމަށާއި ބައެއް ފަހަރަށް ލަސްތަކެއް އުޅެނީ ޔުނިވާސިޓީތަކުން މިނިސްޓްރީއަށް އިންވޮއިސް ނުފޮނުވުން ފަދަ މައްސަލަތަކުގައި ކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
ރާއްޖެއިން ބޭރުގެ ބައެއް ގައުމުތަކުގައި ކިޔަވާ ދަރިވަރުންނަށް ފައިސާ ލިބުން ލަސްވެ، ކޯސް ދޫކޮށްލަން ޖެހުނު ކަމަށް ބުނާ މައްސަލަތަކެއް ފެންމަތިވީ މިދިޔަ ޑިސެމްބަރުގަ އެވެ. އޭރު މިނިސްޓްރީން ބުނީ ފައިސާ ނުލިބިގެން މިނިސްޓްރީ އަށް އެއްވެސް މައްސަލައެއް ހުށަހަޅާފައި ނުވާ ކަމަށެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރާ ސުވާލުކުރީ ދަރިވަރުންނަށް ފައިސާ ދޫކުރުމުގައި ލަސްތަކެއް އުޅޭތޯ އާއި ދޫނުކުރެވޭ ނަމަ ލަސްވަނީ ކޮން ސަބަބަކާހުރެތޯ އެވެ.
އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ ބައެއް ގައުމުތަކުގައި ކިޔަވާ ދަރިވަރުންނަށް ފައިސާ ލިބުމުގައި ދަތިތަކެއް އުޅޭ ކަމަށެވެ.
"ތި ވިދާޅުވީ ތެދުފުޅެއް، ބައެއް ކަހަލަ ޕޭމަންޓް ތަކުގައި ޑިލޭތަކެއް އުޅޭ. ވަކިން ހާއްސަކޮށް އެހެން ވަނީ ތިން އިދާރާއަކުން ބަލާފައި ފައިސާ ދޫކުރުމުގެ ކަންކަން މި އަންނަނީ. ބައެއް ފަހަރަށް ޔުނިވާސިޓީތަކުން އަޅުގަނޑުމެންނަށް އިންވޮއިސް އަންނައިރު އޮންނަނީ ހަފްތާއަކަށް ވެފައި ޑެޑްލައިނަށް،" ހައިދަރު ވިދާޅުވި އެވެ.
"އެހެންވީމަ ވާ ގޮތަކީ އެ ޑެޑްލައިނާ އަޅުގަނޑުމެން މީޓް ކުރުމުގައި ކޮންމެވެސް ވަރެއްގެ ދަތިތަކެއް ދިމާވޭ."
ދަރިވަރުންނަށް ފައިސާ ދޫކުރުން ލަސްވާ އެންމެ ބޮޑު ސަބަބަކީ އެއީކަން ފާހަގަ ކުރައްވައި މިނިސްޓަރު ވިދާޅުވީ މިހާރު ފައިސާ ދޫކުރުމުގެ މައްސަލަ ކުރިއަށްވުރެ ބޮޑަށް ރަނގަޅު ކޮށްފައިވާ ކަމަށެވެ. އަދި ދަރިވަރުންނަށް މިހާރު ވަގުތުން ފައިސާ ލިބެމުންދާނެ ކަމަށް ވެސް މިނިސްޓަރު ވިދާޅުވި އެވެ.
ފައިސާ ދޭން ޖެހޭ މުއްދަތުގެ ކުރިން ވެސް މިހާރު ބައެއް ދަރިވަރުންނަށް ފައިސާދީ ނިންމާފައިވާނެ ކަމަށާއި 75 ޕަސެންޓު ދަރިވަރުންނަށް ގަވައިދުން ފައިސާ ދޫކުރަމުން އަންނަ ކަމަށް ހައިދަރު ވިދާޅުވި އެވެ.
ނަމަވެސް ބައެއް ފަހަރަށް އެކި ކަހަލަ މައްސަލަތައް ދިމާވެ ނުދެވި ހުންނަކަން ފާހަގަ ކުރައްވައި މިނިސްޓަރު ވިދާޅުވީ މިނިސްޓްރީން އަންނަނީ އެފަދަ މައްސަލަތައް ވެސް މަދު ކުރުމަށް މަސައްކަތް ކުރަމުން ކަމަށެވެ.