މި ރޯދަމަހުގެ ފަހުދިހައިގެ ހަތަރު ދުވަހެއްގައި އައިޑީކާޑު ދޫކުރުމުގެ ހިދުމަތް ދޭނެ ކަމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން މިއަދު ބުނެފި އެވެ.
ޑީއެންއާރު އިން ކުރި އިއުލާނެއްގައި ބުނީ އައިޑީކާޑު ދޫކުރުމުގެ ހިދުމަތް ރޯދަމަހުގެ ފަހުދިހައިގެ ދުވަސްތަކުގައި ދޭން ވަކި ދުވަސްތަކަކާއި ގަޑިތަކެއް ކަނޑައަޅާފައިވާ ކަމަށެވެ.
އައިޑީކާޑު ދޫކުރުމުގެ ހިދުމަތް ލިބޭނެ ދުވަސްތަކަކީ މި މަހު 11، 15، 17 އަދި 19 ވަނަ ދުވަހު ހެނދުނު 9:00 އިން މެންދުރު ފަހު 1:00 އަށެވެ.
މާލެ ސަރަހައްދުގައި އައިޑީކާޑު ދޫކުރުމުގެ ހިދުމަތް ދޭނީ ވެލާނާގޭގައި ހުންނަ ޑީއެންއާރުގެ ހެޑް އޮފީހުގެ އިތުރުން ހުޅުމާލެ 1 ގައި ހުންނަ އުމަރު ޒާހިރު ބިލްޑިން އާއި ހުޅުމާލެ 2 ގައި ހުންނަ ވިނަރެސް ޓަވަރު އަދި ވިލިމާލޭގައި ހުންނަ ޑީއެންއާރުގެ އޮފީސްތަކުންނެވެ.
ރޯދަމަހުގެ ފަހުދިހައަކާއި އީދު ބަންދާ އެކު، އަންނަ ހޯމަ ދުވަހުން ފެށިގެން މި މަހު 21 ވަނަ ދުވަހާ ހަމައަށް ސަރުކާރު ބަންދުވާނެ އެވެ. އެ ބޮޑު ބަންދަށް ފަހު ސަރުކާރު އޮފީސްތައް ދެން ހުޅުވާނީ މި މަހު 22 ގަ އެވެ.