ލޯކަލް ޓޫރިޒަމް ފުޅާވަމުން އަންނަ ބ. ފުޅަދޫގައި އާންމު އިޖުތިމާއީ މިންގަނޑާ ހިލާފަށް ހެދުން އަޅައިގެން (ބިކިނީ ލައިގެން) ރަށު ތެރޭގައި އުޅޭ ޓޫރިސްޓުން ޖޫރިމަނާ ކުރަން އެރަށު ކައުންސިލުން ނިންމައިފި އެވެ.
ފުޅަދޫ ކައުންސިލުން ކުރި އިއުލާނެއްގައި ބުނީ އާންމު ތަންތަނުގައި ޓޫރިސްޓުން ހެދުން އަޅާ ގޮތާ ބެހޭގޮތުން ތަކުރާރުކޮށް ޝަކުވާ ލިބެމުންދާ ކަމަށެވެ. އަދި އެ މައްސަލަ ހައްލުކުރަން އެކިފަހަރު ކައުންސިލުން ގިނަ މަސައްކަތްތަކެއް ކުރި ނަމަވެސް ހައްލެއް ލިބިފައިނުވާ ކަމަށް ބަޔާނުގައިވެ އެވެ.
އެހެންވެ، އާންމު އިޖުތިމާއީ މިންގަނޑުތަކާ ހިލާފަށް ހެދުން އަޅައިގެން އާންމު ތަންތަނުގައި އުޅޭ ޓޫރިސްޓުން 750ރ. އިން ޖޫރިމަނާކުރަން ނިންމާފައިވާ ކަމަށް އެ ބަޔާނުގައިވެ އެވެ. އަދި އެ ނިންމުމަށް މިއަދުން ފެށިގެން އަމަލުކުރަން ފަށާނެ ކަމަށް ވެސް ކައުންސިލްގެ އިއުލާނުގައިވެ އެވެ.
އާބާދީގައި 300 އެއްހާ މީހުން އުޅޭ ފުޅަދޫގައި އެގޮތަށް ނިންމިއިރު، ރާއްޖޭގެ މީހުން ދިރިއުޅޭ ރަށްރަށުގެ އާންމު ތަންތަނުގައި ވެސް ނިވައިކަން ކުޑަ ހެދުމާއި ބިކިނީ ލައިގެން ޓޫރިސްޓުން އުޅޭ މައްސަލަ ހައްލުކުރުމަށް، ރައްޔިތުންގެ މަޖިލީހަށް ވަނީ ޕެޓިޝަނެއް ވެސް އޮތީ ހުށަހަޅައިފަ އެވެ.
އެފަދަ މައްސަލަތައް ފެންމަތިވަނީ ލޯކަލް ޓޫރިޒަމް ކުރިއަރަމުން އަންނަ ރަށްރަށުގަ އެވެ. އަދި އެ ރަށްރަށުގައި ޓޫރިސްޓުންނަށް ހާއްސަ ސަރަހައްދުތައް ކަނޑައަޅާފައި ހުއްޓަސް، ރަށު ތެރޭގައި ވެސް އިޖުތިމާއީ މިންގަނޑާ ހިލާފަށް ހެދުން އަޅައިގެން ޓޫރިސްޓުން އުޅޭ މައްސަލަ ވެސް ފެންމަތިވެ އެވެ.