މ. ރަތްމަންދޫ މީހުން ކ. ތުލުސްދުއަށް ބަދަލުކުރަން 44 ގޯތި ހަމަޖައްސައިފި އެވެ.
ހައުސިން މިނިސްޓްރީން ރަތްމަންދޫ ކައުންސިލަށް މިދިޔަ ބުދަ ދުވަހު ފޮނުވި ސިޓީއެއްގައި ބުނީ ރަތްމަންދޫ މީހުން ތުލުސްދުއަށް ބަދަލުކުރުމުގެ މަސައްކަތް ކުރިއަށް ގެންދިއުމަށް އެ ރަށުން 44 ގޯތި ހަމަޖައްސާފައިވާ ކަން ތުލުސްދޫ ކައުންސިލުން މިނިސްޓްރީއަށް އަންގާފައިވާ ކަމަށެވެ.
އެހެންވެ، އެ މަސައްކަތް ކުރިއަށް ގެންދިއުމަށް ކުރަން ޖެހޭ މަސައްކަތްތައް ހައުސިން މިނިސްޓްރީން ކުރާނެ ކަމަށް، ސްޓޭޓް މިނިސްޓަރު އަހްމަދު ނާޒިމް މުހައްމަދު ސޮއިކުރައްވައި ރަތްމަންދޫ ކައުންސިލަށް ފޮނުއްވި ސިޓީގައި ވިދާޅުވި އެވެ.
އާބާދީގައި 300 އެއްހާ މީހުން ދިރިއުޅޭ ރަތްމަންދޫގެ މީހުން އެހެން ރަށަކަށް ބަދަލުވުމާ މެދު ރަށުގެ މީހުންގެ މެދުގައި މިދިޔަ އަހަރު ވަނީ ހިޔާލު ތަފާތުވުންތައް އުފެދިފަ އެވެ. ރައީސް ޑރ. މުހައްމަދު މުއިއްޒު މިދިޔަ އަހަރުގެ ސެޕްޓެމްބަރު މަހު އެ ރަށަށް ކުރެއްވި ދަތުރުފުޅުގައި ވަނީ އެ މައްސަލައިގައި ރަށުގެ ރައްޔިތުންގެ ހުރި ހިޔާލުތައް އަޑުއައްސަވައިފަ އެވެ.
އެ ރަށުން އެހެން ރަށަކަށް ހިޖުކުރަން ބޭނުންވާ މީހުން ސޮއިކޮށް ރައީސަށް ޕެޓިޝަނެއް ވެސް ހުށަހަޅާފައިވެ އެވެ.
ރައީސް މުއިއްޒު ވިދާޅުވެފައި ވަނީ ރަތްމަންދޫން މީހުން ބަދަލުކުރުމުގެ މައްސަލާގައި އުފެދިފައިވާ ހިޔާލު ތަފާތުވުންތަކަށް ހައްލެއް ހޯއްދަވައި ދެއްވަން މަސައްކަތްޕުޅު ކުރައްވާނެ ކަމަށެވެ.
އާބާދީ މަދުވުމުގެ ސަބަބުން ހދ. ހިރިމަރަދޫ މީހުން އެ އަތޮޅު ހަނިމާދުއަށް ބަދަލުކުރަން ވެސް ސަރުކާރުން ވަނީ ނިންމައިފަ އެވެ. ރައީސް މުއިއްޒު އެކަން އިއުލާން ކުރެއްވީ މިދިޔަ އަހަރުގެ އޯގަސްޓް މަހު އެވެ.